Génesis 32
32
Li Esaue la sta sbaic ta be xchi'uc Jacob
1Li Jacobe lic xanovuc batel noxtoc. Te ital nupatuc ta be yu'un jayibuc yaj'almantaltac Dios.#Sal 34.7. 2C'alal laj yil li Jacobe, jech laj yal: “Li'i ja' yav scarpanaic yu'untac Dios”, xi. Jech Mahanaim#32.2 Mahanaim - Ta hebreo c'op ja' smelol cha'tsob soldadoetic. laj yac'be sbi li banamile.
3Li Jacobe la stac jelovel j'almantaletic yu'un ta Seir ta yosilal li edometique. Yu'un cac bat yalbeic Esaú ti te xa chc'ot li Jacobe. 4Jech i'albatic batel: “Jech xavalbeic li jbanquil Esaue: ‘Li avits'ine jech laj yal tal: Ti c'u xa yepal jabil jloq'uel batele, te jchi'inoj o li Labane. 5Jech oy xa jvacaxtac, jburotac, jchijtac, jmozotac, xchi'uc jquiaratac. Li' ta jtac tal jc'op ta atojol, banquil, yu'un ac'o lecubuc avo'nton ta jtojol’, utic c'otel li jbanquile”, xi laj yal batel li Jacobe.
6C'alal isutic batel li j'almantaletic yu'une, jech c'ot yalbeic li Jacobe:
—Ay xa jc'opancutic li abanquil Esaue. Ta xtal xa snupot stuc; xchi'inoj tal chanib ciento (400) viniquetic —xutic.
7C'alal laj ya'ay li Jacobe, ep ixi'; mu xa junuc yo'nton ic'ot. Jech lic spas ta chavoc' li viniquetic te xchi'uque. Ja' jech la spas noxtoc ta sventa li xchijtac, li xvacaxtac, xchi'uc scamellotaque. 8Jech la snop: “Me tal stsac ta pleito Esaú li jvoq'ue, xu' ja' chjatovic batel ta anil li jvoq'ue”, xi la snop. 9Jech te lic sc'opan Dios: “Muc'ul Dios, vo'ot Diosot yu'un li jmoltot Abrahame xchi'uc li jtot Isaaque, vo'ot ti laj avalbun ac'o sutcun batel ta cosilal yo' bu oyic li cuts' calaltaque, xchi'uc laj aval ti lec chic'ot avu'une, 10mu'yuc c'usi la jpas ti jech oy ep slequil avo'nton ta jtojole, ti lec c'usi chapas ta jtojole. C'alal ech' jtuch' li uc'um Jordane, mu'yuc c'usi quich'oj; ja' no'ox jun jnamte' quich'oj. Pero li' ta orae, oy xa cha'voc' jvinictac. 11Avocoluc mu me xavac' ochcun ta sc'ob li jbanquil Esaue. Yu'un chixi' me chtal stsacun ta pleitoe, jech ta smil li antsetique xchi'uc li ololetique. 12Vo'ot laj avalbun ta jamal ti lec chic'ot avu'une. Xchi'uc laj avalbun noxtoc ti ta to xbol ep jmomnich'nabtaque, ti ja' jech yepal chbatic jech chac c'u cha'al yi'tic ta ti'nab ti mu stac' atele”,#Gn 22.17. xi la sc'opan Dios li Jacobe.
13C'alal i'och ac'ubale, ivay li Jacobe. Ta scotol li c'usitic yich'anoj tale, lic st'ujbe smotonin li sbanquile, ja' li Esaue. 14La st'uj chib ciento (200) ta cot me' tentsunetic, jtob (20) ta cot tot tentsunetic, chib ciento (200) ta cot me' chijetic, jtob (20) ta cot tot chijetic, 15lajuneb xcha'vinic (30) ta cot me' camelloetic ti naca to voq'uem yolique xchi'uc li yalabe, cha'vinic (40) ta cot me' vacaxetic, lajuncot ch'ium tot vacaxetic, jtob (20) ta cot me' buroetic, xchi'uc lajuncot tot buroetic. 16Ta jujuchop la svoc'an loq'uel; laj yac'be ta sc'ob li smozotaque. Jech laj yalbe:
—Jelovanic batel ta ba'yucbe. Mu me xacap abaic; ta svoc'olvoc'ol xaxanovic batel —xut.
