YOBA 1
1
Satan Yoba lyis Shi yoeuh
1Uza mau mas Yoba ge dah vbusbih dvyuk nyeis. Nyang gas Mangso lhyi paiq soeu, nyang lyis lomluk soeu nghuot. Nyang gas dius gis nghuot las ma gis zis ma zangh kuot das zis zaih. 2Nyang loloeu nyhet yuk, lonyi somh yuk yoh. 3Nyang yvng nyhet khyoengh, gola-u somh khyoengh, noeulu oengxo kya, luzoe zains oengxo yoh. Uhkung jens nyoshoq yoh las, buisthuq mau mas dis thank soeu nghuot.
4Nyah loloeu jens gas, hank eq hank toeuq toh, nyah buisnyeis lyis nyah yhen mha pwe dvgeh gyangh tsain kuot las nyamoq nhamhmuh somh yuk lyis eq khi khi kuot. 5Pwe dvlhain dye khanghmuh Yoba gas nvp lyis noq yah toq las nyah lo jens dvyuk dvyuk xiklyis phudyei zis yah cheihshang cho kuot dyei. Nyang haih cho vjangh kuot dyei: khasoeh ge lyis nyah lo jens dvyuk yuk Mangso lhyi zangh nhoengh zis yah yaunos kuot mvbeh ge nghamh.
6Maukhung mha bang Yhensain xikkhonh mas los thuq xoeuq nyeih lyis Satan eq nyamoq yah dvgeh houmha bos los.#Vpm 6.2 7Yhensain ka Satan lhyi, Nvng khalhye yah los, ge nyei.
Satan toeuh zis gas, Nyeisjvng thoq mas kwang yenh masyah jweh los, ge.
8 Yhensain ka Satan lyis nyei, Nvng ngah jyeidwis Yoba lyis vsoh yoeuh lah? Nyeisjvng mas nyang teh gis las lomluk zis hank ma bos. Nyang ngos lyis paiq, ma gis zis ma kuot das xiklyis jhank, ge.
9Satan phuk taiq zis gas, Yoba nyang cha ma yoh lo lyis nvng lyis paiq das lah?#Nyoq 12.10 10Nvng, nyang lyis eq, nyah yhenbang lyis eq, nyang sain zis dvnganh lyis eq vjangh gomh toh dyei. Nyang kuot zis dvnganh lyis eq nvng shvmanh dyei, nvng nyang lyis noeu luk shoq dyei las hauh mau mas dvmau gonh dyingh los. 11Nghuot laus eq gvshih nvng nyang yoh zis dvnganh yoeus tyamp dyei oen goh, nyang nah xikkhonh mas nvng lyis nhoengh das, ge.
12 Yhensain Satan lyis taiq. Nghuot goeus, nyang yoh ya yoh zis dvnganh nah loq khau mas nghuot. Yoba dah gungs lyis gas vnos nhang, ge. Housoeh las Satan thuq khoq.
Yoba Lo jens, Zisyos Monh loh
13Dvnyeih gas, Yoba lo jens, nyamoq dah mang muh yhen mha pwe kuot nyeis lyis, 14loeus kyoh dvyuk Yoba jyank mas wuih jweh las taiq. Ngamoq noeulu jens lyis yah yos phuk nyeis. Mauhlyihzoe gas vnvm mas dah katjang mas nyeis. 15Sabean bang nyetlos nyettant los zan las gaunyhauq komp loh; jyeidwis jens yuk khanghmuh lyis eq sat khoq, ngos kyingh dvnyet lo. Nvng lyis los kyoh das zis ngos dvyuk kyingh dvphang luiq los lo, ge.
16Nyang ma dye taiq shih lyis gohtoeu jyeidwis dvyuk los las taiq, Maunyoq zangh las yvng yahge yvng yoeuh bang dvnganh lyis sat goeus. Nvng lyis los kyoh das zis ngos dvyuk kyingh dvphang luiq los lo, ge.
17Nyang ma dye taiq shih lyis, gohtoeu jyeidwis dvyuk jweh los las taiq, Khalde bang jes somh dvp ngamoq lyis los zan las gola-u komp loh, nah jyeidwis jens dvnganh lyis eq sat, ngos kyingh dvnyet lo: nvng lyis los kyoh das zis ngos dvyuk kyingh dvphang luiq los lo, ge.
18Nyang ma dye taiq shih lyis gohtoeu jyeidwis dvyuk jweh los las taiq, Nah lo jens gas nah lobes yhen mha pwe kuot nyeis lyis, 19mhanhdyvp masyah lyeismuh jyang los las, hauh zis yhen lhyi muot khyoq yvmvyah, nyamoq dvnganh lyis sat goeus. Nvng lyis los kyoh das zis ngos dvyuk kyingh dvphang luiq los lo, ge.
20Hauh uhlyis Yoba gas toq las kuk zis yah nyah dyimis langchuiq, uhyuk las nyeisjvng mas gop las paiq. 21Nyang taiq, Ngos khoeu los lyis cha ma bos los, ngos cha ma bos bos shei loh das. Yhensain dyei las gvshih nyang doms yoeus tyamp goeus. Nyah nyings chungh zis xauh bas jungh, ge.
22Yoba gas hounyhoq bweh laus eq Mangso lhyi yobos huon zis yah yaunos ma kuot.
Currently Selected:
YOBA 1: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.