Génesis 39
39
José soc yihnam Potifar
1Ic'ot bahel ta Egipto te José. Te Potifar te egipcio-winic te ay ya'tel ta stojol faraón, te capitán yu'un te soldadohetic te ya scanantayic ajwalil, la smambe te ismaeletic te yic'ojic bahel tey a. 2Pero joquimbil yu'un Jehová te José, lec c'oht ta loq'uel spisil te bin la spas; nahin ta sna te yajwal, te egipcio-winique. 3Te yajwal la yil te joquimbil yu'un Jehová, te lec c'oht ta loq'uel spisil te bin la spas. 4Te José lec ilot yu'un te yajwal, ha mayordomo c'oht yu'un te sna, la ya'be ta sc'ab spisil bintic ay yu'un. 5Te c'alal och ta scuenta José spisil sna soc spisil sbiluc, te Jehová la ya'be bendición te sna te egipcio-winic ta scuenta te José; c'oht bendición yu'un Jehová ta stojol spisil bintic ay yu'un ta sna soc ta sq'uinal. 6La ya'be ta sc'ab José spisil bintic ay yu'un, mayuc bin la snop ta yo'tan stuquel, ha nax te bin ya swe'.
Te José buen lec sbaq'uetal soc t'ujbil te sit yelaw. 7Ta patil, te yihnam yajwal la smulan te José, hich la yalbe: Joquinawon ta wayel, xchi.
8Pero ma ba la sc'an te José; hich la yalbe te yihnam te yajwale: Te cajwal ya'beyejon ta jcuenta spisil bintic ay yu'un, mayuc bin ya snop ta yo'tan yu'un sbiluc ta sna. 9Mayuc yan mach'a toyol xan te bin ut'il ho'on li' ta na ini, soc mayuc bin ma ba ya'beyejon ta jcuenta, ha'at xanix te yihnamat. ¿Bin ut'il c'an jpas te bin chopol ini, te ya jta jmul ta stojol te Diose? xchi.
10Jujun c'ahc'al yac ta swulilanel te José; pero ma ba la sch'uhumbe sc'op te yacuc xway soc, o te ya sjoquin. 11Ay jun c'ahc'al och ta yutil na yu'un ya spas ya'tel, mayuc mach'a tey ay a. 12Ha yu'un te ants la stsacbe sc'u' te José, hich la yalbe: Joquinawon ta wayel, xchi. Pero hil te sc'u' ta sc'ab te antse, loc' ta ahnel.
13C'alal la yil te ants te hil ta sc'ab te sc'u' soc te loq'uix ta ahnel te José, 14la yic' tal te yantic winiquetic te ay ta sna, hich la yalbe ya'iyic: Ilawilic, te jmamalal la yic'botic ochel tal jtuhl hebreo yu'un ya stse'layotic. Tal ta jtojol yu'un ya c'an sjoquinon ta wayel, pero tulan awonon. 15C'alal la ya'iy te tulan awonon, hil te sc'u'e, loc' ta ahnel, xchi.
16La sq'uejbe te sc'u' José ha to c'alal hul ta sna te yajwal. 17Ha nix hich la yalbe: Te awa'bat hebreo-winic te la awic' tal, tal ta jtojol yu'un ya c'an sjimbon jc'oblal; 18pero c'alal tulan awonon, hil ta jts'ehl te sc'u'e, loc' ta ahnel, xchi.
19C'alal la ya'iy te yajwal te José te bin halbot yu'un te yihnam te hich la yal: Hich c'an spasbon te awa'bat, te xchihe, bayel ilin yu'un. 20La stsac te José, la yotses ta cárcel ta banti ay yantic jchuqueletic yu'un te ajwalil; tey hil a. 21Pero joquimbil yu'un Jehová te José, la ya'be yil sc'uxul yo'tan soc la yac' te lec ilot yu'un te jcuentahinwanej yu'un te cárcel. 22Hich te jcuentahinwanej yu'un te cárcel la ya'be scuentahin José spisil te jchuqueletic te ayic ta chuquel soque. Spisil bin ay ta pasel tey a, ha la spas te José. 23Te jcuentahinwanej yu'un te cárcel mayuc bin la snop ta yo'tan yu'un te mach'atic la ya'be scuentahin te José, yu'un joquimbil yu'un Jehová te José, soc lec c'oht ta loq'uel yu'un Jehová spisil te bin la spase.
Currently Selected:
Génesis 39: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.