Apocalipsis 1
1
Te bin la yac' ta na'el te Jesucristo
1Ha te bin la yac' ta na'el te Jesucristo, te a'bot sna' yu'un Dios scuenta yu'un ya ya'be sna' te a'batetic yu'un te bintic c'ohel yac ta pasele. Ha la yac' ta na'el ta scuenta te ch'ul a'bat yu'un te la sticon tal ta stojol Juan, te ya'bat, 2te la yal ta testigo-c'op te sc'op Dios soc te bin la yal ta testigo-c'op te Jesucristo, ta spisil te bintic yiloje. 3Bayel me yutsil te mach'a ya yil soc te ya ya'iy ha'i sc'op-jalwanej ini, soc te ya yac' ta yo'tanic te bintic ts'ihbalambil tey a, como nopol ya xc'ohtix ta pasel.
Spatil-o'tanil ta stojol te huqueb iglesiahetic
4Juan, ta stojol te huqueb iglesiahetic te ayic ta Asia: Ich'ahic te yutsil-o'tanil soc lamal q'uinal yu'un te mach'a ay ta ora ini, te ay ta namey soc te ya xtale, soc te huqueb espírituhetic te ayic ta stojol te smuc'ul-huctajib, 5soc yu'un te Jesucristo, te testigo te stalel jun yo'tan, te ba-nich'anil te cha'cuxaj tal ta yohlil mach'atic chamenic soc te ha jcuentahinwanej yu'un te ajwaliletic ayic ta bahlumilal.
Ayuc me yutsilal soc yu'el sbahtel q'uinal te mach'a la sc'uxultayotic soc te la yac'otic ta libre yu'un te jmultic ta scuenta sch'ich'el, 6soc te la yac'otic ta ajwalil soc ta sacerdotehil ta stojol Dios te State. Hichuc.
7¡Ilawil! yac ta talel ta tocal;
spisilic ya me yilic,
soc nix te mach'atic la slowique;
soc spisil ta chahp ants-winiquetic ta bahlumilal
ya me yoq'uetay sbahic ta scuenta.
Lec ay. Hichuc.
8Ho'on te Alfa soc te Omega,#1.8 Alfa: shahchibal letra ta griego; Omego: slajibal letra ta griego. te shahchibal soc te slajibal, xchi te Cajwaltic Dios, te mach'a ay ta ora ini, ta namey soc te ya xtale, ha te Dios te spisil ya xhu' yu'une.
Te Juan a'bot yil bin yilel te Nich'anil
9Ho'on te Juan, awermanohon soc jmohlol jbahtic ta wocol, ta cuentahinel yu'un Dios soc te jun co'tantic yacotic ta smahliyel ta scuenta Jesús; ayon ta Patmos sbihil te tut q'uinal ay ta yohlil mar, ta scaj te sc'op Dios soc te testigo-c'op yu'un te Jesucristo. 10Ta sc'ahc'alel te Cajwaltic cuentahimbilon yu'un a te Espíritu, la jca'iy ay mach'a tulan c'opoj ta jpat hich te bin ut'il yoq'uel corneta, 11te hich la yal: Ho'on te Alfa soc te Omega, te shahchibalon soc te slajibalon. Ts'ihbaya ta hun te bin yac awil soc ticona bahel ta stojol te huqueb iglesiahetic: ha te Éfeso, Esmirna, Pérgamo, Tiatira, Sardis, Filadelfia, soc te Laodicea, xchi la jca'iy.
12La jsut jba ta yilel mach'a a te la sc'oponon. C'alal la jsut jba, la jquil ay huqueb yawil c'ahc' pasticlambil ta oro, 13soc ta yohlil te yawil c'ahc' ay mach'a hich yilel te bin ut'il snich'an winic, slapoj snahtil-c'u' te c'ohem c'alal ta yoc soc ay sbehch'il stahn pasbil ta oro. 14Xlipet sacal te stsotsel sjol, hich sacal te bin ut'il stsotsel tuminchij, hich te bin ut'il me'sic, soc sjel ta sts'anabul yat c'ahc' te site. 15Te yoc hich yilel te bin ut'il xlipet huxbil bronce te tsajubtesbil ta c'ahc' ta horno, soc te sc'op hich ya'iyel te bin ut'il xculet ya xc'opoj snojel ha'. 16Ay huqueb eq'uetic ta swa'el-c'ab, soc ay espada te scha'bunjehchel ay ye te yac ta loq'uel ta ye, soc te sit yelaw xlipet sts'anabul hich te bin ut'il sts'anabul te c'ahc'ale.
17Te c'alal la jquile, puch'on ta ye'tal yoc, hich c'ohon te bin ut'il chamenon. La scajambon swa'el-c'ab ta jtojol, hich la yalbon: Ma me xiwat. Ho'on te shahchibalon soc te slajibalon, 18te mach'a cuxul. Lajon, pero cuxulonix sbahtel q'uinal. Quich'oj te llave yu'un lajel soc yu'un te yawil mach'atic chamenic. 19Ha yu'un ts'ihbaya te bintic awiloj, ha te bintic ay ta ora ini soc te ya xc'oht ta pasel ta patil. 20Hich ay te bin muquen sc'oblal te huqueb eq'uetic la awil ta jwa'el-c'ab soc te huqueb yawil c'ahc' pasticlambil ta oro: Te huqueb eq'uetic ha te huctuhl ch'ul a'batetic#1.20 ch'ul a'batetic, o: jal-c'opetic, o jtsobawetic yu'un te iglesia. Mensajero, xchi ta griego. Hich ay ta capítulos 2 soc 3. yu'un te huqueb iglesiahetic, soc te huqueb yawil c'ahc' ha te huqueb iglesiahetic, xchi.
Currently Selected:
Apocalipsis 1: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.