17Li boch'o ba'yuc la stac jelovele, jech laj yalbe batel:
—C'alal me laj anup ta be li jbanquil Esaue, me jech ta sjac'bote: ‘¿Bu chabat? ¿Boch'o avajval? ¿Boch'o yu'un scotol li c'usitic avic'anoj tale?’, me xayutote, 18jech xatac'be: ‘Esaú, ja' amoton yu'un li avits'in Jacobe. Li avits'ine le' xa xtal ta ts'acalpat cu'uncutique’, uto —xi li Jacobe.
19Ja' no'ox jech laj yalbe batel ec li xcha'voc'al la stac jelovele, xchi'uc li yoxvoc'ale, xchi'uc li boch'otic te nabalic batel ta spat jujutsobe. Jech laj yalbe:
—C'alal me laj anupic ta be li Esaue, ja' no'ox me jech xavalbeic ec. 20Jech xavalbeic noxtoc: ‘Li avits'in Jacobe le' xa xtal ta ts'acalpat cu'uncutique’, utic —xi.
Yu'un li Jacobe jech la snop: “Ja' van jech ta jlajesbe o sc'ac'al yo'nton ti ta jtacbe jelovel smoton ta ba'yucbee. Ts'acal me laj quil jbacutique, ta jc'opan stuc. Xu' lec xa chisc'opanun”, xi la snop. 21Ja' jech la stac jelovel ba'yuc li matanaletique; yan li stuque te to icom vayuc jvoy ta scarpana.
Li Jacobe la stsal sbaic xchi'uc jun yaj'almantal Dios
22Te no'ox ta yac'ubalil ilic li Jacobe. La sjelubtas batel ta jot ti' uc'um Jaboc li chib yajniltaque, xchi'uc li chib squiaraique, xchi'uc li buluchib (11) xnich'nabe. 23Xchi'uc la sjelubtas batel scotol noxtoc li c'usitic oy yu'une. 24C'alal stuc xa icom li Jacobe, oy jun vinic la stsal sbaic xchi'uc sbejel ac'ubal c'alal to isacub osil. 25C'alal laj yil ti muc stsal yu'un Jacob li vinique, la stijbe ta majel sts'acalil scub, jech toj bichc'ujel no'ox ic'ot scub li Jacob c'alal ja'o sts'otetique. 26Li vinique jech laj yalbe li Jacobe:
—Coltaun, yu'un ta xa sacub li osile —xut.
Itac'ov li Jacobe:
—Me mu'yuc chavac'bun bendicione, mu'yuc chajcoltaot —xi.
27—¿C'usi abi? —xi la sjac' li vinique.
—Jacob jbi —xut.
28Li vinique jech laj yalbe:
—Mu xa ja'uc Jacob ta xcom abi. Israel#32.28 Israel - Ta hebreo c'op ja' smelol la stsal sbaic xchi'uc Dios. xa abi ta xc'ot, yu'un laj atsal abaic xchi'uc li Diose xchi'uc li cristianoetique; tsalbil ic'ot avu'un#Gn 35.10. —xi.
29Li Jacobe jech la sjac':
—Albun ca'ay c'usi abi ec li vo'ote —xut.
Itac'ov li vinique:
—¿C'u yu'un ti chajac'bun jbie? —xi.
Li vinique te laj yac'be bendición li Jacobe. 30Li Jacobe Peniel#32.30 Peniel - Ta hebreo c'op ja' smelol sat Dios. laj yac'be sbi li banamile, yu'un jech la snop: “Laj quilbe jba lec jsatcutic jchi'uc li Diose, pero muc xicham; cuxulun to”, xi.
31Li Jacobe jeloven xa batel ta Peniel c'alal iloc' li c'ac'ale.#32.31 C'ac'ale - Oy boch'o chalic jtotique. Li scube aluben xa, jech xcoxcun xa ixanov batel. 32Ja' yu'un li smomnich'nabtac Israele mu sti'ic li xch'uxuvil scub c'usi tsmilique yu'un ja' te laj yich' majbel li smoltotic Jacobe. Ja' jech tspasic o c'alal to tana.
Currently Selected:
Génesis 32: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.