Génesis 49
49
Jacob ya yalbe sc'oblal snich'nab
1Te Jacob la yic'ticlan tal te snich'nab, hich la yalbe: Tsoba abahic, ya calbeyex awa'iyic te bin ya xc'oht ta pasel ta atojolic ta patil bahel:
2Tsoba abahic, a'iya awa'iyic snich'nabex Jacob,
a'iya awa'iyic sc'op te atatic Israel.
3Ha'at Rubén, ba-alalat cu'un,
ha'at quipat soc shahchibalat te quipe,
nahil ich'bilat ta cuenta, soc bayel awip.
4Hichat te bin ut'il tulan yip yacan ha',
ma ha'uquix sbahbayalat,
como mohat ta swayib te atate,
la abohlobtesbe sc'oblal c'alal mohat ta jwayib.
5Te Simeón soc Leví, yermano sbahic,
te ya'tejibic, ha ya'tejibic scuenta spasel bin chopol.
6Ma x'ochon ta banti ya schap sc'opic,
soc ma ba ya joquin jba soc c'alal ya stsob sbahic,
como ta scuenta yilimbahic la smilic winiquetic
soc ta scuenta sbohlil yo'tanic la sbojticlambeyic schihal yacan torohetic.
7Bohlobuc me sc'oblal te yilimbahic te c'ax jelawix,
soc te sc'ahc'alic te mero tulan.
Parte ya cac'ticlan ta yohlil Jacob,
ya jpucticlan ta yohlil Israel.
8Ha'at Judá, ya me yalbat bayel awutsilal te awermanotac;
ya xc'oht ac'ab ta snuc' te acontratac;
te snich'nab te atat ya squejan sbahic ta atojol.
9Alal chojat, Judá;
hahchat loq'uel ta stojol te bin atsacoj, jnich'an.
La swuhts'an sba, la spahcan sba hich te bin ut'il choj,
hich te bin ut'il yantsilel choj: ¿mach'a ya sc'an ya stij hahchel?
10Ma ba ya xloc' bahel te bastón ta stojol Judá,
ma ba ya xloc' bahel te seña ya'tel ta yohlil te yoc,
ha to c'alal ya xtal te mach'a ha yu'un stuquel,#49.10 O: ha to c'alal ya xtal te Silo.
te ya xch'uhumbot smandar yu'un te pueblohetique.
11Ya schuc ta sch'oxal ts'usub te stut burro,
ta lequil sch'oxal ya schuc te yal sme' burro yu'un;
ya sac' sc'u' ta ya'lel ts'usub,
ta sch'ich'el ts'usub ya sac' te snahtil-c'u'.
12Te sit c'ax hich tsajic a te bin ut'il ya'lel ts'usub,
soc te sbaquel ye c'ax hich saquic a te bin ut'il leche.
13Te Zabulón ya xnahin ta ti'ti'mar,
ha yawil barcohetic ya xc'oht;
te smojonil ya xc'oht c'alal Sidón.
14Te Isacar, ha tulan burro
te ya spahcan sba ta yohlil corraletic yu'un chambahlametic.
15C'alal ya yil te ha lec te cux-o'tanil
soc te mero lec te lumq'uinale,
ya me yac' spat yu'un scuchel ihcatsil,
ya x'och ta mosohil ta tulan a'tel.
16Te Dan ya me smeltsa'an te slumal
te bin ut'il jchahp sts'umbal Israel.
17Ha chan ta ti'be ya xc'oht te Dan,
ha ti'awal chan ta ti'be,
te ya sti'ticlambe yoc cawu,
hich ya yac' yahluc cohel ta spat te mach'a cajal a.
18Yacon ta smahliyel te coltayel awu'un, Jehová.
19Te Gad, ya xpojbot sbiluc yu'un jtsohb j'eleq'uetic,
pero ya me snuts bahel stuquel.
20Te we'elil yu'un Aser mero lec,
ya yac' we'elil te ya xbaht ta stojol ajwalil.
21Te Neftalí, ha ha'mal chij te colemix,
te ya stohctes t'ujbil yalatac.#49.21 O: te ya yal t'ujbil c'opetic.
22Te José, ha sc'ab te' te bayel ya yac' sit,
ha sc'ab te' te bayel ya yac' sit te ay ta sti'il sloq'uib ha',
te spuhl ya xmo bahel ta ba ts'ahc.
23Te j'ac'-t'ihmalte'etic la yaq'uic pihch'ajuc yo'tan,
la syalbayic soc la slablab-o'tantayic,
24pero ma ba laj yip te st'ihmalte' stuquel,
la yich' yip te sc'ab
ta scuenta sc'ab te Mach'a ay yu'el yu'un Jacob,
ta scuenta te Jcanan-tuminchij, te Muc'ul ton yu'un Israel,
25ta scuenta te Dios yu'un atat, te ha ya scoltayat,
ta scuenta te Dios te spisil ya xhu' yu'un,#49.25 Ta hebreo: Shaddai, xchi.
te ya ya'bat bendición,
ha te bendicionetic yu'un te ch'ulchan ay ta toyol,
ha te bendicionetic yu'un te sc'ubulil ha' ay ta ye'tal,
ha te bendicionetic yu'un chu'ul soc yalajib ants.
26Te bendicionetic yu'un atat
c'ax hich muc' a te bin ut'il te bendicionetic yu'un te antiguo me'iltatiletic cu'un,
c'ax hich a te bin ut'il te bayel bintic ya yac' te tsehltsehltic te ma xlaj;
ac'a c'ohtuc ta sjol te José,
ta sti'ba te mach'a parte ac'bil ta yohlil te yermanotac.
27Te Benjamín, ha c'ahc'al ha'mal ts'i';
ta sacubel q'uinal ya sti' te bin tsacbil yu'un,
ta tibiltic ya spucticlan te bintic pojbil, xchi te Jacob.
Cham Jacob
28Ta spisilic ini ha'ic te lahchaychahp israeletic, soc hich ay te bin halbotic yu'un te static te c'alal la yac'ticlambe bendición, ha chican bin bendicionil la ya'be ta tuhlultuhl.
29Ta patil hich la spasticlan ta mandar: Ya xchamonix.#49.29 O: Ya xbaht joquin te jlumale. Ya me amuconic ta banti mucul te jme'jtatic ta ch'en te ay ta sq'uinal Efrón te heteo-winic, 30ha te ch'en te ay ta sq'uinal Macpela te ay ta stojol banti ya xloc' tal c'ahc'al yu'un Mamre, ta sq'uinal Canaán, te ch'en soc te q'uinal te Abraham la smambe te Efrón te heteo-winic scuenta muquenal. 31Tey mucot a te Abraham soc Sara te yihnam; soc tey mucot a te Isaac soc Rebeca te yihnam; soc tey nix la jmuc a te Lea. 32Te q'uinal soc te ch'en tey a, ha la yich' mambeyel te snich'nab Het, xchi.
33Te c'alal laj yo'tan te Jacob ta yalbeyel mandar te snich'nab, la smehtsan sba ta swayib, quehchaj yich'bel ic', cham.#49.33 O: baht sjoquin te me'iltatiletic yu'une.
Currently Selected:
Génesis 49: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.