Juan 5
5
Icol jun vinic aluben yacan te ta Betesda
1Ts'acal to la sta sc'ac'alil yan q'uin cu'uncutic, vu'uncutic li judiouncutique. Jech ibat ta Jerusalén li Jesuse. 2Te ta Jerusalene oy pasbil stanqueal vo' ta nopol sti' li coralton sventa yocheb chijetique. Li stanqueal vo'e Betesda sbi ta hebreo c'op. Te oy noxtoc vo'bej cotcot na ta sti'ti' li stanqueal vo'e. 3Ja' te mochajtic ep jchameletic. Te oy ma'satetic, coxoetic, xchi'uc boch'otic aluben yacanic.#5.3 Li versículo 3b xchi'uc 4 mu'yuc ta texto girego, pero oy versionetic stic'ojic jech chac li'i: Versículo 3b: Te ta smalalic ta xich' yuq'uilanel li vo'e. Versículo 4: Yu'un oy baq'uintic ta xtal ta stanqueal vo' jun yaj'almantal Dios; ja' ta xtal syuq'uilan li vo'e. C'alal chich' yuq'uilanel li vo'e, ja' te ta xbat stic' sbaic ta ora li jchameletique. Li boch'o ba'yuc ta x'oche ta xcol c'usiuc no'ox chamelal yich'oj. 5Te oy jun vinic, vaxaclajuneb xcha'vinic (38) xa jabil stsaquel ta chamel. 6C'alal laj yil Jesús ti te mochole, la sna' ti ep xa jabil jech ip cha'ye, jech la sjac'be:
—¿Me chac'an chacol? —xut.
7Itac'ov li jchamele:
—Quits'in, mu'yuc boch'o oy cu'un ti xu' ta stic'un ochel c'alal ta xich' yuq'uilanel li vo'e. C'alal ta xcac' persa chibate, oy xa'ox boch'o te ochem ta jta —xi.
8Li Jesuse jech laj yalbe:
—Lican, balo batel apop, xanovan —xut.
9Ta ora no'ox icol li vinique. La sbal li spope, ixanov batel. Ja'o sc'ac'alil cuxub o'ntonal ti jech ic'ot ta pasele. 10Li j'abteletic yu'un judioetique jech laj yalbeic li vinic ti colem xae:
—Li'i ja' sc'ac'alil ta jcux co'ntontic. Mu smeloluc ti chavich' batel apope#Neh 13.19; Jer 17.21. —xutic.
11Itac'ov li vinique:
—Li boch'o la scoltaune ja' stuc jech laj yalbun: ‘Ich'o batel apop, xanovan’, xiyutun —xi.
12Jech la sjac'beic li vinique:
—¿Boch'o ti laj yalbot: ‘Balo apop, xanovan’, xayutote? —xutic.
13Li vinic ti colem xae muc xotquin li boch'o icoltavane, yu'un li Jesuse ta ora no'ox icapij ta stojol epal cristianoetic. 14Ts'acal to li Jesuse te la sta ta ch'ulna li vinique. Jech laj yalbe:
—Q'uelavil, colemot xa. Pero mu xa me xasa' amul, yu'un naca me ech'em to chopol c'usi chtal ta atojol —xut.
15Li vinique bat yalbe j'abteletic yu'un judioetic ti ja' icoltaat yu'un li Jesuse. 16Ja' yu'un li j'abteletic yu'un judioetique te lic scontrainic li Jesuse; solel tsc'an ta smilic o ta scoj ti jech la spas ta sc'ac'alil cuxub o'ntonale. 17Li Jesuse jech laj yalbe li j'abteletic yu'un judioetique:
—Li Jtote ta to x'abtej. Jech ta xi'abtej ec li vu'une —xut.
18C'alal laj yal jech li Jesuse, yo'to isoc sjolic o li j'abteletic yu'un judioetique; solel tsc'an ta smilic o li Jesuse. Muc ja'uc xa no'ox ta scoj ti muc xchabi li sc'ac'alil cuxub o'ntonale; ja' ta scoj noxtoc ti laj yal ti ja' Stot li Diose. Yu'un laj xa sco'lajes sba jech chac c'u cha'al Dios.#Jn 10.30-38.
Oy svu'el sventa chac' cuxlejal sbatel osil li Xnich'on Diose
19Li Jesuse jech laj yalbe: “Jamal chacalboxuc ava'yic, vu'un li Xnich'onun Diose mu'yuc c'usi xu' cu'un ta jpas jtuc; ja' no'ox li c'usi tspas chquil li Jtote, ja' jech ta jpas ec. 20Li Jtote lec sc'anojun, ja' yu'un chiyac'bun quil scotol li c'usi ta spase. Ech'em to muc'tic sq'uelubil chiyac'bun jpas. Li vo'oxuque toj ch'ayel chc'ot avo'ntonic yu'un. 21Jech chac c'u cha'al ta xcha'cuxes animaetic li Jtote xchi'uc ti ta xac'be xcuxlejalique, ja' no'ox jechun ec, xu' ta jcha'cuxes li boch'o ta jc'an ta jcha'cuxese; ta xcac'be xcuxlejal ec. 22Yu'un li Jtote muc ja'uc ta xchapan stuc li cristianoetique. Vu'un yac'ojbun jventain xchapanel, vu'un li Xnich'onune. 23Yu'un jech ac'o ich'atcun ta muc', jech chac c'u cha'al ich'bil ta muc' li Jtote. Li boch'otic mu xiyich'icun ta muc' vu'un li xnich'onune ja' mu xich'ic o ta muc' li Jtot ti la stacun tale.
