Tito 1
1
Je̱'e̱ yajpókxu̶ñ
1U̶u̶ch Pablo, je̱'e̱ Dios tyuumbu̶ y je̱'e̱ Jesucristo y'apóstol, je̱'e̱ u̶u̶ch tu̶ xykyexy ma je̱'e̱ ja'ay ajku̶xy mu̶dyiibu̶ je̱'e̱ Dios tu̶ win'ixyu̶ñ, neby je̱'e̱ tu̶y'ajt mu̶baad mu̶bu̶jkku̶xyu̶ñ y neby je̱'e̱ tu̶y'ajt mu̶baad nejwu̶u̶ygyu̶xyu̶ñ ma je̱'e̱ n'u̶xpu̶jku̶ñ ajtu̶mu̶ñ. 2Ma du'un myu̶na'añu̶ñ ko je̱'e̱ mu̶dyiibu̶ tu̶ y'o'kku̶xyu̶ñ juugypyu̶jkku̶xu̶p je̱'e̱ ja'adu'ook y paatku̶xu̶ch je̱'e̱ jugy'ajtu̶ñ wiinu̶u̶xu̶u̶bu̶. Dios yajwinwaanu̶u̶y je̱'e̱ ja'ay je̱'e̱ jugy'ajtu̶ñ wiinu̶u̶xu̶u̶bu̶, ka'anu̶ je̱'e̱ naaxwiimbu̶ najty yajkojyñu̶. Mu̶baad adaa tu̶y'ajt nmu̶bu̶jku̶m ajku̶xy, je̱' ko ka'p je̱'e̱ Dios y'anu̶u̶'áty. 3Y jada'achám, koonu̶ je̱'e̱ tiempo tu̶ yajmu̶baad'áty, tu̶ je̱'e̱ y'ayuuk tyu̶y'ajt xyajnejwu̶u̶yu̶m ajku̶xy mu̶u̶d u̶u̶ch kyu̶xpu̶ mu̶dyiibu̶ u̶u̶ch tu̶ xymyo'oyu̶ñ ko u̶u̶ch ngapxwa'kxu̶ch neby u̶u̶ch je̱'e̱ Dios tu̶ xyajni'ipú̶kyu̶ñ, u̶u̶ch je̱'e̱ nniwaambu̶ nyajtzookpu̶ ajtu̶m. 4Cham adayaaba naky nyajniguéxy miich Tito, tu̶y'ajtu̶ñ miich du'un nju̶wu̶'u̶y neby je̱'e̱ ku̶'u̶m'úngu̶ñ ma adaa mu̶bu̶jku̶ñ mu̶dyiibu̶ nime̱tzk nmu̶dajtypy ajtu̶mu̶ñ ko je̱'e̱ Dios nmu̶bu̶jku̶m, nyajmu̶dzojkypy ko je̱'e̱ Dios u̶u̶ch je̱'e̱ nDeedy ajtu̶m y je̱'e̱ Jesucristo u̶u̶ch je̱'e̱ nniwaambu̶ nyajtzookpu̶ ajtu̶m je̱'e̱ oy'ajt may'ajt wan tuñ ma miichu̶ñ y xyajjootkujk'ádu̶ch.
