Génesis 38
38
Judá soc Tamar
1Ha yorahil a te Judá la yihquitay hilel te sbanquil yihts'inab, baht sjoquin jtuhl adulam-winic, Hira sbihil. 2Te Judá la yil tey a te yantsil-nich'an jtuhl cananeo-winic Súa sbihil; la yic' soc la sta sba soc. 3Hahch yal, ayin squerem-al, Er sbihil. 4Cha'hahch yan yal, ayin squerem-al, Onán sbihil. 5Cha'hahch yan yal, ayin squerem-al, Sela sbihil. Ay ta Quezib a te c'alal ayin te yoxebal yale.
6Patil te Judá la slehbe yihnam te Er te sba-nich'an, Tamar sbihil. 7Te Er te sba-nich'an Judá, ma lecuc ilot yu'un Jehová, hich lajimbot scuxlejal yu'un. 8Ha yu'un te Judá la yalbe te Onán: Taha aba soc te yihnam chawinic abanquil, pasa te bin ya sc'an pasel te ha'at amu', ayuc me sts'umbal ya xc'oht te abanquile, xchi.
9Pero la sna' te Onán te ma ha'uc sts'umbal nix ya xc'oht, ha yu'un te jujun buelta te ya xway soc te yihnam te chawinic sbanquil ya smal cohel ta lum te snich'an te winique, scuenta yu'un ma ba ya xchicnaj sts'umbal a te sbanquile. 10Te Jehová ma lecuc yo'tan yu'un te hich la spas, ha nix hich la smil. 11Hich te Judá la yalbe te Tamar te yalib: Me'ba' ants me x'ayinat ta sna te atate. Mahliya ya xmuc'ub te jnich'an Sela, xchi, yu'un hich la yal: Teme repente ya xcham hich te bin ut'il te sbanquiltac. Hich baht te Tamar, ayin ta sna stat.
12Bayel c'ahc'al ta patil cham yihnam te Judá, ha te yantsil-nich'an Súa. C'alal ch'ay smel-o'tan, baht ta Timnat ta banti ay te mach'atic yac ta sloq'uesbeyel stsotsel te tuminchijetic yu'une. Sjoquinej bahel te Hira te adulam-winic, te smohlol sba soque. 13Hich c'oht ta halbeyel te Tamar: Ya xtal ta sloq'uesbeyel stsotsel stuminchij ta Timnat te awalibmamal, xchihic. 14Ha yu'un te Tamar la sloq'ues te sc'u' slapoj scuenta me'ba' ants, la smuc sit ta pac' soc la smey sba ta rebozo, scuenta yu'un ma xna'bot sba a, baht shuhcan sba ta yochibal Enaim ta sbehlal Timnat; yu'un yilojix te muq'uix te Sela pero ma x'a'bot yic' sba soc.
15C'alal ilot yu'un te Judá, la scuy ta j'antsinel-ants, yu'un smucoj sit yelaw. 16Hich loc' ta be soc la yalbe: Ya jc'an ya joquinat ta wayel, xchi. Ma ba la sna'be sba teme ha te yalibe.
Halbot yu'un te antse: ¿Bin yac awa'bon a teme yac ajoquinon ta wayele? xchi.
17Ya jticombat tut tentsun, xchi.
Hich halbot xan yu'un te antse: Ayuc bin yac awa'bon hilel a ha to c'alal yac aticombon tal te bin la awal, xchi.
18¿Bin a te ya ca'bat hilel? xchi te Judá.
Ha te sello soc te bin awuhanej, soc anahbate' te ay ta ac'ab, xchi te antse.
Hich te Judá la ya'be hilel te bintic c'ambot, la sjoquin ta wayel, hich hahch yal yu'un. 19Patil loc' bahel te Tamar, la sloq'ues te pac' smucoj sit a, la scha'lap xan te sc'u' slapoj scuenta me'ba' ants.
20Patil te Judá la sticon bahel te tut tentsun ta scuenta te smohlol, ha te adulam-winic, scuenta yu'un ya suhtbot te bin hilem yu'un. Pero ma ba la sta te antse. 21La sjoc'obe te winiquetic te tey ayic a: ¿Banti ay te j'antsinel-ants ta Enaim te hucul ta ti'be? xchi.
Mayuc xquilojcotic j'antsinel-ants li'i, xchihic te winiquetique.
22Ha yu'un suht bahel, baht yalbe te Judá: Ma ba la jta; soc la yalbonic te winiquetic te nahinemic tey a: Mayuc j'antsinel-ants li'i, xchihic.
23La yal te Judá: Ac'a yich' hiche te bin yich'oj scuenta yu'un ma ba ya stse'layotic, como la jticombe te tut tentsun, pero ma ba la ata te antse, xchi.
24Oxeb wan u ta patil c'oht ta halbeyel te Judá: La yac' sba ta antsinel te awalib Tamar; hahchemix yal, xchi sc'oblal.
Hich la yal te Judá: ¡Tsacahic loq'uel tal, ac'a yich' chiq'uel! xchi.
25Pero c'alal yac ta tsaquel loq'uel tal a te antse, hich la sticombe c'op te yalibmamal: Te winic te ha yu'un te biluquetic ini, ha yu'un te alal jwoloje, xchi. Soc la yal xan: Na'beya sba mach'a yu'un ini: te sello soc te bin yuhanej a, soc te nahbate'el, xchi te antse. 26Ha yu'un te Judá la sna'be sba mach'a yu'un, hich la yal: Ha toj xan stuquel a te bin ut'il te ho'one, ta scaj te ma ba la jca'be yic' sba soc te jnich'an Sela, xchi. Te Judá mayuc bin ora la sta xan sba soc.
27C'alal la sta yorahil te ya x'ayin yal te Tamar, lo-alal te swoloje. 28C'alal yac ta ayinel a, loc' tal sc'ab te jtuhle. Te jtam-alal la schucbe tsajal hilera ta sc'ab, soc hich la yal: Ha nahil ayin ini, xchi. 29Pero cha'och te sc'ab, ha nahil ayin te yane, ha yu'un la yal te jtam-alal: ¡Mero la alom loq'uel! xchi. Ha yu'un Fares#38.29 Fares: la slom loq'uel, xchi. c'oht te sbihile. 30Patil ayin te yan alal te chucbil tsajal hilera ta sc'ab, Zara sbihil c'oht.
Currently Selected:
Génesis 38: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.