1 Tesalonicenses 1
1
Pablo itijwile papo Sinia' jilis
1Asampey i'lijwas ti Sinia' jilists'ase'm, ti jleye'yi jana Tesalónica.#Hch 17.1-10,13 Ya'am Pablok'i'm, ya'yi ni sikiecha Silvano,#1.1 Silvano: Silas jle' kiecha, tiwonat'iyiji'nipe pet siunie ti yi'i ni Hechos 15.22—18.5 (1.1). Timoteo 'neje, sa'am sip'esinik siu'nie ajlok'iase. Asa'am ti jini'nopijietayi wita'm pa Sinia', jla'yi pa Saka'niona Jesús ti Sijwajieti.
'Esiji ka Sinia' imp'elisina', jla'yi ti jane'yi asap.
Jitienkiujnieye ti ijiatk'i papo Tesalónica jlele
2Ti awokieta ts'ajlayeja', sitiej awunitie'ase'ijyi, sekyi'i ti sinikanitiejeye awenajayi'iji pi Sinia' astepe'e. 3Siuti ijiate ti jikimayi ni astankiujnieye ti 'es, je pini' siuniwa askijmayejes ti isis niwa jitiajlayija'm. 'Yina siuti jikimayi ni asemijnaye, wuj ti jinilankinieyi ni askijmaye. Siuti ijiate ti jikajanitie ni jinijijwiyejyink'iye pi Saka'niona Jesús ti Sijwajieti, ijiate nak it'imina ti jini'netieyi, ejlowek ti wuj ti jinilayitieyi pi k'iejli ti aswet'iayeta. Ti a jitieyi'i pa Sinia', je paj ka sikiwaliyi'i niwak siuniwa isis ti jiwoyeyi.
4I'lijwas, wuj ti 'nama'ase pa Sinia', jla'yi ti je kast'ayiji'n ti Sinia' jla'am ti isi'mase'm. 5Siuti anamaye'asejepi niwa Sinia' jlamtis ti isis, je 'nakata, siu'neje ki iyo ni jijweye jana Sinia' jikimet ti 'es, 'yaka ti ijiatk'i jla'am. Mejla'ala ka je 'najanayi siunie ti iyo ti si'wena ti a'yasap, kajeyepa ti ajalasa pet ask'ioye pa ka 'nisisieyi. 6Asa'am je wet'ianayi kajeyepa jiwoyeyi siunie aniwonaja pit, siu'neje ni iyo ni Saka'niona. 'Yina ti jikima'yi ilia'm niwa Saka'niona jlamtis, it'imina ti wuj ti jinilayitieyi siuniwa iyo'nase napo a'lejwas ti yi'nase'm,#Hch 17.5-9 'yina asjweye poye wek k'iye, kajeyepa siunie asnikanitieyi jitiajlayiji jana Sinia' jikimet ti 'es. 7Jak je iyoyiji'ni siunapo Sinia' jilis yijits'i niwa ajnatis, yiji jana Macedonia, siu'neje jlaja Acaya, ti i'wina siunie jiwoyeyi, 'yina kiak iniwonayisi pit, iyo siunie jiwoyeyi. 8Asa'am ti it'imina ti yamaja'neje niwa Sinia' jlamtis iyoye'ate iyo ni jla'lap ni wikinie ti pesieje wikie'eyi ape'e ni ajnat. Je napokata napo Macedonia siu'neje napo Acaya jlele ka injie'yase siunie jiwoye ti jiwoyeyi ni inamtik, ti je jikakiuye pa Sinia'. Siunapo i'nio' yijits'i niwa ajnatis kia'iyo pajk'i ti 'yijene pi iyo'nase, it'imina ti kiak awoyi ti awo'ate, 'wanjliyi ka je iyok saka'niyejayi. 9Siukia awoniji'ni ti pajk'i ti 'yijene pi iyone, jitiej iyunitisk'i'ni ti ajo'wasepi ijwi'il ti ijiate ti 'es ti jiki'm selia'm, siu'neje ni ijwilis ti jiliyeyi kiwa aska topa ti jiwunitie. Naka 'neje jla'am ti jik'iuyi pi Sinia' ti je jikakiuye ti ijiate jla'm ti Sinia' ti ji'wasankiye po', jla'yi ki jiwoyeyi ti jlonitie jla'am. 10Kia'iyo injwela ti jinijijwijyink'iye pi jlas pi Sinia', ti janapimet ti jantal poliyi. Paka Saka'niona Jesús ti Sinia' jlam ti iniujwat kisie'e ti tajli pa a'no'. Jesús paka ti kas'manit, kajeyepa ti ajwayeje siunie Sinia' jiwak siunie jana'am.
Currently Selected:
1 Tesalonicenses 1: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.