Abdías 1
1
J'ech'el chich' bic'tajesel o li Edome
1Li Abdiase oy c'usi laj yich' ac'bel yil ta xch'ulel yu'un li Muc'ul Diose, ja' li Cajvaltique, ja' yu'un jech laj yal ta sventa li Edome:#Is 34.5-17; 63.1-6; Jer 49.7-22; Ez 25.12-14; 35.1-15; Am 1.11-12; Mal 1.2-5.
Laj ca'icutic oy c'usi laj yal li Muc'ul Diose;
la stac batel jun j'almantal ta jujun banamil, jech laj yal:
“Licanic, bat xa jtsactic ta pleito li lum Edome”, xi.
Li Muc'ul Diose jech chalbe li Edome:
2“A'yo ava'ay, biq'uit chacom cu'un ta scotol li yantic banamile;
solel ta jbic'tajesot o ta j'ech'el.
3La slo'laot li atoyobbaile,
vo'ot ti cacalot lec ta jap ch'entique,
ti bats'i toyol bu nacalote,
jech laj anop ta avo'nton:
‘¿Boch'o xu' chtal sjipun yalel ta banamil?’, xachi.
4Ac'o me bats'i toyol chabat jech chac c'u cha'al xic,
ac'o me chbat avac' lec atas ta o'lol c'analetic,
te to chbat jipot yalel tal.
5“Me oy chtal j'eleq'uetic ta ac'ubaltic,
yu'un chtal yelc'anic c'usi oy avu'une,
mu'yuc ta xich' batel scotol.
Me chtalic li jtuch'-ts'usubetique,
ta to xascomtsanboxuc jchojcantic li ats'usube.
Pero li vo'ote j'ech'el chavich' ulesel o.
6C'u x'elan chavich' chajilanbel li c'usitic oy avu'une, Esaú;
c'u x'elan chavich' tabel ta t'unel li c'usitic anac'oje.
7Scotol li boch'o co'ol avo'nton achi'uque ta slo'laicot;
c'alal to ta sti'iltac banamil chac'ot ta nutsel yu'unic.
Li boch'o jun to'ox avo'nton achi'uque
ta scontrainicot;
li boch'o laj to'ox avac'be sve'ele
ta syaquicot ta syoquic.
Solel mu'yuc abijil ta melel”, xi.
8Li Muc'ul Diose jech chal:
“C'alal tsta sc'ac'alil cu'une,
ta xcules scotol li boch'otic bijic te ta Edome
xchi'uc li boch'otic oy c'usi lec sna'ic te ta vitsetic yu'un Esaue.
9Li jpasc'opetic ta Temane
ta xniquic ta xi'el.
Li boch'o te nacajtic ta vitsetic yu'un Esaue
mu junuc cuxul ta xcom.
Sc'oplal c'u x'elan la sta smul Edom
10“J'ech'el chayal o ta q'uexlal;
j'ech'el chlaj o ac'oplal
ta scoj ti laj avuts'intabe, ti laj amilbe smomnich'nab li avits'in Jacobe.#Jl 3.19.
11Yu'un c'alal ichucbat batel yu'un yanlum cristianoetic li yajsoldadotaque,
c'alal la svoq'uic ochel ti'coraltonetic li yanlum cristianoetique,
li vo'ote ja' no'ox laj aq'uej aba.
C'alal la svoc'be sbaic ta canal tajimol li sc'ulejal Jerusalene,
li vo'ote xco'laj xchi'uc ja' achi'iltac laj apas aba ec.
12Mu lecuc ti te no'ox aq'ueloj
c'alal yorail oy svocol li achi'il ta voq'uele.
Mu lecuc ti xcuxet xa avo'nton
c'alal yorail laj yich' jinesel li Judae.
Mu lecuc ti ja' no'ox laj ana'le ti c'alal
ja'o toj tsots svocolique.#Sal 137.7; Lm 4.21.
13Mu lecuc noxtoc ti la'och ta slumalic
ti c'alal ja'o chich'ic vocole,
ti xcuxet xa avo'nton te aq'ueloj
ti c'alal yorail toj abul sbaique.
Mu lecuc ti laj avac' ac'ob ta sc'ulejal
ti c'alal yorail oy svocolique.
14Jech noxtoc mu lecuc ti te lava'an aba ta curuzal be
sventa chamil ec li boch'otic chjatovic to loq'uele.
Mu lecuc ti laj avac' ta c'abal ec
li boch'o icolic to ta scoj vocole.
15Nopol xa sc'ac'alil chac'be stojol jujun banamil li Muc'ul Diose.
Ti c'u x'elan laj apasbe achi'ile ja' no'ox jech chavich' ec;
chjoybij ta aba atuc.
Chich' toyel liquel yan velta li Israele
16“Ta sventa ti toj ch'a li sbel copa laj avuch'ic te ta ch'ul vits cu'une,
ja' jech ch'a chcac'be yuch'ic scotol ora ec li yantic banamile;
ja' to me laj yuch'ic scotole,
jech j'ech'el ta xch'ayic o batel.
17Yan li vits Sione ja' ch'ul banamil chcom cu'un,
jech oy to boch'otic chcol comel.
Li smomnich'nab Jacobe chlic sventainic yan velta
li c'usitic oy yu'unique.
18Li smomnich'nab Jacobe xco'laj xchi'uc c'oc' chc'otic;
li smomnich'nab Josee xco'laj xchi'uc yat c'oc' chc'otic.
Yan li smomnich'nab Esaue ja' jech chc'ot jech chac c'u cha'al c'ajben;
ta xich'ic chiq'uel, j'ech'el ta xc'aq'uic o.
Me junuc mu'yuc xa ta xcom,
vu'un chcal jtuc, vu'un li Muc'ul Diosune”, xi li Diose.
19Li israeletic nacajtic ta Negueve ja' chlic yich'ic li vitsetic yu'un Esaue. Li boch'otic nacajtic ta Sefelae ja' chich'beic yosil li filistaetique. Jech noxtoc ja' chich'beic li yosilal Efraín xchi'uc Samariae. Li boch'o te nacajtic ta yosilal Benjamine ja' chich'ic li Galaade. 20Li soldadoetic yu'un israeletic ti chucbil ibatic ta yan banamile ja' ta xich'ic li yosilal cananetic xchi'uc c'alal ta yosilal Sareptae. Li boch'o te to'ox nacajtic ta lum Jerusalén ti chucbil ibatic ta yan banamil, ti te xa nacajtic ta Sefarade, ja' ta xich'ic li lumetic ta Negueve. 21Li boch'o tspasic canale ta xmuyic batel ta vits Sión sventa chalic c'u x'elan stojol smul chich' li boch'otic te oyic ta vitsetic yu'un Esaue. Ja' xa ventainvanuc stuc li Muc'ul Diose.
Currently Selected:
Abdías 1: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.