1 Reyes 22
22
Micaías la yal te ya yich' tsalel Acab
(2 Cr 18.1-34)
1C'ax oxeb ja'wil ma'yuc guerra yu'unic te Siria soc te israeletique. 2Pero ta yoxebal ja'wil, te Josafat muc' ajwalil yu'un Judá ba yula'tay te muc' ajwalil yu'un Israel. 3Te muc' ajwalil yu'un Israel jich la yalbey te j'at'eletic yu'une:
—Ana'ojic te cu'untic te lum Ramot ta sq'uinal Galaad. Lec ay jiche, ¿bi yu'un ma ba ya jletiquix bi ya jpastic yu'un a te ya jpojbeytic ta sc'ab te muc' ajwalil yu'un Siria yu'unineje? —xi'.
4Patil la sjojc'obey te Josafat:
—¿Ya bal ac'an ya ajoinon ta yaq'uel guerra ta lum Ramot-ta-Galaad? —la yut.
La sjac' te Josafat:
—Jo'on soc te soldadoetic cu'un soc te caballoetic cu'un, ya me joinat ja'at soc te awinictaque, 5pero neel ya sc'an ya yich' jojc'oyel te Cajwaltic teme jich ya sc'an yo'tane —xi'.
6Te muc' ajwalil yu'un Israel la stsob j'alwanejetic te jteb ma sta jbajc' ta jtule. La sjojc'obey ta spisilic:
—¿Ya bal xju' ya cac'bey guerra te lum Ramot-ta-Galaad, o ma xju'? —xi'.
La sjaq'uic:
—Ac'beya guerra, te Cajwaltic ya me yac'bat ta ac'ab —xiic.
7Pero te Josafat la sjojc'o:
—¿Ma bal ayuquix j'alwanej yu'un Cajwaltic te ya xju' ya jojc'obeytic? —xi'.
8Te muc' ajwalil yu'un Israel jich la yalbey te Josafat:
—Ay jtul xan te ya xju' ya sjojc'obotic ta stojol te Cajwaltique, ja' te Micaías te snich'an Imla. Mero ma jmulanbey sc'op, melel ma'yuc bi ora ya yalbon te bila leque, puro ma lecuc te bila ya yalbone —xi'.
Pero jich albot yu'un te Josafat:
—Ma xawal jich —xi' sc'oplal.
9Te muc' ajwalil ta Israel ora la yic' tel jtul mach'a yich'oj at'el, la spas bael ta mandal:
—Ac'a taluc ta ora te Micaías snich'an Imla —la yut.
10Te muc' ajwalil yu'un Israel soc te Josafat te muc' ajwalil yu'un Judá slapoj te sc'u'-spaq'uic swenta ajwalil, nacajtic ta smuc'ul nactijibic te pamanbil ta yochibal te lum Samaria. Spisil te j'alwanejetic yacalic ta c'op ta stojolic. 11Te Sedequías snich'an Quenaana la spasix xulubiletic pasbil ta taq'uin, jich la yal ta aw:
—¡Jich yaloj te Cajwaltic: “Ja' soc in xulubil to ya me awac'bey guerra te siriaetic, ja' to teme laj spisil awu'un!” xi' te Cajwaltic —xi' ta aw.
12Spisil te yantic j'alwanejetic jich yacal yalelic uuc. Jich la yalbeyic te muc' ajwalile:
—Ac'beya guerra te lum Ramot-ta-Galaad, ya me awaiy tsalaw, melel ya me yac'bat ta ac'ab te lum te Cajwaltique —xiic.
13Te abat c'o yic' tel Micaías, jich la yalbey:
—Spisilic te j'alwanejetic yacalic ta yalel te lec ya xc'ot te muc' ajwalile, ma'yuc mach'a ma jichuc ya yal. Ja' yu'un, wocoluc, jich ni me xc'opojat te bit'il yantic, yacuc me awal uuc te lec ya xc'ot te muc' ajwalile —xi'.
14Te Micaías la sjac':
—Jamal ya cal ta stojol te Cajwaltic te ja' nax ya cal te bila ya yalbon te Cajwaltique —xi'.
15C'ot ta stojol te muc' ajwalile, jojc'obot yu'un:
—Micaías, ¿ya bal xju' ya cac'beytic guerra te lum Ramot-ta-Galaad, o ma xju'? —la yut.
Te Micaías la sjac':
—Ac'beya guerra, ya me awaiy tsalaw, melel ya me yac'bat ta ac'ab te Cajwaltique —xi'.
16Pero te muc' ajwalil jich la yal:
—¿Jayeb to buelta ya calbat te ja' nax ya awalbon ta jamal te bila melel ta stojol te Cajwaltique? —la yut.
