2 Reyes 17
17
Jin Samaria soc ac'bot yijq'uitay slumal israeletic
1Slajchayebal ja'wil yochel ta muc' ajwalil ta Judá a te Acaz, och ta muc' ajwalil ta Israel te Oseas snich'an Ela. Jalaj ta muc' ajwalil baluneb ja'wil ta Samaria. 2Pero te yat'ele ma lecuc ta sit te Cajwaltic, manchuc me ma mero sta jich te bit'il yantic muc' ajwaliletic te neel c'axique.
3Te Salmanasar, muc' ajwalil yu'un Asiria, ba yac'bey guerra te Oseas. Te Oseas och ta abatinel soc bayal buelta c'anbot spatan yu'un te muc' ajwalil yu'un Asiria. 4Pero chicnaj ta stojol Salmanasar te yac ta xchapel sc'op Oseas ta scontroinel, te sticunej swinictac ta stojol So, ja' te muc' ajwalil yu'un Egipto, soc te ma ba yacalix yaq'uel taq'uin swenta te jujun ja'wile. Ja' yu'un la yal mandal te Salmanasar te ya stsaquic te Oseas, soc te ya yaq'uic ta cárcel. 5La yochintay spisil te q'uinale, soc la yac'beyic guerra te Samaria. Jalaj oxeb ja'wil te guerra yu'unique. 6Ta sbalunebal ja'wil yat'el ta muc' ajwalil a te Oseas, te muc' ajwalil yu'un Asiria ju' yu'un te la yu'unin Samaria. Te israeletic chucul la yic' bael ta Asiria, c'o yac' nainicuc ta sq'uinal Halah, soc ta ti'ti'ja' Habor te muc'ja' te ay ta sq'uinal Gozán, soc ta lumetic yu'un te medoetique.#Dt 4.27-28; 28.36.
7Jich c'ot ta pasel, melel ja'ic nix te israeletic te la sle smulic ta stojol Cajwaltic te Dios yu'unique, te ic'otic loq'uel tel ta Egipto yu'un, soc te coltayotic ta sc'ab te muc' ajwalil yu'un Egipto, ja' te faraón. Yu'un och xch'uunic lotil diosetic. 8Ja' la st'unbeyic te scostumbre te nacionetic te ch'ojbotic loq'uel ta stojolic yu'un Cajwaltic, soc te bitic la sjach spasel te muc' ajwaliletic ta Israel.
9Soc xan te israeletique, loc' ta yeic amen c'op ta swenta scontroinel te Cajwaltic te Dios yu'unique, soc la spasic toyol ch'uunjibaletic ta spisil lumetic yu'unic, ta toyol ts'ajc' yu'un iljibal q'uinal, soc nix ta lumetic te joybilic ta ts'ajq'ue. 10Soc la sjachic ch'ultesbil tonetic, soc sloc'omba Asera ta jujun toyol witsetic, soc ta ye'tal muc'ul te'etic te ay bayal sc'ab soc bayal yabenal.#1 R 14.23. 11La xchiq'uic pom tey a, melel ja' la st'unbeyic te scostumbre te nacionetic ch'ojbotic loq'uel ta stojolic yu'un te Cajwaltique. Mero amen xan bitic la spasic, jich la sjachbeyic yilimba te Cajwaltique. 12La xch'uunic loc'ombaetic te mero jc'axel combilic yu'un Cajwaltic te ma ba ya xch'uunique.#Ex 20.3-5; Dt 5.7-9.
