Hebreos 1
1
Sinia' pak iyoyi ji'niayija' pa jlas ti i'yasts'e
1Ti pajk'i, Sinia' je ijwienjliyiji ka ji'lij je inwenatajam'ni papo sitise'l t'ipi, ti ijliuyi'ni papo jijwejlanawos. Po' japa jloma ti 'wena iyone ti ji'lij iwijna'm. 2'Nakayi siu'niwa jlomas yi' jlaja, jlas pak iyoyi ji'niayija' ti i'yasts'e. 'Yina je 'wena 'neje paka intajlate siuti ilisanayi 'ni ajnat siu'neje ni poli, wikie'eyi niwa wask'i'nelaja ti ti'wena, 'yina naka'ne ni siunie yikiajle ti jakimita niwak wask'i'nelaja. 3Jla'am ti jla'al ti 'esi' pak Sinia', jla'yi ti nak jipe'el pa Sinia' siupa k'iejliyi. 'Yina jlam'neje ti 'yitk'i pijia'm wikie'eyi niwa wask'i'nelaja, ti isiene niwak jlamtis ti jijweye po'.#Jn 1.1-3; Col 1.15-17 Ti itimayi siukia iyo kia jikijmaye ti initiajnat sik'ioye kiwa soski'layis, sekyi'i yiyeje'n 'niji poliyi jijweyeje yi'i pa Sinia' ti iyo anechiyasa' ti wuj.
Sinia' jlas t'a'n ape'e papo injlojwajnas poli jlele
4Sinia' jla'am ti 'yajnat ape'e napo jijliujwajnas poli jlele pa jlas ni jijweye iyo, jak je iyoyiji siunie iyone ni jle' ti yikiajle ti iyo anechiyasa' 'yaka'm ape'e siuniwa jleyis iyoyi pit. 5Kajeyepa ti je ti'wena wek ka Sinia' kiak iwone ka ne'yi pa napo jijliujwajnas poli jlele:
“A'm ti yajts'a'm.
Siu'niwa jlomas 'yaka ti Anak'i'm.”#Sal 2.7
Ni'ne ka poye pa injlojwanik poli jlele ka Sinia' iwone'ate:
“Ja yama ti ja Jiniayek'i'm,
jlam pet ti jla'am ja yasa'.”#2 S 7.14
6Jak je iyoyiji siuti 'yakajanitia'm napo i'nio' yi'i 'ni ajnat, siu'neje napo poli jlele pet ni jlas ti iniajnat, iyone'ne 'ate:
“Wikie'eyi siunapo ijliujwajnas poli jlele,
'esiji ka wunitie.”#Deut 32.43; Sal 97.7
7Jlam pet ti ijwi'il napo injlojwajnas poli jlele, Sinia' iyo'ate:
“Niwak a'yejnap pet siuniwa jlajwu'ul napoka ijliujwajnas poli jlele,
jla'yi ti siunapo ikawos a'yejnap pet siuniwa jwatis ti yat'ik'i.”#Sal 104.4
8'Yina jlam pet ti ijwilt'ipi pet ni jlas iyo'ate:
“Sinia' ja ke paja ka int'ekiyi ti jawo anechiyasa',
jak je iyoyiji siunie akijmaye iyo tijnajyi.
9Jlemi'n ni siunie ijiatk'i, 'yina jlam pet siunie je 'es ine'waja'm pet.
It'imina ti aki'ma'm siuti ya'am ti Anak'i'm,
siunie anikanitiejeye ti asa'yi atepe'e 'yaka'm ape'e ni iyo napo 'ajajnajwas.”#Sal 45.6-7
10Iyo 'neje 'ate:
“A'm ti jit'it pijia'm 'ni ajnat, 'ni Ika'niona, tajlap'e ti 'nelanjie'e,
siu'neje ti a'm ti alesanik ni poli.
11'Yina wikie'eyi niwaka ja netia'n,
'yina jlam pet ti a'm ja ke paja ka inetia'n.
Jano'we janwo'ate siunie lotakinie ti ji'niayi je itio'yi.
12¡Jajot wita'm ti jawone 'ate siunie lotakinie ti totie wita'm,
jawo'ate siunie ti iliejni pi ji'wu' ink'ie' pi 'yuts'i!
Siuti a'm je paj ka 'eki, jajnok'i'ni ti a'wasankiye po'.”#Sal 102.25-27
13Je ti'wena pa Sinia' ka kiak iwone ka ne'yi paka jijliujwanikie' poli jlele ka wone 'ate:
“Wejen 'nijiye ijwiyeje,
jayi'n akiajwe napo atajiejwas.”#Sal 110.1
14'Yina, ¿tent'i napoka injlojwajnas poli jlele, tepit'i iyo siupa jikijmaye? Awo'ate napoka siunapo Sinia' jikawos ti ijliuyi napo i'nio' ti ja jikimita siojona injwajieti ka noyeje.
Currently Selected:
Hebreos 1: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.