17Te Micaías jich la yal:
—Quiloj ta spisil te israeletique
pujq'uemic bael ta witstiquil,
jich te bit'il chijetic#Nm 27.17; Mt 9.36; Mr 6.34.
te ma'yuc jcanan yu'unique.
Jich yaloj te Cajwaltic:
“Ma'yuc yajwalic,
ta juju-jtul lamal yo'tan ac'a sujt'uc bael ta sna”,
xi' te Cajwaltique —xi'.
18Te muc' ajwalil yu'un Israel jich la yalbey te Josafat:
—¿Yu'un bal ma la calbat jiche te ma'yuc bi ora ya yalbon caiy te bila lec te winique? Ja' nax puro amen te bi ya yalbon caiye —xi'.
19La yal xan te Micaías:
—Ja' yu'un te bi la awalixe, aiya me awaiy te sc'op Cajwaltic: La quil te Cajwaltic nacal ta smuc'ul nactijib, soc la quilbey spisil te ch'ul abatetic ta ch'ulchan, tec'ajtic ta sts'eel ta swa'el soc ta xq'uexen. 20Te Cajwaltic la sjojc'o mach'a ya xba stijbey jajch'el yo'tan te Acab, swenta yu'un ya xba yac'bey guerra te lum Ramot-ta-Galaad soc tey ya xlaj a. Ay yantic la yalic yan c'op, soc yantic yan bi la yalic. 21Pero ay espíritu te c'o stejc'an sba ta stojol Cajwaltic, la yal te ja' ya spas stuquel. Te Cajwaltic la sjojc'obey bi ya yut ya spas. 22Te espíritu la yal te ya yac'bey yalic lot ta yeic spisilic te j'alwanejetic yu'un te muc' ajwalile. Te Cajwaltic la yal te jich ya xju' ya slo'laye, ac'a ba spas. 23Yo'tic tey me ya ana'ix te Cajwaltic yac'ojbey espíritu yu'un pas-lot ta yeic spisilic te j'alwanejetic awu'une, melel ay ta yo'tan te Cajwaltic te ya sjinat ta jc'axele —xi' te Micaías.
24Te Sedequías snich'an Quenaaná noptsaj bael ta sts'eel te Micaías, c'o yac'bey majel, jich la yalbey:
—¿Banti la yijq'uitayon te Espíritu yu'un Cajwaltic swenta yu'un ya sc'oponat te ja'ate? —xi'.
25La sjac' te Micaías:
—Ya me ana' te bi c'aalil ya xjajch'at ta anac'bel aba ta nanatic —xi'.
26Ja' yu'un te muc' ajwalil yu'un Israel la yal mandal, jich la yal:
—Tsacaic te Micaías, ic'aic bael ta chuquel ta stojol Amón te jwentainwanej ta lum, soc ta stojol Joás te jnich'ane. 27Albeyaic te jo'on ya cal mandal te ya yaq'uic ta chucjibal, soc ac'a yac'beyic swe' taquin waj soc jteb nax ja', ja' to te c'alal buen lec ayon a ya sujt'on tale —xi'.
28La to yal xan te Micaías:
—Teme buen lec ya sujt'at tel, yu'un nix ma ja'uc c'opoj loq'uel ta co'tan a te Cajwaltic abi —xi'.
29Jich yu'un te muc' ajwalil yu'un Israel soc te Josafat te muc' ajwalil yu'un Judá, ochic ta yaq'uel guerra te lum Ramot-ta-Galaad. 30Te muc' ajwalil yu'un Israel, jich la yalbey te Josafat:
—Te jo'one ya me jyanajtes jba te ya x'ochon ta guerra. Yan te ja'ate ja' me ya alap te ac'u' swenta ajwalil —xi'.
Jich la syanajtes sba te muc' ajwalil yu'un Israel, och ta guerra. 31Pero te muc' ajwalil ta Siria la yalbey mandal te lajchayeb xcha'winic (32) capitanetic yu'un carretaetic te ma me yanuc mach'a ya yac'beyic, ja' me ac'a smilic te muc' ajwalil yu'un Israel. 32C'alal te capitanetic yu'un carretaetic la yilic te Josafat, ja' la scuyic a te muc' ajwalil yu'un Israel, la sjoytayic ta ora. Pero te Josafat awun, la sc'an coltayel. 33C'alal la yilic te ma ja'uc te muc' ajwalil yu'un Israel, la yijq'uitayic jilel.
34Pero jtul soldado jich nax la st'im bael te yat'ejibal st'imalte', ja' ejch'entesot swenta lajel a te muc' ajwalil yu'un Israel, yu'un buen toj c'ot ta banti jamal te smajq'uile. Ja' yu'un la spas ta mandal te jtij-carreta yu'une:
—Suta aba soc te carreta, ic'awon loq'uel ta yolil te guerra, yu'un ejch'enajonix ta jc'axel —xi'.
