1 Pedro 1
1
Patub o'ntonal
1Vu'un Pedroun, yajtacbolalun li Jesucristoe, chabanuc chacalboxuc tal, vo'oxuc ti te puquemoxuc batel#Stg 1.1. ta Ponto, ta Galacia, ta Capadocia, ta Asia, xchi'uc ta Bitinia banamile. 2Vo'oxuc ti t'ujbiloxuc ono'ox yu'un Dios Totil ta sventa ti jech ono'ox snopoje, xchi'uc ta sventa ti laj xa slecubtasoxuc li Ch'ul Espiritue, yu'un jech ac'o ach'unic, ac'o avich'ic lecubtasel ta sventa xch'ich'al li Cajvaltic Jesucristoe. Ac'o ataic ep c'uxubinel xchi'uc ac'o ataic o jun avo'ntonic.
Sc'oplal c'u x'elan li cuxlejal sventa sbatel osile
3Coliyalbutic li Diose, ja' li Stot Cajvaltic Jesucristoe, yu'un toj ep la xc'uxubinutic, laj yac' cha'voc'cutic ta ach' ta sventa ti la xcha'cuxes ta smuquinal li Cajvaltic Jesucristoe. Jech la jta spatubil co'ntontic ti mu xlaj sc'oplale.#Jn 3.3-7; Ro 6.4-13; 1 P 1.22. 4Jech ta xquich'tic li c'usi sc'oplal ja' cu'untic ti chapanbil yu'un Dios te ta vinajel ti mu sna' xc'a'e, ti mu sna' soque, xchi'uc ti mu sna' xlaje. 5Ta sventa xch'unojel avo'ntonic ta stojol Dios, jech ta xchabioxuc ta svu'el yu'un jech xu' chataic li coltael xchapanoje; ja' to chayac'boxuc avilic ta slajebal c'ac'al.
6Ja' yu'un li vo'oxuque cuxetuc no'ox avo'ntonic, ac'o me ep ta chop preva chtal ta atojolic me jech chc'ot ta pasele, pero mu'yuc jal chavich'ic. 7Yu'un ja' sventa chich' q'uelel me oy xch'unojel avo'ntonic. Yu'un li xch'unojel co'ntontique toj lec. Ja' mu sta jech li c'anal taq'uin chich' q'uelel ta c'oq'ue, yu'un sna' xlaj. Yan li xch'unojel avo'ntonic chich' q'uelele, jun yutsil, lec ac'oplalic yu'un; ich'biloxuc ta muc' c'alal chtal li Cajvaltic Jesucristoe.
8Li vo'oxuque ac'anojic xa li Cajvaltic Jesucristoe, ac'o me mu'yuc to avilojic. Li' ta orae ach'unojic xa, pero mu'yuc to chavilic.#Jn 20.29. Ja' yu'un toj xcuxet no'ox avo'ntonic, toj yan sba yutsil chava'yic, mu xa xana' c'usi chavalic. 9Jech chavich'ic li c'usi sc'oplal chataic ta sventa xch'unojel avo'ntonique, ja' ti chacolic sbatel osile.
10Li j'alc'opetic ta vo'onee tsc'an tsna'ic ec, la sjac'beic lec sc'oplal li coltael ti laj yalic comel ti ta amotonic chavich'ique. 11La sjaq'uic lec c'u x'elan, c'usi ora chc'ot ta pasel chich' vocol li Cristo ti i'ac'bat yalbeic sc'oplal yu'un li Espíritu yu'un Cristo te oy ta stojolique, xchi'uc c'u x'elan li slequilal tsta ta ts'acale. 12Li Diose laj yac'be sna'ic ti mu ja'uc ta sventa stuquic li c'usi laj yalique, ti ja' ta aventaic vo'oxuque. Ja' ti laj xa avich'ic albel yu'un li boch'otic ja' yabtel chcholic li Lequil A'yej ta sventa svu'el Ch'ul Espíritu tacbil tal ta vinajele. Li j'almantaletique toj chac ox sq'uel ya'yic ec ti jech chc'ot ta pasele.
