Génesis 33
33
Lecub yo'tan Esaú soc Jacob
1La shach sit te Jacob la yil yac ta talel te Esaú soc jbahc' (400) ta tuhl winiquetic. Ha yu'un jchahpalchahp la yac' te alaletic ta stojol Lea soc Raquel soc te cheb criadahetic. 2Ha la yac' nahilijuc te criadahetic soc te yalatac, patil te Lea soc te yalatac, ta slajibal la yac' te Raquel soc José. 3Te Jacob nahilij bahel, la snijan sba ta lum huqueb buelta ha to c'alal c'oht sta te sbanquile. 4Pero te Esaú ahnimal baht sta tal soc la smech', la smey tal ta snuc' soc la yuhts'uy; oc' schebalic. 5Te Esaú la shach sit, la yil te antsetic soc te alaletic, hich la sjoc'oy: ¿Mach'atic a ini? xchi.
Ha te alaletic te Dios ya'beyej te a'bat awu'un, xchi te Jacob.
6Tal te criadahetic soc yalatac, hul snijan sbahic. 7Soc tal te Lea soc yalatac, la snijan sbahic. Patil tal te José soc Raquel, ha nix hich la snijan sbahic. 8Hich la sjoc'oy te Esaú: ¿Bin anopoj yac apas yu'un te jchahpalchahp te la jtahticlan ta be? xchi.
La sjac' te Jacob: Ha te lecucon ta sit cajwal ya xc'ohon, xchi.
9La sjac' te Esaú: Quihts'in, ay tsobol cu'un. Hiluc awu'un te bin ay awu'un, xchi.
10La yal te Jacob: Ma'uc, awocoluc, teme lecon ta asit ich'bon te amahtan cu'un, como te c'alal la jquilbat asit sjel ta ha la jquilbe sit a te Diose, te lequix awo'tan la awic'on ta atojol. 11Awocoluc, tsacbon te amahtan te la jquich'bat tal, yu'un lec yo'tan Dios ta jtojol, spisil ini ho'on cu'un, xchi. Te Jacob la yac' fuersa ta c'op, hich la stsac te Esaú.
12La yal te Esaú: Conic, ya xnahilijon bahel awu'un, xchi.
13Pero la yal te Jacob: Cajwal, yac ana' te tutic to te alaletic soc te ay yalatac te tuminchijetic soc wacaxetic; teme ya xtenotic ta behel, ta junax c'ahc'al ya xcham spisil te tuminchijetique. 14Ha yu'un, cajwal, nahilijan bahel yu'un te awa'bate, c'unc'un ya xbehenon bahel, ha chican bin ut'il ya xhu' yu'un te chambahlametic soc te alaletic, ha to ya xc'ohon ta Seir ta banti ay te cajwal, xchi.
15La yal te Esaú: Ya ca'bat hilel ajoquin j'ohliluc te winiquetic te sjoquinejonic talel, xchi.
Hich la yal te Jacob: Teyuc a, teme lecucon ta asit, cajwal, xchi.
16Hich suht bahel ta Seir te Esaú. 17Te Jacob behen bahel c'alal Sucot, tey c'oht spas sna a soc la spasbe snahin yaxna te schansbahlam; ha scuentahil te Sucot#33.17 Sucot: yaxna, xchi. sbihil c'oht yu'une.
18Te Jacob, c'alal suht tal ta Padan-aram, lec ay a c'oht ta muc'ul pueblo Siquem te ay ta sq'uinal Canaán; la stehc'an snahilpac' ta stojol te pueblo. 19La sman jsehp q'uinal te banti la stehc'an te snahilpac', ha chombot yu'un te snich'nab Hamor te stat Siquem, ho'winic (100) ta sehp plata la stoj. 20La spasbe scajtajib ta chiq'uel mahtanil tey a, la ya'be sbihilin El-Elohe-Israel.#33.20 El-Elohe-Israel: Dios, ha te Dios yu'un Israel, xchi.
Currently Selected:
Génesis 33: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.