24“Jamal ta xcalboxuc ava'yic. Li boch'otic ta xa'ibun jc'ope, me ta xch'unic li boch'o la stacun tale, oy xcuxlejalic ta sventa sbatel osil. Mu'yuc xa chbat stoj smulic, yu'un icom xa yu'unic li lajele. Ijelovic xa ta sventa cuxlejal. 25Jamal ta xcalboxuc ava'yic, vu'un li Nich'onilune, ta to sta yorail, ta melel ista xa yorail chiya'ibicun jc'op li boch'otic chamenique. Li boch'otic ta xa'yic jc'ope ta xcuxiic. 26Jech chac c'u cha'al oy cuxlejal sbatel osil ta stojol li Jtote; ja' no'ox jech yac'ojbun cuxlejal sbatel osil ta jventa ec. 27Jech noxtoc, yac'ojbun jvu'el sventa chichapanvan, yu'un Xnich'on Cristiano lic'ot. 28Mu me toj ch'ayeluc ta xc'ot avo'ntonic ta sventa ti jech laj calboxuque. Yu'un ta to me sta sc'ac'alil ta xa'ibicun jc'opojel scotol li boch'otic oyic ta smuquinalique. 29Li boch'otic lec c'usi la spasique ta xcha'cuxiic loq'uel sventa chcuxiic sbatel osil. Yan li boch'otic chopol c'usi la spasique ta xcha'cuxiic loq'uel sventa chbatic ta tojob mulil.#Dn 12.2.
Li Jesuse laj yal li boch'otic testigo yu'une
30“Li vu'une mu'yuc c'usi xu' cu'un ta jpas jtuc. Ti c'u x'elan tsc'an chichapanvan li Jtote, ja' jech ta jpas. Tuc' chapanel chcac', yu'un ma'uc ta jpas c'usi lec chca'ay jtuc; ja' ta jpas c'usi oy ta yo'nton li Jtot ti la stacun tale. 31Ti vu'cun no'ox jtuc ta xcal jc'oplale, xu' mu meleluc c'usi chcal ti jechuque. 32Pero oy yan boch'o chiyalbun jc'oplal. Li jc'oplal ta xalbune jna'oj ti ja' melele. 33Jech ec li vo'oxuque laj ataquic ta jaq'uel ta stojol li Juan j'ac'vanej ta vo'e. Li jc'oplal laj yalbune ja' melel.#Jn 1.19-27; 3.27-30. 34Pero mu yu'unuc ja' tsots sc'oplal chca'ay ti cristiano chiyalbun jc'oplale. Ti jech chacalboxuque, ja' no'ox sventa ac'o ach'unic, yu'un jech xu' chacolic. 35Li Juane ja' toj ic'ot avu'unic, jech lec sacjaman laj avilic yu'un. Pero jliquel no'ox lec laj ava'yic li c'usi laj yalboxuque; jliquel no'ox xcuxet avo'ntonic yu'un. 36Li Juane ja' no'ox laj yalboxuc ava'yic jc'oplal. Pero li vu'une ta sventa cabtel ta xac'bun jpas li Jtote ja' ta svinajes ti ja' tacbilun tal yu'une. 37Jech ec li Jtot ti la stacun tale, ja' ta xalbun jc'oplal noxtoc.#Mt 3.17; Mr 1.11; Lc 3.22. Mu'yuc bu ava'yojic c'u x'elan chc'opoj; mu'yuc avilojic c'u x'elan. 38Jech noxtoc me jbeluc sc'op mu xu' chc'ot ta avo'ntonic, yu'un mu xach'unic ti vu'un tacbilun tal yu'une. 39Chaq'uelilanic li sc'op Diose; chanopic ti jech chacuxiic o sbatel osile. Pero li sc'op Diose ja' vu'un te chiyalbun jc'oplal noxtoc. 40Pero mu xac'an xatalic ta jtojol ti jech xu' chacuxiic o sbatel osile.
41“Li vu'une mu ja'uc tal jsa' ich'el ta muc' yu'un li cristianoetique. 42Li vu'une xcotquin c'u x'elan avo'ntonic. Jna' ti mu'yuc ono'ox ac'anojic li Diose. 43Li vu'une talemun ta sventa li Jtote, pero mu xavich'icun ta muc'. Yan me oy boch'o jech no'ox ta xtal ta yo'nton stuque, ja' chavich'ic ta muc'. 44Mu xu' avu'un chach'unic, yu'un ja' no'ox chac'anic ti lec ac'oplalic yu'un li cristianoetique. Mu ja'uc chac'anic ti lecuc ac'oplalic yu'un li Dios ti jun no'oxe. 45Mu me xanopic ti vu'un ta jtic'boxuc amulic ta stojol li Jtote. Li boch'o xu' chc'ot ta jtic'mulil avu'unique ja' li Moisese; ja' li boch'o apatoj avo'ntonic yu'une. 46Ti ach'unicuc c'usi ts'ibabil comel yu'une, chach'unicun ec ti jechuque, yu'un ja' jc'oplal la sts'iba comel li Moisese. 47Me mu xach'unic c'usi ts'ibabil comel yu'un li Moisese, ¿c'uxi xu' chach'unbicun li jc'ope?”, x'utatic yu'un Jesús li j'abteletique.
Currently Selected:
Juan 5: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.