Mpitsara 1
1
Naka toerana tao Kanahàna ny Israelita
1Taorian’ny nahafatesan’i Josoa dia nanontany ny TOMPO ny Israelita hoe: «Iza amin’ny fokonay no tokony handeha voalohany hanafika ny Kanahanita?» 2Dia namaly azy ny TOMPO hoe:
–Ny vatan-dehilahy amin’ny fokon’i Joda, fa hatolotro azy ny tany.
3Dia hoy ny vatan-dehilahin’i Joda tamin’ny taranak’i Simehôna rahalahin’i Joda hoe:
–Andeha hiaraka aminay haka ny faritany natokana ho anay, ka hiarahantsika manafika ny Kanahanita; avy eo dia haka ny faritaninareo miaraka aminareo koa izahay.
Dia nikambana tamin’ny vatan-dehilahin’i Joda ny olona tao amin’ny fokon’i Simehôna, 4ka niara-nanafika izy roa tonta. Dia natolotry ny TOMPO azy ny Kanahanita sy ny Perizita, ka nahafatesany vatan-dehilahy andiany folo tao Bezèka#1.4 Bezèka: tanàna tsy fantatra mazava izay misy azy, kanefa tokony ho akaikin’i Jerosalema.. 5Hitany tao Bezèka ny mpanjaka Adônỳ-Bezèka ka notafihiny, ary resiny ny Kanahanita sy ny Perizita. 6Vaky nandositra i Adônỳ-Bezèka saingy nenjehin’ireo ka tratrany, dia notapahiny ny ankiben-tanany sy ny ankiben-tongony. 7Ary hoy i Adônỳ-Bezèka hoe:
–Mpanjaka fitopolo, tapaka ankiben-tanana sy ankiben-tongotra, no nitsimpona hanina teo ambany latabatro; koa izay nataoko ihany no navalin’Andriamanitra ahy!
Dia nentina ho any Jerosalema i Adonỳ-Bezèka ary maty tany.
8Dia nanafika an’i Jerosalema ny vatan-dehilahin’i Joda ka nahazo azy; ary novonoiny tamin’ny sabatra ny mponina sady nodorany ny tanàna. 9Taorian’izany, dia nidina ireo hiady tamin’ny Kanahanita izay nonina teny an-kavoana sy tany amin’ny faritra atsimo ary tany amin’ny lemak’i Sefelà. 10Avy eo dia nandeha izy namely ny Kanahanita tao Hebrôna, izay nantsoina hoe Kiriata-Arbà tamin’izany fotoana izany, ka nandresy ny tarik’i Sesay sy i Ahimàna ary i Talmay. 11Avy tao Hebrôna izy no nandeha namely ny mponina tao Debîra izay nantsoina hoe Kiriata-Sefera tamin’izany fotoana izany. 12Dia hoy i Kaleba hoe: «Izay mandresy an’i Kiriata-Sefera ka mahazo azy dia homeko azy i Haksà zanako vavy ho vadiny.» 13Ary i Hôtniela, zanakalahin’i Kenaza izay zandrin’i Kaleba, no nahazo ny tanàna; koa nomen’i Kaleba azy i Haksà zanany vavy ho vadiny. 14Rehefa tonga teo anilan’i Hôtniela razazavavy, dia notoroany hevitra mba hangataka saha amin’ny rainy. Vao nidina niala tamin’ny borikiny kosa i Haksà, dia nanontanian’i Kaleba ny amin’izay ilainy; 15ka izao no navaliny azy:
–Mba anaovy fanomezana aho! Tany ngazana any atsimo no natolotrao ahy, ka mba omeo loharano aho.
Dia nomen’i Kaleba azy ny loharano any ambony sy ny loharano atỳ ambany.
16Ary ny Kenita, taranaky ny rafozan-dahin’i Mosesy, dia niainga avy tao Jerikao, tanàna be rofia. Niainga niaraka tamin’ny vatan-dehilahin’i Joda izy ka nandeha nanorim-ponenana tany amin’ny taniefitr’i Joda tao atsimon’i Harada#1.16 I Harada dia tanàna eo amin’ny 30 km ao atsimon’i Hebrôna. ary niara-nonina tamin’ny Hamalekita.