13Ta swenta spisil ta jchajp j'alwanejetic, albotiquix yu'un Cajwaltic a te israeletic te yacuc sujt'es yo'tanic yu'un te amen be st'unojique, te ja'uc ya yaq'uic c'otuc ta pasel te mandaliletic, soc te bi chapal yu'un, soc spisil te p'ijtesel te la yac'bey te antiguo sme'-static ta swenta te abatetic yu'une. 14Pero ma ba la yich'ic ta muc', mero tulan la yac' sbaic, jich nix te bit'il anima sme'-static te ma ba la yac' smuc'ul yo'tanic ta stojol te Cajwaltic te Dios yu'unique. 15Ja' la xch'aybeyic te mandaliletic yu'un Cajwaltic, soc te c'op xchapoj soc te antiguo sme'-statique, soc te smandal albotic yu'une. La st'unic diosetic te ma'yuc sc'oplale, ja' nix jich ma'yuc swentail bajt'ic yu'un. Ja' la st'unbeyic stalel te nacionetic ayic ta spat-xujq'uic, manchuc me ja' te bi combilic ta spasel yu'un te Cajwaltique. 16La xch'aybeyic spisil te mandaliletic yu'un te Cajwaltic te Dios yu'unique. La spasic cheb alal toroetic ta ultesbil bronce,#1 R 12.28. soc sloc'omba Asera, soc la to xch'uunic te spisil te eq'uetic ta ch'ulchan, soc la xch'uunic te Baal. 17Soc la xchiq'uic te squerem-nich'anic soc te yantsil-nich'anique, soc bajt'ic ta stojol te mach'atic ay bila ya sna'ic syoljoltayele.#Dt 18.10. Mero jun yo'tanic la yac' sbaic ta spasel te bitic amen ta sit te Cajwaltique, jich la sjachbeyic yilimba.
18Te bit'il jich c'ote, te Cajwaltic ilin yo'tan ta stojol Israel, jich jc'axel la xch'oj loq'uel ta stojol. Ja' xanix la yijq'uitay te sts'umbal Judá. 19Pero ni ja'uc Judá la yac' c'otuc ta pasel te mandaliletic yu'un Cajwaltic te Dios yu'unique. Ja' nix la st'unic te bitic la spasic te Israele. 20Ja' yu'un te Cajwaltic la sloq'ues ta stojol te patil alnich'anetic yu'un Israel, la yac' pejc'tsajuc ta sc'ab eleq'uetic, asta jc'axel la sloq'ues ta stojol. 21La sloq'ues ta stojol te sts'umbal David te Israel, ja' muc' ajwalil c'ot yu'unic te Jeroboam te snich'an Nabat, te ja' la yac'bey yijq'uitay te Cajwaltic te israeletique, te jich la yac'bey staic smulic ta stojole. 22Jich la spasic te bi muliletic la spas te Jeroboam, ma ba la yijq'uitayic. 23Ja' slajibal c'ot te loq'uesotic ta stojol yu'un te Cajwaltic te Israele, chucul ic'otic bael ta Asiria, jich nix te bit'il yaloj ta swenta te j'alwanejetic te abatetic yu'une. C'alal ora tey ayic a.
Och yan yajwal sq'uinal Samaria
24Te muc' ajwalil yu'un Asiria la yic' bael ants-winiquetic ta Babilonia, Cuta, Ava, Hamat soc Sefarvaim, c'o yac' ta nainel ta lumetic yu'un Samaria, swenta sjelol c'ot yu'un te israeletique. Jich la yu'uninic te Samaria soc nainic tey ta lumetic yu'unique. 25Pero ma ba la xch'uunic te Cajwaltic te ants-winiquetic te ochic ta nainele, ja' yu'un te Cajwaltic ticunbotic tel león-chojetic, ay milotic yu'un. 26Ja' yu'un ba yalbeyic te muc' ajwalil yu'un Asiria:
—Te ants-winiquetic la awic' bael ta lumetic yu'un Samaria ta nainel, ma sna'ic bit'il ay ta ch'uunel te dios yu'un te q'uinale. Ta scaj te ma sna'ique, ja' yu'un ticunbotic tel león-chojetic te yacalic ta milel yu'une —xiic c'oel ta stojol te muc' ajwalile.
27Ja' yu'un te muc' ajwalil yu'un Asiria jich la yal mandal:
—Ticunaic bael jtuluc sacerdote te tey nix la awiq'uic tel ta chuquel, swenta yu'un ya me xbajt' ta nainel tey a, soc ya me x'ac'bot snopic yu'un te bit'il ay ta ch'uunel te dios yu'un te q'uinale —xi'.
