Génesis 13
13
Abram soc Lot la yihquitay sbahic
1Hich loc' tal ta Egipto te Abram, toj bahel c'alal ta Neguev soc yihnam soc spisil bintic ay yu'un, soc te Lot. 2Te Abram ay bayel chambahlametic soc oro soc plata yu'un. 3C'ax tal ta Neguev, c'unc'un behen bahel ta Bet-el, tey nix ta banti la stehc'an snahilpac' ta nahil to, ta ohlil yu'un Bet-el soc Hai, 4tey ta banti la spas scajtajib ta chiq'uel mahtanil. Tey la sc'opon a te Jehová te Abram.
5Ha nix hich te Lot, te sjoquinej te Abram, ay tuminchijetic, wacaxetic, soc nahilpaq'uetic yu'un. 6Te q'uinale ma tic'uc ya xnahin schebalic a, yu'un bayel sbiluquic, ha yu'un ma ba hu' ya xnahinic ta junax lugar. 7La yut sbahic te jcanan-chambahlametic yu'un Abram soc te jcanan-chambahlametic yu'un Lot. (Soc tey nix nahinemic a te cananeohetic soc te ferezeohetique.)
8Ha yu'un te Abram la yalbe te Lot: Ma me jcontrahin jbahtic ni ha'uc te jcanan-chambahlametic cu'untic, como quermano jbahtic. 9¿Ma bal ayuc ta atojol spisil te q'uinale? Ya calbat wocol te yacuc awihquitayon hilel. Teme ya xbahat ta q'uexam, ho'on ya xbohon ta wa'el; teme ya xbahat ta wa'el, ho'on ya xbohon ta q'uexam, xchi.
10Te Lot la shach sit, la yil spisil te spamlej yu'un Jordán te ay bayel ha'etic tey a, hich yilel te bin ut'il sts'unub-yawal Jehová, hich yilel te bin ut'il te sq'uinal Egipto ta stojol Zoar. Hich ay a te c'alal ma to ba sjinoj Jehová te Sodoma soc te Gomorra. 11Ha yu'un te Lot la stsa spisil te spamlej Jordán. Ha yu'un behen bahel ta stojol banti ya xloc' tal c'ahc'al; hich la yihquitay sbahic. 12Te Abram hil ta nahinel ta sq'uinal Canaán stuquel, yan te Lot c'oht nahinuc ta pueblohetic ta spamlej, la spasulan bahel snahilpac' ha to c'alal c'oht ta Sodoma. 13Pero te mach'atic nahinemic ta Sodoma c'ax chopol yo'tanic, la spasic mero chopol muliletic ta stojol Jehová.
14Te Jehová hich la yalbe te Abram te c'alal bahtix a te Lot: Toya asit, ila awil spisil te q'uinal ta ajoyobal, ta stojol norte, ta stojol sur, ta stojol banti ya xloc' tal c'ahc'al, soc ta stojol smahlib c'ahc'al. 15Yu'un spisil te q'uinal te yac awile, ya ca'bat aq'uinalin soc ats'umbal sbahtel q'uinal. 16Hich yipal ats'umbal ya xc'oht cu'un te bin ut'il ts'ubil lum. Teme ay mach'a ya xhu' ya yahtay te ts'ubil lum, ha nix hich ya xhu' ya yahtay te ats'umbale. 17Hahchan, ocliya te q'uinal, bin yilel te snahtil soc te sjamalil, yu'un ha ya ca'bat aq'uinalin, xchi sc'oblal.
18Hich te Abram la sjeltaybe yawil te snahilpac', c'oht ta nahinel ta banti jihte' yu'un Mamre, te ay ta Hebrón. Tey la spasbe scajtajib ta chiq'uel smahtan a te Jehová.
Currently Selected:
Génesis 13: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.