17Ary ny vatan-dehilahin’i Joda dia mbola nandeha nanafika niaraka tamin’ny taranak’i Simehôna rahalahin’i Joda ihany ka nandresy ny Kanahanita nonina tao Tsefata#1.17 Tsefata: tanàna tsy fantatra mazava izay misy azy, kanefa tokony ho akaikin’i Harada.. Noravany tanteraka io tanàna io, ka nanomboka hatreo ny anaran’ny tanàna dia nataony hoe Hôrmà na Faharavana. 18Avy eo dia nalain’ny olon’i Joda koa ny tanàna Gazà sy Askelôna ary Hekrôna#1.18 Gazà sy Askelôna ary Hekrôna dia tanàna filistinina, jereo Jos 13.3. mbamin’ireo faritra manodidina azy avy. 19Ny TOMPO mihitsy no efa nomba ny olon’i Joda tamin’izany, ka azony ny faritra be tendrombohitra. Nefa tsy voaroakany ireo mponin’ny tany lemaka, satria nanana kalesy vy ireny. 20Dia nomena an’i Kaleba i Hebrôna araka izay efa nolazain’i Mosesy azy. Ireo tarika hanakita telo mponin’i Hebrôna dia noroahin’i Kaleba hiala tao. 21Fa ny Jebosita izay nonina tao Jerosalema kosa dia tsy voaroakan’ny taranak’i Benjamîna, ka mbola miara-nonina amin’ny taranak’i Benjamîna ao Jerosalema mandraka androany.
22Ny taranak’i Efraîma sy i Manase zanakalahin’i Jôsefa kosa dia niakatra nanafika an’i Betela#1.22 Betela: jereo Gen 12.8 sy nta. ary nombàn’ny TOMPO. 23Nandefa iraka izy aloha mba hijery ny tanàna, izay nantsoina hoe Lozy tamin’izany fotoana izany. 24Dia nahita lehilahy iray nivoaka avy tao an-tanàna ireto iraka, ka niteny taminy hoe:
–Atoroy anay ny fomba hidiranay ao an-tanàna, dia hamindra fo aminao izahay.
25Dia natoron-dralehilahy azy ny fomba hidirany ao an-tanàna. Koa naringan’ireo tamin’ny sabatra ny mponina tao an-tanàna, fa ilay lehilahy sy ny fianakaviany manontolo kosa navelany handeha. 26Dia nankany amin’ny tanin’ny Hetita ralehilahy ka nanorina tanàna anankiray nantsoiny hoe Lozy; ka mbola izany ihany no anarana entiny mandraka androany#1.26 tanin’ny Hetita: izany hoe ny faritra Siria-Palestinina manontolo. Ampit Jos 1.4 sy nta. Midadasika ihany ilay faritra, ary tsy fantatra mazava izay nanorenana ny tanàna Lozy vaovao..
27Ary ny taranak’i Manase dia tsy naharoaka ny mponina tao Bety-Seàna sy Tahenàka na ny tao Dôra sy Jiblehama ary Megidao na tamin’ireo tanàna madinika samy miankina aminy avy; koa nanohy nipetraka tamin’izany faritany izany hatrany ny Kanahanita. 28Ary na dia efa natanjaka aza i Israely tatỳ aoriana, dia tsy naharoaka azy ireo mihitsy fa nampanompo azy fotsiny.
29Ny taranak’i Efraîma ihany koa dia tsy naharoaka ny Kanahanita izay nonina tao Gezera; ka nipetraka teo anivon’ny Efraîmita ireo Kanahanita tao Gezera.
30Ny taranak’i Zebolòna dia tsy naharoaka ireo mponina tao Kitrôna na ny tao Nahalôla; ka nipetraka teo anivon’ny Zebolonita ireo Kanahanita ireo saingy nampanompoiny.
31Ny taranak’i Asera dia tsy naharoaka ny mponina tao Hakao sy Tsidôna na ny tao Mehaleba sy Akziba na ny tao Helbà sy Afîka ary Rehôba. 32Koa nipetraka teo anivon’ny Kanahanita izay nonina teo amin’ny tany ireo Aserita satria tsy naharoaka azy.
33Ny taranak’i Naftalỳ dia tsy naharoaka ny mponina tao Bety-Semesy sy Bety-Hanata; ka nonina teo anivon’ny Kanahanita izay nipetraka tao ireo Naftalita saingy nampanompo azy.
34Ny Amôrita kosa dia naharesy tosika ny taranak’i Dana teny amin’ny faritany be tendrombohitra ka tsy namela azy hidina teny amin’ny tany lemaka. 35Nanohy nipetraka tao Hara-Heresa sy Aialôna ary Sahalbima ny Amôrita; kanjo tato aoriana dia nanjakan’ny taranak’i Efraîma sy i Manase izy, ka voatery nanompo azy. 36Ny faritanin’ny Edômita kosa miainga eo amin’ny fiakarana Hakrabima, dia eo amin’ny harambato no ho miakatra.
Currently Selected:
Mpitsara 1: DIEMDC
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.