NEHEMIA 1
1
1Haih dang gas Hakhalia lo Nehemia kuot cho nghuot.
Nehemia, Yerusalem lyis Chiqh
Persia Hwankti zainsmuh Artaxerxes guon zis aiqci vzvn, Yuda lhamhmuh Kislev khyvp lyis ngos Nehemia gas Susa wusmuh mas nyeis. 2Ngah vnoeuh Hanani yahge Yuda dius dvyhamh Yuda mau masyah ngah jyank kwang los. Ngos nyamoq lyis, Babilon mau pheh jonsdoeus loh masyah, Yerusalem pheh tauh los bang cho yahge Yerusalem wus cho nyei. 3Nyamoq ngos lyis taiq kyoh zis gas, Babilon pheh jonsdoeus loh masyah Yuda mau pheh doms los nyeis dah Yuda jens gas svsoh yaukyenh cho xauh zis yahge svbih yah goessang zis xauh nyeis cho nghuot. Hauh thoq lyis Yerusalem wusciank gyop joq shih; wus khomh eq ngeh tyamp buisnyeis mas zis ma doms soq shih cho nghuot. 4Ngos hauh cho xauhgyo lyis svsoh nhaiqngis las tsung ngaus.
Ngos dvkyoh lo cha ma zo ma shuk lo kuk ngaus. Ngos Mangso lhyi shvmanh dung zis gas, 5Yhensain, Maukhung Mangso eh, nvng gas kuhxing lha ngamoq nvng lyis gyukwoms nyeis. Nvng gas nvng lyis jyetdap las Nvng tyingtoh dang lyis domsyos gyo bang yah kuot toh dah thanghchvp lyis chank tyink dyei aq. 6Yhensain eh, ngos lyis yoeuh las ngos dung dang gyo dyei aq. Nah dius Israel jens, nah jyeidwis jens xiklyis nyeih nyenh dung dang lyis jenh gyo dyei aq. Ngamoq Israel jens yaunos kuot goeus oen ngos curhen. Ngah phauh thyeih moq eq, ngos eq yaunos kuot goeus. 7Ngamoq gas nvng lyis tyi lha lhung khyvlyis kuot goeus. Ngamoq nvng tying toh zis ma kuot lo. Nvng ngamoq lyis nah jyeidwis Moshe lhyi yah dyei toh dah lyi ma chank kuot. 8Moshe lhyi yah Nvng taiq kyoh toh cho lhyi gvshih soh dyei aq. Houka, Namoq Israel dius jens lom ma luk nghuot lyis gas ngos namoq lyis gohnyau bang jyank khat sanh tyamp das.#Lew 26.33 9Nghuot laus eq namoq ngah jyank doms los las ngos tyingtoh dang lyis domsyos gyo nghuot lyis gas, we thank nyeisjvng vthang mha jweh nyeis laus eq ngos lyis paiq das xiklyis khyen toh dah mau mas doms xwih tsainh toh das ge zis nghuot.#Lyi 30.1-5
10 Yhensain eh, Haih bang gas nvng nah kuh thank yomsoq yahge yom yah khyuot yoeus toh dah nah dius, nah jyeidwis jens nghuot. 11Ngos shvmanh dung dang lyis eq, Nvng lyis phauh nyang dah nah jyeidwis jens dah shvmanh dung dang lyis eq jenh gyo dyei aq. Khvnyhik ngos lyis ung cho dyei aq. Hwankti zainsmuh lyis, ngos lyis nhaiqnyen das cho jenh dyei aq, ge dung.
Hauh yoq lyis ngos gas hwankti zainsmuh dah zvbiq dyei jyeidwis nghuot.
Currently Selected:
NEHEMIA 1: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.