MATHE 5
5
Boms Thoq mas Jyauh
5.1—7.29
1Dius moqjens nyvng lyis nyang boms thoq mas doq loh. Nyang tsung toh lyis nyah changlo jens nyah jyank mas los. 2Hauh uhlyis nyang nyamoq lyis jyauh zoh lyis yah taiq zis gas,
Jyoeng dah Pyo Cho
(Luk 6.20-23)
3Dyos mas shohjyen nyeis cho lhyi soh bang gas ngelhoq:
Khasoeh ge lyis maukhung munghdan gas nyamoq zis nghuot.
4Kukxi bang gas ngelhoq:#Esa 9.1-2
Khasoeh ge lyis nyamoq gas nhaiqtaink zis xauh das.
5Ehnyet noeuh nhamp bang gas ngelhoq:#Chd 37.11
Khasoeh ge lyis nyamoq gas nyeisjvng lyis vso vlho xauh sain das.
6Dan cho lhyi yuot shet bang gas ngelhoq:#Esa 55.1-2
Khasoeh ge lyis nyamoq jo los das.
7Nhaiqnyen shoh seqgyo bang gas ngelhoq:
Khasoeh ge lyis nyamoq gas nhaiqnyen shohgyo zis xauh das.
8Nhaiqlom gyingshang bang gas ngelhoq:#Chd 24.3-4
Khasoeh ge lyis nyamoq gas Mangso lhyi nyvng das.
9Mehoq tamp bang gas ngelhoq:
Khasoeh ge lyis nyamoq lyis Mangso dah lo jens ge lui das.
10Dan cho gvng mas shoeuhshih zis xauh bang gas ngelhoq:#1Pt 3.14
Khasoeh ge lyis maukhung munghdan gas nyamoq dah munghdan nghuot.
11Ngah gvng mas svbih yah namoq lyis jwangh las shoeuhshih zis yahge ma ying khyvlyis tyi vja ja xo zis xauh lyis namoq ngelhoq.#1Pt 4.14 12Gaus geh svsoh gauslaus geh, khasoeh ge lyis maukhung mha namoq lyis phauh shangh zis gas svsoh kuh. Khasoeh ge lyis namoq xik mas dah lvpe jens lyis eq nyamoq houyah dvyhangteh shoeuhshih goeus, ge.#2Ss 36.16; Lgy 7.52
Coh yahge Bvng zis
(Mak 9.50; Luk 14.34, 35)
13Namoq gas nyeisjvng dah coh nghuot: nghuot laus eq coh gas ngvm zis bi tyamp goeus ya, hauh zis lyis khasoeh doms yoh ngvm nhang das lah? Nghe pheh doeuh tyamp las svbih yah nang nheh das zis masyah lai las cha eq yhung pvjus lo. 14Namoq gas mungkvn dah bvng zis nghuot: jing thoq mas kuot toh dah wugungs lyis hank eq ma yoh gos shung toh.#Yoh 8.12, 9.5 15Nyibung lyis tuonh las dang yah hank ma tsungh lhunk toh; dvyhen gonh yah nyvng das xiklyis nyibung gus mas dvgyangh tuonh kih toh.#Mak 4.21; Luk 8.16, 11.33 16Housoeh las svbih gas namoq dah gis muhzoh lyis nyvng las, maukhung thoq mas namoq Uwus lyis chungh bas jungh, dius xikkhonh mas namoq dah bvng zis lyis pank dyei geh.#1Pt 2.12
Lyi Cho Jyauh
17Ngos gas Moshe dah lyi yahge lvpe jens dah dang lyis lhoeu thyoq das xiklyis lyih oen vnghamh goh. Ngos gas lhoeu thyoq das xiklyis lyih zis ma nghuot, nyuk los nhang das xiklyis dvlyih. 18Khasoeh ge lyis ngos namoq lyis jyoengh taiq bah, maukhung yahge nyeisjvng lai loh laus eq, hauh lyi mas sauhchvp ngis dvkoeuq, dvzoq eq ma nyuk nyuk, i loh das zis ma nghuot.#Luk 16.17 19Housoeh yvmvyah tyingtoh dang mas vtsihlo dvkoeuq lyis ma chank chank, svbih lyis housoeh jyauh nghuot lyis gas, maukhung munghdan mas hauh soeu lhyi ngis thank soeu ge lui das. Nghuot laus eq chank las jyauh soeu lhyi ka, maukhung munghdan mas kuh soeu ge lui langh das. 20Ngos namoq lyis taiq zis gas, Namoq dah dan cho ka Pharishe jens yahge lyi svra jens dah dan cho thoq lyis ma zes lyis gas, namoq munghdan mas jyoengh ma xauh wvng das.