Tito tyuung jim Creta
5Ko miich jim Creta naaxjooty mejy'agujkpu̶ nyajwu̶'u̶my, paady u̶u̶ch miich jim nyajwu̶'u̶my, neby u̶u̶ch je̱'e̱ nduung xyjyak'yajmaayu̶chu̶ñ je̱'e̱ mu̶dyiibu̶ u̶u̶ch ka'p nyajmaayu̶ñ, y ko je̱'e̱ amu̶jja'aydyu̶jk kajpt kajpt myajni'ibú̶gu̶ch, je̱'e̱ mu̶dyiibu̶ je̱'e̱ mu̶bu̶jkpu̶du̶jk nigu'ubajk'ádu̶bu̶ñ ajku̶xy, du'un neby nyajni'ibu̶jkyu̶ñ. 6Je̱' je̱'e̱ tuung myajni'ibú̶gu̶py je̱'e̱ amu̶jja'aydyu̶jk mu̶dyiibu̶ je̱'e̱ mu̶bu̶jkpu̶du̶jk nigu'ubajk'átu̶bu̶ñ, je̱'e̱ mu̶dyiibu̶ ka'p tu̶ tyuundu̶góy tii nyaj'oju̶mu̶byu̶ñ, mu̶dyiibu̶ to'oxyu̶jk tu'ug mu̶u̶du̶ñ y ka'p mye̱tzk tyu̶gu̶u̶gu̶ch,#1.6 Mu̶dyiibu̶ to'oxyu̶jk tu'ug mu̶u̶du̶ñ y ka'p mye̱tzk tyu̶gu̶u̶gu̶ch: nije̱' wiingpu̶ jaaybyu̶du̶jk myu̶naangu̶xy: mu̶dyiibu̶ je'eyu̶ tu'ook pu̶kyu̶ñ y ka'p mye̱jtz'ook tyu̶gu̶u̶g'ooku̶ch. y mu̶dyiibu̶ y'ung y'ana'k mu̶bu̶jkku̶xpu̶ñ je̱'e̱ Dios y'ayuuk tyu̶y'ajt y ka'pu̶ joot winma'añ ju̶bu̶kjaty axu̶u̶gjáty mu̶dajtku̶xy, y nan ka'pu̶ myaañ kyubétyu̶ch ajku̶xy. 7Pues mu̶dyiibu̶ je̱'e̱ tuung ku̶'u̶'aam'ajtpu̶ñ mu̶dyiibu̶ je̱'e̱ mu̶bu̶jkpu̶du̶jk ane̱'e̱mbu̶ñ, je̱' naty je̱'e̱ du'un kyweentu̶'ajtypy mu̶dyiibu̶ je̱'e̱ Dios jye̱'e̱'ajtypyu̶ñ, y paady wan tzipku̶xp tu̶ytyu'uda'agy tzu̶na'ay jugy'aty, ka'p mu̶baad kyu'ujuuñ'áty, ka'p mu̶baad wyinjootma'ad'áty, ka'p mu̶baad y'ajoknu̶u̶'áty, ka'p mu̶baad chipja'ay'áty y ka'p mu̶baad ni'igyu̶ y'ameeñ'áty. 8Je̱' je̱'e̱ tuung mu̶baad myajni'ipú̶ky mu̶dyiibu̶ je̱'e̱ ja'ay yajja'ttaakp ma je̱'e̱ jyu̶u̶n tyu̶jku̶ñ, mu̶dyiibu̶ je̱'e̱ oybyu̶ tuumbu̶ñ, mu̶dyiibu̶ wijy kejy ja'ay'ajtpu̶ñ, mu̶dyiibu̶ tu'uda'agy ja'ay'ajtpu̶ñ, mu̶dyiibu̶ oy wa'adz Dios mu̶duumbu̶ñ y mu̶dyiibu̶ ku̶'u̶m nay'ane̱'e̱mu̶p ma je̱'e̱ óybyu̶ju̶ñ. 9Wan tu'ug'aa tu'ugjoot naybyu̶da'agyii ma je̱'e̱ tu̶y'ajtpu̶ Dios y'ayuuk tyu̶y'ajt mu̶dyiibu̶ tu̶ u̶xpu̶kyu̶ñ, neby je̱'e̱ wiingpu̶ ja'ay mu̶baad nandu'un ku'ubu̶jkku̶xyu̶ñ je̱'e̱ oybyu̶ wa'adzpu̶ u̶xpu̶jku̶ñ y yajkapxykyu'ubu̶jkku̶xu̶ch pu̶njaty je̱'e̱ Dios y'ayuuk tyu̶y'ajt ka'p ixaan mu̶doowaangu̶xyu̶ñ.
