Nahúm 2
2
1Nínive, chtal xa yulesot li avajcontrae.
Chabio me li coralton avu'une.
Pamuc'tao me lec li bebetique.
Chuco me lec ach'ut.
Ich'bo me lec yipal.
2Yu'un li Muc'ul Diose ja' chcha'ac'be slequilal yan velta li Jacobe;
chcha'ac'be yutsilal yan velta li Israele.
Yu'un ipojbatic batel scotol yu'un li j'uts'intavanejetique,
ja' jech la scomtsanic jech chac c'u cha'al ts'usub ti mu'yuc xa jecuc sc'obc'obe
3Li smacubbailic jpasc'opetique tsajubenic no'ox tal;
li sc'u' spoc' soldadoetique puru tsojic.
Li scaretaique tstsan tal yilel jech chac c'u cha'al c'oc'.
C'alal chchapan sbaique, li sca'ique xva'i xcot no'ox, mu malabaj xa'yic.
4Li caretaetique sjip no'ox sbaic tal ta anil ta xoraltic.
Xtal xbatic no'ox ta juretel ta jujujot cuxub o'ntonal ta yut lum.
Tstsan yilel jech chac c'u cha'al c'oc';
xjaplajet no'ox jelovel ta anil jech chac c'u cha'al sacsevul.
5Li ajvalile ta stsob li yajsoldadotac ti lec tsots yo'ntonique,
pero te ta snet'an sbaic ta anil stuquic.
Te ta sjipan sbaic ti c'alal xc'uletic no'ox ta anil ta ba coraltone,
xchi'uc ti c'alal chchapanic li smacubbailique.
6Ta xjaman sbe bu ch-och li uc'umetique,
jech tsoc o li spasubmantal ajvalile.
7Li me' ajvalile chucbil chbat ta yan banamil;
te chchi'in batel li squiarataque.
Te xjutejuteic batel ta oq'uel jech chac c'u cha'al stsumut,
xchi'uc tsmajilan batel sna yo'ntonic.
8Li jnaclumetic ta Ninivee ja' jech chjatovic loq'uel
jech chac c'u cha'al vo' ti c'alal chjat bu ts'anale.
Jech ta xalic:
“Pajanic to, pajanic to”, xiic,
pero me junuc mu'yuc xa boch'o tsq'uel sutel sva'lupat.
9Ich'ic li saquil taq'uine;
tsobic batel li c'anal taq'uine,
yu'un li sc'ulejale mu'yuc slajeb o.
Toj ep c'usitic toj c'upilic sba oy yu'un li Ninivee.
10Jeche' xch'ijan, xocol chcom o, yavnaijem chcom o li lum Ninivee;
ta xbat xch'ulelic ta xi'el, ta xnic yacanic,
ta x'alubic, ta saclich'tajic.
11¿C'uxi ibat li Nínive ti ja' to'ox jech chac c'u cha'al xch'en leonetique?
¿Bu oy li sna ch'ium leonetic ti te to'ox nacal xchi'uc me' leonetic ti mu to'ox stac' sibtasele?
12Li mol leone bats'i ep to'ox la stsac sve'el ta sventa li bic'tal leonetique;
ep c'usitic la smil ta sventa chac'be li me' leonetique.
Solel la snojes to'ox ta ve'lil li xch'ene;
bats'i ep yelec' la stic' ochel ta sna.
Ilaj o li lum Ninivee
13Li Muc'ul Dios ti tspas ta mantal scotol te ta vinajele jech chal:
“A'yo ava'ay, li' xa oyun tal ta acontrainel.
Ta xcac'be sc'ac'al li caretaetic avu'une;
ic'uben no'ox chloc' xch'ayilal cu'un.
Ta jmil ta espada li ch'ium leonetic avu'une;
ta xcac' lajuc sc'oplal ti toj ep chatsac ave'el li' ta banamile;
mu'yuc xa bu chvinaj chc'opoj li j'abteletic avu'une”, xi.
Currently Selected:
Nahúm 2: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.