Nhaiqyo Cho Jyauh
21Dius vsat, sat soeu hank laus eq soetuon zis xauh das, ge gohnhamp yah taiq toh zis namoq xauhgyo goeus.#Dyu 20.13; Lyi 5.17 22Ngos namoq lyis taiq bah: Dvyuk yuk nyah vmang vnoeuh lyis shohyos gungs mas nhaiqyo nghuot lyis gas, soetuon zis xauh das. Nyah vmang vnoeuh lyis, Nvng teh zis ge taiq soeu hank laus eq nhaiqbos huom dah soetuon zis xauh das. Nvng koh, ge sang soeu ka munyi thomh mas jweh das. 23Housoeh yvmvyah hauh phon mha nvng nah jyungshuk chi e uhlyis, nah vmang vnoeuh yah nvng lyis yobos dvja ja huon chank bos lyis, nvng hauh uhlyis yoh nghamh soh lyis gas, 24Hauh zis lyis phon xik mas toh khoq las, nah vmang vnoeuh yah shih cangxeih loh taiq tamp goh aq. Hauh thang lhyi lyih las nah jyungshuk lyis phudyei aq.
25Nvng lyis zau kauq soeu yah cho mha dvgeh nghuot shih lyis, hauh soeu yah lvnyap taiq tamp goh aq. Housoeh ma nghuot lyis gas nvng lyis soetuon soeu jyank mas kyauh das. Soetuon soeu nvng lyis pyada lyis kyauh las, nyang gas nvng lyis thung khyoq das. 26Ngos namoq lyis jyoengh taiq bah, thang thank thunkcent kyvp ma dye cap dvchank, nvng hou mhayah yoh thuq los das zis ma nghuot.
Nyi Lvng Shuot zis Tung
27Nyi shuot lvng vshuot ge gohnhamp dah bang taiq zis lyis namoq xauhgyo ku goeus.#Dyu 20.14; Lyi 5.18 28Nghuot laus eq ngos namoq lyis taiq zis gas, Vmesbih lyis nyetnau zis yah yoeuh soeu hank eq nyah ehnyet mas hauh vmesbih yah nyi shuot goeus. 29Housoeh las nah loqyos nyoqjeih yah nvng lyis shuot nhang lhyi, hauh yvlyis thuiq tyamp aq. Nvng nah dvgungs gonh lyis munyi thomh mas khyoq kat zis xauh das thoq lyis nah gungsdoeus dvkoeuq dyoq das zis gas nah xiklyis zes gis.#Mat 18.9; Mak 9.47 30Nah loqyos loq yah nvng lyis shuot nhang lhyi, hauh yvlyis thyet doeuh tyamp aq: Khasoeh ge lyis nvng nah dvgungs gonh lyis munyi thomh mas khyoq kat zis xauh das thoq lyis, nah gungsdoeus dvkoeuq dyoq das zis gas nah xiklyis zes gis.#Mat 18.8; Mak 9.43
Gang Goh Cho Jyauh
(Mat 19.9; Mak 10.11-12; Luk 16.18)
31Nyah yhensain nyhiq lyis she tyamp mes soeu hank laus eq, nyang lyis kangh maussauh lhaih dyei bas jungh, ge dah dang eq joq.#Lyi 24.1-4; Mat 19.7; Mak 10.4 32Nghuot laus eq ngos namoq lyis taiq zis gas, Hank laus eq yauxi zis za ma nghuot lyis gas, yhensain nyhiq lyis she tyamp soeu hank laus eq, nyang lyis lvng shuot nhang zis nghuot. Hauh vmesbih lyis nyihwank yoeus soeu eq nyi shuot zis nghuot.#Mat 19.9; Mak 10.11-12; Luk 16.18; 1Kr 7.10-11