28Ja' yu'un jtul te sacerdote te tey nix yic'ojic tel ta chuquel ta Samaria, bajt', c'ot ta nainel ta Betel. Ac'bot snopic yu'un te bit'il ay ta ch'uunel te Cajwaltique. 29Pero ta juju-jchajp ants-winiquetic la spas sdiosic tey ta juju-jpam lum te banti nainemique. La yaq'uic tey ta toyol ch'uunjibaletic te pasbil jilel yu'un te samariaetic ta neelal toe. 30Te talic ta Babilonia la spasbeyic sloc'ombail Sucot-benot. Te talic ta Cuta la spasbeyic sloc'ombail Nergal. Te talic ta Hamat ja' la spasbeyic sloc'ombail te Asima. 31Te talic ta Ava ja' la spasbeyic sloc'ombail te Nibhaz soc Tartac. Te talic ta Sefarvaim la xchiq'uic scojt'ol ta c'ajc' te snich'nabic swenta smajt'an Adramelec soc Anamelec, te ja' diosetic yu'unique. 32Soc la xch'uunic uuc te Cajwaltique, pero la sleic sacerdoteetic yu'unic ta yolilic nix, swenta yu'un ya me x'at'ejic ta toyol ch'uunjibaletic. 33Ja' yu'un, manchuc me ya xch'uunic te Cajwaltic, pero puersa yacalic xch'uunel te diosetic yu'unique, chican te bi costumbre ay yu'unic tey ta nacionetic te banti ticunotic loq'uel tele.
34C'alal ora jich yacalic ta spasel te bit'il la spasic ta nameye, ma ba ya xch'uunic te Cajwaltique. Ma jichuc ya spasic te bit'il ay te mandaliletic yu'un soc te bila chapal yu'une, soc ni ja'uc la st'unic te bila ay ta nopele, soc te bila mandal la yal te ya yaq'uic c'otuc ta pasel te patil alnich'anetic yu'un Jacob, ja' te Israel la yac'bey sbiiline.#Gn 32.28; 35.10. 35Te c'alal la xchap sc'op soc te Cajwaltique, jich albotic mandal: “Ma me xach'uunic yantic diosetic, ma me xaquejan abaic ta stojol, ma me xawac' abaic ta abatinel swenta bit'il ya awac'beyic milbil smajt'an.#Ex 20.5; Dt 5.9. 36Jo'on me xach'uunonic te jo'on Ajwalilon te Dioson awu'unique,#Dt 6.13. te la quiq'uex loq'uel tel ta Egipto ta smuc'ul yutsilal cu'el. Jo'on nax me ya ach'uunonic, soc ya me aquejan abaic ta jtojol, soc ya me awac'bonic milbil jmajt'an. 37Soc junuc me awo'tanic xawaq'uic c'otuc ta pasel te mandaliletic soc te bitic chapale, te bitic ayic ta nopel soc te bitic jmandal ts'ibubil la cac'beyexe. Ma me xach'uunic yantic diosetic. 38Ma me xch'ay ta awo'tanic te c'op chapal cu'un ta atojolique. Ma me xach'uunic yantic diosetic. 39Jo'on nax me ya ach'uunonic te Ajwalilon te Dioson awu'unique. Jich me jo'on ya jcoltayex ta sc'ab a te acontroique”, xi' sc'oplalic.
40-41Te jaychajp nacionetique ma ba la yich'ic ta wenta, melel ja' nix la spasic bael te bila la spasic ta neelal toe. La xch'uun te Cajwaltique, soc ja' nix jich la squejan sbaic ta stojol te loc'ombaetic cuybilic ta Diose. Te patil alnich'anetic yu'unique ja' nix jich la spasic te bit'il anima sme'-statique. C'alal ora jich yacalic ta spasel.
Currently Selected:
2 Reyes 17: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.