MIKHA 1
1
1Yuda hwankti jens Yotham, Ahaz, Hezekia moq zaih lyis Moreshet wus mas dah Mikha lhyi Yhensain haih loeus dyei. Yhensain ka hai Samari yahge Yerusalem cho dvnganh Mikha lhyi phank xoeuq.#2Hw 15.32—16.20, 18.1—20.21; 2Ss 27.1-7, 28.1—32.33
Samari, Yerusalem lyis Kuk
2Dius nyau jens dvnganh eh, haih zis gyo geh.
Nyeisjvng thoq mas nyeis bang dvnganh eh haih zis kamp gyo geh.
Yomzains Yhensain ka nvng yah tyi lha kanghjyoeng kat das.
Gyo geh! Nyang gas nyah maukhung yhenmuh masyah taiq nyeis.
3 Yhensain ka nyah gyingshang joqyos masyah los nyeis.
Nyang gyoh los las bomsthyoh jens thoq mas suh loh das.
4Boms jens gas nyah o mha nyi mas dyomanh yaus teh yaus tyamp das.
Hauh zis langhkhau mha,
jing mas jeis yaus gyoh teh, yaus gyoh das.
5Israel dius jens Mangso lhyi tyi lha gomloeus toq las yaunos kuot gvng mas hai dvnganh bweh los das. Israel jens gomloeus toq cho ka hank lyis yobos huon das lah? Samari wusmuh nyang ma nghuot lhyeh? Yuda mas phvra paiq dah yobos hank bos? Yerusalem nyang ma nghuot lhyeh? 6Housoeh las Yhensain taiq, Ngos Samari wus lyis, jangpa mha dyoq gyoh boms joq nhang das. Zvbiq khyam tsungh joqyos kuot das. Hau wus dah lukjvp jens lyis langhkhau mha huot khyoq las wus dah vpom lhyi phant thuq das. 7Nyah phauhdap phvra dvnganh vdyis vmons khyop tyamp zis xauh las yhenmuh nghe nyhiq phauh dyei dah vyhang dvnganh lyis nyi yah mhont tyamp das. Nyah gungs lho dvnganh lyis thyoq boms joq das. Samari wus gas haih vyhang lhyi phvra paiq cho yah xo coeu toh. Gvshih gas nyah jeswus jens yah yhenmuh nghe nyhiq xiklyis yoeus loh das.
8Hauh thang lhyi Mikha taiq zis gas, Haih gvng mas ngos kuk las kaiq ngaus das. Ngos kuk cho lhyi chixoeuq das zis ngos khyei chen, shoh chen suh yenh das. Ye khuih oeu teh oeu lha gola-u nghoq teh nyings das. 9Samari dah dvm ma yoh gis los, Yuda eq dvyhangteh xauh kham bah ge. Dyoqbis cho ka ngah dius jens nyeis dah Yerusalem wus khomh mas jweh joq.
Yerusalem mas Jeswus jweh
10Gat wus mas, yah jeswus jens lyis yang somh cho vtaiq goh; namoq ngaus zis nyamoq lyis vnyvng nhang goh. Bet Leaphra wus mas dius jens eh, tsohmop boms mas lhoeuh zis yah namoq yom gyau cho chixoeuq geh. 11Shaphir wus mas bang eh, shohchen xoqphuh zis yah jonsdoeus loh geh. Zanan wus mas nyeis bang eh, nyamoq wus masyah vwomh thuq los goh. Bethezel dius jens kuk zis namoq xauhgyo lyis houmha phang khaugus ma bos zis seq das. 12Yhensain ka dyoqbis zainsmuh Yerusalem nvm mas she jweh los goeus yvmvyah Marot#1.12 Marot ge dah vjyuk gas khoh ge zis nghuot. dius jens gas chiqh zis yah pangh cho langh nyeis. 13Lakhish Phung mas nyeis bang eh, jes lhyingh mas nyang tsain tap geh. Nvng gas Yuda mas Israel jens lyis phvra paiq yaunos mas chank loh nhang dah cangxeih wus nghuot. Housoeh Yerusalem lyis yaunos shwih kuot. 14Gvshih Yuda dius jens eh, Moreshet Gat wus lyis jeshuh toh khoq aq. Israel hwankti jens gas Akzib#1.14 Akzib ge zis gas mhuih ge dah vjyuk nghuot. wus masyah pangh cho ma yoh lo das.
15Moresha#1.15 Zan ung soeu. dius jens eh, Yhensain namoq lyis namoq wus lyis los nyhik das jeswus loq mas kyauh das. Israel uhshe bang gas Adulam luk-uk mas loh tsain tamh das.#1.15 Lvpe taiq. 16Yuda dius jens eh, namoq jyetdap loshang jens xiklyis cam thyet tyamp las kuk geh. Namoq loshang jens gas namoq masyah shwih jons loh das yvmvyah namoq nyang lvngda teh tyauh tyamp geh.
Currently Selected:
MIKHA 1: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.