10Je̱' ko may je̱'e̱ judío ja'ay jii ajku̶xy mu̶dyiibu̶ ka'p kyapxymyu̶doogu̶xyu̶ñ, mu̶dyiibu̶ yaj'u̶xpu̶jkku̶xpu̶ñ y yajmu̶guwaanu̶u̶ygyu̶xy je̱'e̱ mu̶bu̶jkpu̶du̶jk ko je̱'e̱ y'ung y'ana'k wan tzipku̶xp tu̶y'ajtu̶u̶ygyu̶xy du'un neby je̱'e̱ kyostumbre mu̶dajtku̶xyu̶ñ, myu̶naangu̶xy nigoo oy nebyjyaty y nika'anejwu̶u̶ygyu̶xy tii du'un kyápxku̶xypy myu̶dyaakku̶xypyu̶ñ, y du'un je̱'e̱ ja'ay win'u̶u̶ngu̶xy. 11M'agapxtúgu̶py je̱'e̱ du'umbu̶ ja'ay ajku̶xy mu̶dyiibu̶ je̱'e̱ mu̶bu̶jkpu̶du̶jk du'un kapx'iingu̶xpu̶ñ tu'kju̶u̶n tu'ktu̶jk; yaj'u̶xpu̶jkku̶xy mu̶dyiibu̶ ka'p tyu̶y'ajtu̶chu̶ñ, je̱' ko je̱'e̱ meeñ janch adzojkku̶xy.
12Nidu'ugtu̶ je̱'e̱ y'ayuuknajtzkapxu̶u̶ybyu̶ ajku̶xy mu̶dyiibu̶ najty jim nandu'un tzu̶naaby ma je̱'e̱ Creta naax mejy'agujkpu̶, nigapxy je̱'e̱ myu̶gugajpu̶du̶jk ajku̶xy: “Je̱'e̱ creta ja'ay ajku̶xy je'emy je̱'e̱ jyanch'anu̶u̶'játyu̶ch ajku̶xy, janch awa'anjáty je̱'e̱ ajku̶xy neby je̱'e̱ ju̶yujk animal awa'anbu̶ju̶ñ, janch kaxjaty y janch nuuxjáty je̱'e̱ ajku̶xy.” 13Y tu̶y'ajtu̶ñ je̱'e̱ du'un myu̶naañ. Paady oj mu̶gapx mu̶kta'agy ajku̶xy, wan je̱'e̱ Dios y'ayuuk tyu̶y'ajt tu'ug'aa tu'ugjoot mu̶bu̶jku̶ch ajku̶xy, 14y ka'pu̶ je̱'e̱ kapxy mu̶dya'agy kweentu̶tuungu̶xu̶ch mu̶dyiibu̶ je̱'e̱ judío ja'ay yajkojku̶xypyu̶ñ y nan ni je̱'e̱ ja'ay y'ane̱'e̱mu̶ñ mu̶dyiibu̶ je̱'e̱ tu̶y'ajt ka'p mu̶bu̶jkku̶xyu̶ñ.
15Pu̶n je̱'e̱ jyoot wyinma'añ oy wa'adz mu̶u̶du̶ñ ajku̶xy, oy naty je̱'e̱ kostumbre kuydyuungu̶xy y ka'akuydyuungu̶xy, ku'umaayu̶p je̱'e̱ Dios du'un ajku̶xy, je̱' ko je̱'e̱ jyoot wyinma'añ naty wa'adz mu̶u̶du̶ch ajku̶xy, peru̶ pu̶n je̱'e̱ Dios y'ayuuk tyu̶y'ajt ka'p mu̶bu̶kyu̶ñ ajku̶xy y pu̶n je̱'e̱ jyoot wyinma'añ ka'p wya'adzu̶ch ajku̶xy, oy naty je̱'e̱ kostumbre ja'akuydyuungu̶xy, ka'p je̱'e̱ Dios du'un kyu'umayii ajku̶xy, je̱' ko ju̶bu̶k y'aa jyoot y jyoot wyinma'añ je̱'e̱ mu̶u̶du̶ch ajku̶xy. 16Du'un je̱'e̱ du'umbu̶ ja'ay myu̶naangu̶xy ko je̱'e̱ Dios y'ayuuk tyu̶y'ajt mu̶bu̶jku̶yu̶ ajku̶xy, peru̶ mu̶u̶d je̱'e̱ mu̶dyiibu̶ tyuumby y'ijxku̶xypyu̶ñ jii je̱'e̱ yajni'igu̶xu̶'kku̶xy ko ka'p jaanch mu̶bu̶jkku̶xy, ka'p je̱'e̱ Dios y'ayuuk tyu̶y'ajt ixaangu̶xy tzogaangu̶xy y ka'p je̱'e̱ Dios kapxymyu̶doogu̶xy y nan ka'p ni tii oybyu̶ tuung tunaangu̶xy.
Currently Selected:
Tito 1: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005