35Mero tulan c'ot te guerra ta sjunal c'aal. Te muc' ajwalil la spas tulan te la stejc'an sba ta scarreta ta stojol te siriaetique. Pero c'alal mal c'aal bael, laj te muc' ajwalil yu'un Israel. Te xch'ich'el yac ta oc ta yutil scarreta. 36C'alal mal c'aal, jich pujc' ta alel ta stojol te soldadoetic: “Juju-jtul ac'a bajt'uc ta slumal soc ta slum-sq'uinal, 37melel lajix te muc' ajwalile”, xiic.
Jich yu'un te muc' ajwalil la yich' iq'uel bael ta Samaria, tey la smuquic a. 38Patil la spoquic te carreta ta estanque yu'un ja' ta Samaria te banti ya x'atinic te jmulawil antsetique. Te xch'ich'el Acab, lec'bot ta ts'i'etic, jich nix te bit'il yaloj te Cajwaltique.#1 R 21.19.
39Te jayeb xan sc'oplal te Acab soc spisil te bitic la spase, soc te sna ch'albil ta marfil, soc te lumetic la sjache, ts'ibubil ta libro yu'un yat'el muc' ajwaliletic ta Israel. 40C'alal laj te Acab, ja' jil ta sjelol ta muc' ajwalil te snich'ane, ja' te Ocozías.
Yat'el Josafat, muc' ajwalil yu'un Judá
(2 Cr 20.31-37)
41Ta xchanebal ja'wil yochel ta muc' ajwalil ta Israel a te Acab, te Josafat snich'an Asa och ta muc' ajwalil ta Judá. 42Ay jo'lajuneb xcha'winic (35) ya'wilal a. Jalaj ta muc' ajwalil ta Jerusalén jo'eb xcha'winic (25) ja'wil. Azuba sbiil te sme'e, yantsil-nich'an Silhi.
43Te Josafat buen toj la yac' sba, jich nix te bit'il te Asa te state. Spisil te bitic la spase, buen lec ta sit te Cajwaltique. Pero te toyol ch'uunjibaletic, te banti ya yac'beyic milbil majt'aniletic soc ya xchic'beyic pom te loc'ombaetic te lume, ma ba la sloq'ues stuquel.
44Te Josafat la xchap soc te muc' ajwalil yu'un Israel te ya slamantesic q'uinal. 45Te jayeb xan sc'oplal soc te bitic yantic bayal yutsil la spase, soc guerraetic la spas, spisil ts'ibubil ta libro yu'un yat'el muc' ajwaliletic yu'un Judá. 46Te Josafat jc'axel la sten loq'uel ta sq'uinal Judá te mach'atic ya spasic mulil ta sbaq'uetalic ta swenta yich'el ta muc' te loc'ombaetic te ay to jilemic ta yorail te Asa, ja' te state. 47(Ta Edom ma'yuc muc' ajwalil, ja' nax jtul jwentainwanej tey a.)
48Te Josafat la spas barcoetic, jich te bit'il te barcoetic yu'un Tarsis, swenta yu'un ya xba yich' tel oro ta Ofir. Pero ma ba ju' yu'unic te bajt'ique, tey nax lajic ta Ezión-geber te sbarcoique. 49Ja' yu'un te Ocozías snich'an Acab la yalbey te Josafat te yacuc sticun swinictac te ja' ya sjoin sbaic ta beel soc ta at'el ta barco soc swinictac Ocozías, pero te Josafat ma ba la sc'an.
50Laj te Josafat, la yich' muquel ta Lum-yu'un-David, te ja' sts'umbale. Ja' och jilel ta sjelol ta muc' ajwalil te snich'ane, ja' te Joram.
Yat'el Ocozías, muc' ajwalil yu'un Israel
51Ta juclajuneb ja'wil yochel ta muc' ajwalil ta Judá a te Josafat, och ta muc' ajwalil ta swenta Israel ta Samaria te Ocozías, te snich'an Acab. Cheb ja'wil jalaj ta muc' ajwalil. 52Amen bi la spas ta sit Cajwaltic, yu'un ja' la st'unbey te sbol at'el sme'-state, soc nix te sbol at'el te Jeroboam te snich'an Nabat, te la yac'bey sta smulic te israeletique. 53Soc la yac' sba ta abatinel ta stojol te Baal, la xch'uun, jich nix te bit'il la spas te state. Jich la yac' ilinuc te Cajwaltic, te Dios yu'un Israel.
Currently Selected:
1 Reyes 22: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.