Ezequiel 1
1
Nahalsitil sc'oblal te yutsilal Dios
1Ta yo'ebal c'ahc'al ta schanebal u, ta slajunebal scha'winic (30) ha'bil te ayon ta yohlil te mach'atic ayic ta chuquel, ayon ta ti' muc'ul-ha' Quebar a, la sjam sba te ch'ulchan, la jquil nahalsitetic yu'un Dios. 2Ta yo'ebal ha'bil te ic'ot bahel ta chuquel a te ajwalil Joaquín, ta yo'ebal c'ahc'al yu'un te u, 3tal sc'op Jehová ta stojol te sacerdote Ezequiel snich'an Buzi ta sq'uinal te caldeohetic ta sti'il te muc'ul-ha' Quebar. Tey c'oht a te sc'ab Jehová ta stojol.
4La jquil yac ta talel tulan ic'al-ha'al ta norte soc muc'ul tocal capal ta c'ahc' yac ta tihlel, soc tulan sacal q'uinal ta sjoyobal. Ta yohlil te c'ahc' ay bin ay tey a te pajal soc bronce te xlipet yilel; 5soc ta mero yohlil ay bin ay tey a te pajal soc chaneb bintic cuxajtic; hich yilelic te bin ut'il winiquetic. 6Te jujune ay chaneb yelawic soc chaneb xiq'uic. 7Toj ay te yoquic, soc te stahn yoquic hich te bin ut'il slots' tut toro te xlipet hich te bin ut'il ch'ulbil bronce. 8Ta ye'tal te xiq'uic, ta schanjehchel, ay pajal soc sc'ab winic. Ta schanjehchel ay sit yelawic soc xiq'uic. 9Te xiq'uic ya stahticlan sbahic. C'alal ya xbehenic ma ba ya suht ta spatic, tuhlultuhl toj ya xbehenic bahel. 10Te jun yelawic pajal soc yelaw winic, ta swa'el pajal soc choj, ta sq'uexam pajal soc toro, soc ta spat pajal soc jxic; 11hich yilel te sit yelawique. Jujutuhl ay cheb xic' slichoj mohel te ya stahticlan sba soc yan. Te cheb xan xiq'uic smacoj sbaq'uetalic a. 12Jujutuhl toj ya xbehen bahel; te banti ac'ot bahel yu'un te espíritu tey behenic a, ma ba ya suht ta spatic c'alal ya xbehenic. 13Te bin yilelic te bintic cuxajtic, hich yilelic te bin ut'il tihlem ac'al, o hich te bin ut'il tsumbil c'ahc' te ya xtal ya xbaht ta yohlilique. Tulan sjahts' te c'ahq'ue, tey yac ta loq'uel tsantsehwaletic a. 14Te bintic cuxajtic ahnimal ya xtal ya xbahtic, pajal soc tsantsehwal.
15C'alal yacon ta yilel a te bintic cuxajtic, la jquil yoc carreta ta lum ta sts'ehl te jujutuhl bintic cuxajtic, ta schanjehchel. 16Te bin yilel te yoquic soc te bin ut'il pasbilic, hich yilelic te bin ut'il yax-el'el ton. Pajal yilel schanebal; hich yilelic te bin ut'il ay yoc ta yutil yan yoc. 17C'alal ya xbehenic, ya xbehenic ta schanjehchel, ma ba ya sut sitic. 18Te schanebal xotlejal yoc ha toyol soc xiweltic sba, soc nojel ta sitil ta sjoyobal. 19Te c'alal ya xbehenic te bintic cuxajtic, ha nix hich ya xbehenic te yoc carretahetique. Te c'alal ya xmohic hahchel ta lum te bintic cuxajtic, ha nix hich ya xmohic hahchel te yoc carretahetique. 20Te banti ya x'ac'otic bahel yu'un te espíritu, tey ya xbahtic a; te yoc carretahetic pajal ya xtohyic mohel hahchel soc, como te espíritu yu'un te bintic cuxajtic ay ta yoc carretahetic. 21Te c'alal ya xbehenic te bintic cuxajtic ha nix hich ya xbehenic te yoc carretahetic, c'alal ya xquehchajic ta behel, ha nix hich ya xquehchajic ta behel. Soc te c'alal ya xwihlic hahchel ta lum te bintic cuxajtic, ha nix hich ya xtohy mohel te yoc carretahetic, como te espíritu yu'un te bintic cuxajtic ay ta yoc carretahetic.
22Ta yahc'olal te sjolic te bintic cuxajtic ay bin limbil hich te bin ut'il t'ujbil sts'ayet cristal. 23Ta ye'tal te bin limbil tey slich'ticlanej bahel a te xiq'uic te bintic cuxajtic, ya stahticlan sbahic. Te jujutuhl ay cheb xiq'uic te smacoj sbaq'uetalic a. 24La jca'iybe sc'op te xiq'uic te c'alal ya xhahchic bahel, pajal soc sc'op bayel ha'etic, pajal soc sc'op te Mach'a spisil ya xhu' yu'un, pajal soc xjuyet bayel soldadohetic. Te c'alal ya stehc'an sbahic, ya scohtesic te xiq'uique. 25Te c'alal ya stehc'an sbahic soc ya scohtesic te xiq'uic, chicnaj c'op ta sba te bin limbil te ay ta yahc'olal te sjolique. 26Ta sba te bin limbil ta yahc'olal te sjolic ay bin chican te hich yilel te bin ut'il muc'ul huctajibal pasbil ta t'ujbil yaxal ton; soc ay mach'a te pajal soc winic yilel hucul ta bin pajal soc muc'ul huctajibal yilele. 27Ta sch'uyomba mohel la jquil hich yilel te bin ut'il bronce te sch'ulet, hich yilel te bin ut'il c'ahc' ta yutil ta sjoyobal. Soc ta sch'uyomba cohel la jquil te pajal soc c'ahc' yilel soc ay sts'anabul ta sjoyobal. 28Hich te bin ut'il xojob te ay ta tocal te c'alal ay ha'al, hich yilel te sts'anabul ta sjoyobal.
Hich yilel te nahalsitil yu'un te bin yilel te yutsilal te Jehová. Te c'alal la jquil, la jpahcan jba c'alal ta lum, soc la jca'iybe sc'op te mach'a c'opoje.
Currently Selected:
Ezequiel 1: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.