Li Diose tsc'an ac'o ach'ubuc jcuxlejaltic
13Ja' yu'un bijanic me, nopic lec li c'usi chapasique. Junuc avo'nton malaic li c'usi sc'oplal chayac'boxuc ta slequil yo'nton Dios c'alal ta xcha'tal li Cajvaltic Jesucristoe. 14Ja' tsc'an jechoxuc jech chac c'u cha'al nich'onil ti lec jch'unej mantale. Mu me xapasic c'usi tsc'an avo'ntonic jech chac c'u cha'al laj apasic ti c'alal mu to'ox xavotquinic Diose. 15Ja' chanbeic stalel li Boch'o laj yic'oxuc ta stojole, yu'un li stuque tuc' yo'nton. Jech tsc'an tuc' scotol c'usi chapasic ec li vo'oxuque. 16Yu'un jech ts'ibabil ta sc'op Dios: “Tuc'uc me avo'ntonic, yu'un li vu'une tuc' co'nton”,#Lv 11.44-45; 19.2. xi ts'ibabil.
17Li vo'oxuque “Tati” me xavutic li Dios ti tuc' chchapan c'u x'elan tspas jun cristianoe, ti mu'yuc tst'uj boch'o chc'uxubine, ich'ic ta muc' ti c'u sjalil chajelovic li' ta banamile. 18Yu'un xana'ic ti smanojoxuc xa loq'uel ta sventa li achopol talelic ti mu'yuc stue, ti ja' la xchanubtasoxuc comel li amoltot ayame'ic ta vo'onee. Xana'ic ti mu ja'uc la stojoxuc o li c'usi sna' xlaje. Muc ta c'anal taq'uinuc, muc ta saquil taq'uinuc la stojoxuc. 19Ja' la smanoxuc o ta xch'ul ch'ich'al li Jesucristoe, yu'un ja' laj yich' milel ta jcojtic jech chac c'u cha'al ch'ium chij laj yich' milel, ti toj leque, ti mu'yuc bu chopole. 20Vo'one ono'ox nopbil c'alal mu'yuc to'ox banamil ti jech chc'ot ta pasele, pero ja' to ic'ot ta pasel ti c'alal po'ot xa slajebal c'ac'ale; ja' sventa alequilalic li vo'oxuque. 21Ja' ta sventa ti laj ach'unic Diose, yu'un li Diose la xcha'cuxes loq'uel ta smuquinal, xchi'uc laj yac'be slequilal yutsilal. Ja' yu'un li vo'oxuque jun avo'ntonic ach'unojic li Diose xchi'uc apatoj avo'ntonic ta stojol.
22Li vo'oxuque pocbil xa avo'ntonic ta sventa ti ach'unojic xa li sc'op Dios ti ja' melele, yu'un chac'anan abaic ta sventa ti achi'il xa abaic ta voq'uel c'oteme. Jech tsc'an j'ech'el chac'anan abaic o ta scotol avo'ntonic xchi'uc ta scotol atsatsalic. 23Yu'un lacha'voq'uic ta ach', pero mu xa ja'uc laj avich'beic sts'unubal li atot ame'ic ti sna' xlaje. Ja' xa sventa li sc'op Dios ti cuxul, ti mu sna' xlaj oe.#Jn 3.3-7; Stg 1.18; 1 P 1.3. 24Yu'un jech ts'ibabil ta sc'op Dios:
“Scotol li cristianoetique ja' jechic jech chac c'u cha'al ts'i'lal.
Li yutsil slequilique ja' jech chac c'u cha'al nichim.
Li ts'i'lale ta xtaquij, li nichime ta xbaj yalel.
25Yan li sc'op Cajvaltique mu sna' xlaj o sbatel osil”,#Is 40.6-8. xi.
Ja' li Lequil A'yej ti laj xa avich'ic cholbele.
Currently Selected:
1 Pedro 1: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.