Lamentaciones 1
1
Mel-o'tan yu'un Sión te chucule
1¡Mero stuquel hil te Jerusalén,
te nojel ta ants-winiquetic ta nahil to!
Te mach'a muc' ta yohlil te nacionetic
hich c'ohem te bin ut'il me'ba' ants;
te ants ich'bil ta cuenta ta jsehpelsehp q'uinal
ochix ta mosohil.
2Pich'il yo'tan ta oq'uel ta ahc'abal,
sch'alet ya'lel sit ta scho.
Ta spisil te mach'atic antsinot c'ohem yu'un
mayuc jtuhluc te ya xmuc'ubtesbot q'uinal ya'iy yu'un;
ihquitayot yu'un spisil yamigotac,
c'atp'ujemix ta scontratac.
3Ic'ot bahel ta chuquel te Judá,
ay swocol soc ay ta tulan mosohil;
nahinemix ta yohlil te nacionetic,
ma sta banti ya scux yo'tan.
Spisil te jnutsawetic yu'un la stahic c'ohel
ta yorahil swocol.
4Ayic ta mel-o'tan c'ohem te behetic yu'un Sión,
como mayuc mach'a ya xtal ta muc'ul q'uinetic.
Jochol spisil te ochibaletic yu'un,
ya x'ahcanajic te sacerdotehetic;
ayic ta mel-o'tan te ach'ixetic yu'un,
mero pich'il yo'tanic.
5Te scontratac ha príncipaletic c'ohtic,
lec c'ohtic te mach'atic p'ajotic yu'un,
como te Jehová la ya'be swocol
yu'un bayel te smule.
Te yal-snich'nab bahtic ta chuquel
ta stojol te contrahe.
6Ch'ay spisil st'ujbilal
te yantsil-nich'an Sión;
te príncipaletic yu'un
hich c'ohemic te bin ut'il ha'mal chijetic
te ma ba ya sta swe'elic;
mayuc yipic a ahnic bahel
ta stojol te mach'atic nutsotic yu'unique.
7Te Jerusalén, te c'alal och ta sc'ab te scontra
soc te mayuc mach'a coltayot yu'un,
la sna' te bin ora ay swocol soc te stoyoj sba,
la sna' spisil te sc'ulejal te la sta ta namey.
Ilot yu'un te scontratac,
labanot yu'un.
8Jerusalén bayel stahoj smul,
ha scuentahil te bohlob sc'oblal;
spisil te mach'atic la yich'ic ta muc' ya sp'ajiquix,
como watal la yilic;
ya x'ahcanaj,
ya sut bahel sit ta spat.
9Te sbohlil ay ta stsec;
ma ba la snop bin ut'il ya xc'oht ta loq'uel.
Wocol ta ch'uhunel bin ut'il yahl,
mayuc mach'a ya smuc'ubtesbe q'uinal ya'iy yu'un.
Ilawil, Jehová, te jwocole,
como toyol yac'oj sba te jcontrahe, xchi.
10Te scontra la shach sc'ab
ta stsaquel spisil te bintic bayel sc'oblal yu'une;
la yil te ochic yantic nacionetic ta ch'ul awilal yu'un,
ha te la awal mandar, Cajwal,
te ma me x'ochic ta tsoblej awu'une.
11Spisil te ants-winiquetic yu'un
ya x'ahcanajic ta slehel swe'elic;
la sjel swe'elic ta bintic bayel sc'oblal yu'unic
scuenta yu'un hich ya xcuxajic a.
¡Ilawil, Jehová,
bin ut'il la jquich' tulan pehc'anel! xchi.
12¿Ma bal ayuc sc'oblal ta awo'tanic,
ha'ex te ya xc'axex bahel ta be tey a?
Ilawilic teme hich ay sc'uxul
te bin ut'il te sc'uxul te tal ta jtojol;
como te Jehová la ya'bon jwocol
ta sc'ahc'alel yilimba.
13C'alal ta toyol la sticon tal c'ahc'
te och c'alal ta jbaquel;
la slimbon jyacol ta coc,
la yac' suhton bahel ta jpat;
jimbil la yihquitayon hilel,
spisil ora c'ux ya ca'iy.
14Te muliletic cu'un la schucbon ta jnuc'
hich te bin ut'il yugo,
te Jehová ha nix ta sc'ab la schucbon ta jnuc',
laj quip yu'un.
¡Te Cajwal yac'ojon ta sc'ab te mach'atic
ma xhu' ya jcoltay jba ta stojolic!
15Te Cajwal la sts'o' ta teq'uel ta cohlil
spisil te winiquetic cu'un te ay yipic;
la yic' talel jchahp soldadohetic
yu'un ya slajimbon te jcolel-winiquetic cu'une.
Te Cajwal la sts'o' ta teq'uel
hich te bin ut'il ta spits'ojbil ts'usub
te yantsil-nich'an Judá.
16Ha scuentahil te yacon ta oq'uel;
ha scuentahil te ya xloc' te ya'lel jsite,
como namal ay te mach'a ya smuc'ubtesbon co'tan
soc te ya ya'bon jcux co'tan.
La yich'ic jinel te jnich'nab,
como ha la ya'iy tsalaw te jcontrahe.
17Te Sión la shach sc'ab ta sc'anel coltayel,
pero mayuc mach'a ya x'a'bot smuc'ul yo'tan yu'un.
Te Jehová la yal mandar te ha scontratac ya xc'ohtic
te spat-xuhc te Jacob;
hich ihlaybil c'oht ta yohlilic te Jerusalén.
18Pero te Jehová toj yo'tan stuquel,
como la jtoy jba ta stojol te sc'ope.
A'iya awa'iy apisilic, pueblohetic,
ilawilic te jwocole:
Te queremetic soc te ach'ixetic cu'un,
ic'otic bahel ta chuquel.
19La jcawtay te mach'atic la yantsinonic,
pero la slo'loyonic.
Te sacerdotehetic soc te mamaletic cu'un lajic ta pueblo
c'alal yacalic ta slehel swe'elic yu'un ya xcuxajic.
20Ilawil, Jehová, te bayel ayon ta mel-o'tan;
ya stij sba te jch'uht,
ya syuc' sba te co'tan,
como bayel la jtoy jba.
Ta fuera ya yac' mel-o'tan yu'un lajel ta espada,
ta yutil ya xcuentahinwan te lajele.
21La ya'iybonic te ahcan cu'un,
pero mayuc mach'a ya smuc'ubtesbon co'tan.
Spisil te jcontratac ya'iybeyejon sc'oblal te jwocole,
tse'el yo'tanic yu'un te bin la apasbone.
Ac'a taluc sc'ahc'alel te awalbeyej sc'oblal,
ac'a te hich ya xc'ohtic te bin ut'il ayone.
22Ac'a taluc ta atojol, Cajwal,
spisil te bintic chopol spasojique;
hich me xapasbe te bin ut'il la apasbon
yu'un spisil te jmule,
como bayel te ahcan cu'un
soc mayuquix yip co'tan.
Currently Selected:
Lamentaciones 1: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.