Maukhi Cho Jyauh
33Tsai, Namoq ma jyoeng khyvlyis mau vkhi. Nvng Yhensain lhyi maukhi zis yah dvyhangteh yoh nyuk los das ge gohnhamp bang taiq khoq zis lyis namoq xauhgyo ku:#Lew 19.12; Gyu 30.2; Lyi 23.21 34Nghuot laus eq ngos namoq lyis taiq zis gas, Mau khi nyang vkhi goh. Maukhung yah mau vkhi goh: khasoeh ge lyis hauh zis gas Mangso dah tank nghuot.#Yak 5.12; Esa 66.1; Mat 23.22 35Nyeisjvng yah eq mau vkhi goh: houka Mangso dah nangte nghuot. Yerusalem yah mau vkhi, houka hwankti zainsmuh dah wus nghuot.#Esa 66.1; Chd 48.2 36Nah uhloms yah mau vkhi, nvng nah cam dvkhvt yangh thyoeu bas jungh, noq bas jungh ge ma yoh kuot. 37Nvng taiq dang mas, nghuot lyis gas nghuot, ma nghuot lyis eq ma nghuot, oen bas jungh: dang hei mhayah lai zis cha eq ma gis masyah los.
Gis zis yah Ung Chah
(Luk 6.29-30)
38Nyoqjeih xiklyis nyoqjeih, zwis xiklyis zwis, dvm jyen cap, ge taiq khoq dah dang gas namoq xauhgyo ku.’#Dyu 21.24; Lew 24.20; Lyi 19.21 39Nghuot laus eq ngos namoq lyis taiq zis gas, Ma gis soeu lhyi ma gis zis vdoms phuk. Nah loqyos bvlot tyuk dyei soeu lhyi gohtoeu dvshot eq lhaiq dyei shih aq. 40Dvyuk yuk nvng lyis zau kauq las nah dyi yoeus mes soeu lhyi nah thoq dyi eq yoeus nhang shih aq. 41Nvng lyis cho dvmain tsoengh loh nhang lhyi, nvng nyang yah dvgeh aiq main loh aq. 42Nvng lyis sang soeu lhyi dyei aq; nah jyank masyah jyeih nghoh mes soeu lhyi jyeih dyei aq.
Jeswus lyis Jyetdap Chah
(Luk 6.27-28, 32-36)
43Nvng nah yhenkyoh lyis jyetdap las, nah jeswus lyis hoeng aq, ge taiq zis lyis namoq xauhgyo ku.#Lew 19.18 44Nghuot laus eq ngos namoq lyis taiq zis gas, Namoq dah jeswus lyis jyetdap geh. Namoq lyis shoeuhshih bang lyis shvmanh dung dyei geh. 45Housoeh lyis namoq gas maukhung mha nyeis, namoq Uwus dah lo jens duot das: khasoeh ge lyis nyang gas ma gis bang yahge gis bang thoq mas nyah buis lyis tso nhang lha, dan bang yahge ma dan bang thoq mas mau dvyih wus dyei nhang. 46Namoq lyis jyetdap bang lyis kyingh namoq jyetdap lyis chah phauh shangh zis yoh das lah? Khoengh khywi bang eq housoeh gas kuot ma nghuot lhyeh? 47Namoq dah vmang vnoeuh lyis kyingh jeshuh lyis gas gohnyau bang thoq lyis cha zes lah? Khoengh khywi bang eq housoeh gas kuot ma nghuot lhyeh? 48Housoeh las maukhung mha namoq dah Uwus gas dyinghjet zis yah dvyhangteh namoq eq dyinghjet nyeis geh.#Lew 19.2; Lyi 18.13
Currently Selected:
MATHE 5: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.