MATEO 1
1
Jesucristopaj ñaupa taitacunapaj shuticunami
(Luc. 3:23-38)
1Cai quilcashcapica, Jesucristopaj ñaupa taitacunapaj shuticunatami quilcashca tiyajun. Jesucristoca, taita Davidpaj, taita Abrahambaj miraimi carca. 2Abrahamga, Isaac shuti churitami charirca. Isaac runaca, Jacob shuti churitami charirca. Jacobca, Judá shuti churitapash, paipaj huauquicunatapashmi charirca. 3Judá runaca, Tamar huarmihuanga, Fares shuti, Zérah shuti churicunatami charirca. Fares runaca, Esrom shuti churitami charirca. Esrom runaca, Aram shuti churitami charirca. 4Aram shuti runaca, Aminadab shuti churitami charirca. Aminadab shuti runaca, Naasón shuti churitami charirca. Naasón shuti runaca, Salmón shuti churitami charirca. 5Salmón shuti runaca, Rahab shuti huarmihuanga, Booz shuti churitami charirca. Booz shuti runaca, Rut huarmihuanga, Obed shuti churitami charirca. Obed shuti runaca, Isaí shuti churitami charirca. 6Isaí runaca, jatun mandaj Davidpaj taitami carca. Davidca, Salomón shuti churitami charirca. Salomonbaj mamaca, Urías shuti runapaj huarmimi carca.
7Salomón runaca, Roboam shuti churitami charirca. Roboam shuti runaca, Abías shuti churitami charirca. Abías shuti runaca, Asa shuti churitami charirca. 8Asa shuti runaca, Josafat shuti churitami charirca. Josafat runaca, Joram shuti churitami charirca. Joram runaca, Uzías shuti churitami charirca. 9Uzías runaca, Jotam shuti churitami charirca. Jotam runaca, Acaz shuti churitami charirca. Acaz shuti runaca, Ezequías shuti churitami charirca. 10Ezequías runaca, Manasés shuti churitami charirca. Manasesca, Amón shuti churitami charirca. Amón shuti runaca, Josías shuti churitami charirca. 11Josías runaca, Jeconías shuti churitami charirca. Jeconías runaca, ashtahuan shuj huauquicunatapash charircarami. Paicuna causanajui punllacunapimi Israelcunaca, Babilonia llactaman prezu apai tucunajurca.
12Babilonia llactaman apai tucushca jipami, Jeconías runaca, Salatiel shuti churita charirca. Salatiel runaca, Zorobabel shuti churitami charirca. 13Zorobabel runaca, Abiud shuti churitami charirca. Abiud shuti runaca, Eliaquim shuti churitami charirca. Eliaquim runaca, Azor shuti churitami charirca. 14Azor shuti runaca, Zadoc shuti churitami charirca. Zadoc runaca, Aquim shuti churitami charirca. Aquim shuti runaca, Eliud shuti churitami charirca. 15Eliud runaca, Eleazar shuti churitami charirca. Eleazarca, Matán shuti churitami charirca. Matán shuti runaca, Jacob shuti churitami charirca. 16Jacobca, José shuti churitami charirca. Paimi, Mariapaj cusa carca. Chai Mariami, Jesuspaj mama carca. Paimi, Cristo shuti carca.
17Taita Abrahammanda callarishpa, taita Davidcaman ricujpica, tucuimandaca chunga chuscu miraicunami carca. Taita Davidmanda callarishpa, Babilonia llactaman prezu apai tucushca punllacamambash, chunga chuscu miraicunallatami carca. Shinallata, Babilonia llactaman prezu apai tucushca punllamanda, Cristo huacharimui punllacaman ricujpipash, chunga chuscu miraicunallatami carca.
Jesucristo huacharishcamanda
(Luc. 2:1-7)
18Jesucristo huacharimunaca, cashnami carca: Paipaj mama Mariaca, Josehuan cazarangapami ari nishca carca. Josehuan nara cazarajpillatami, jucha illaj Diospaj Espíritu paipajman shamujpi, vijsayu tucushca carca. 19Shina cajpimi, paipaj cusa tucuna Joseca, alitalla ruraj caimanda, Mariata ama pingaichingapa, upallamanda saquishalla yarijurca. 20Chaita yarijujpimi, Mandaj Diospaj angelca, muscuipi ricurishpa Josetaca cashna nirca: “Davidpaj mirai José, ama manllashpa Mariataca cambaj huarmi cachun cazarailla. Paica, jucha illaj Diospaj Espíritu paipajman shamujpimi vijsayu tucushca. 21Paica, shuj jari huahuagutami ungunga. Chai huahuagutaca, JESÚS shutitami shutichina cangui. Paica, paipaj llacta gentecunata, juchamanda quishpichina cashpami, chashna shutita charinga” nircami.
22Tucui caicunaca, Jatun Dios yarichijpi profeta villashca pactachunmi chashna tucurca. Paica cashnami nirca:
23“Jarihuan nara ima tucushca cuitsagumi, vijsayu tucushpa,
shuj jari huahuaguta ungunga.
Paipaj shutica, Emanuelmi canga” nircami.
Emanuel nishpaca: “Taita Diosca ñucanchihuanmi” nijunmi.
24José rijcharishpaca, Mandaj Diospaj ángel imashna paita mandashcashnami, Mariataca paipaj huarmi cachun cazararca. 25Shina cashpapash, punda churiguta ungungacaman Joseca na tacarircachu. Chai huahuagutaca, JESÚS shutitami shutichirca.
Currently Selected:
MATEO 1: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.