San Juan 9
9
Jesús ja'ay tu'ug yajwindu̶kxu̶'u̶gy mu̶dyiibu̶ najty wiindz tu̶ myiñu̶ñ
1Jim najty je̱'e̱ Jesús ñaxy ko je̱'e̱ wiindzja'ay tu'ug ijxy, du'un najty je̱'e̱ tu̶ myiñ wiindz. 2Chi je̱'e̱ dyiscípulotu̶jk yajtu̶u̶wu̶ ajku̶xy:
—Windzú̶n, ¿ti adayaaba ja'ay ko wiindz tu̶ myiñ? ¿Pu̶n tu̶ pyokytyúñ, je̱'e̱ tyaj tyeedy ajku̶xy o yu̶'u̶ da'a ku̶'u̶m tu̶ pyokytyuñu̶?
3Chi je̱'e̱ Jesús y'adzoowu̶ ajku̶xy:
—Ka'p ko ku̶'u̶m tu̶ pyokytyúñ ni ko je̱'e̱ tyaj tyeedy tu̶ pyokytyuungu̶xy; paady je̱'e̱ du'un tu̶ myiñ, wan je̱'e̱ Dios myu̶k'ajtu̶ñ yajni'igu̶xu̶'u̶gu̶ch ma yu̶'u̶ju̶ñ. 4Tzu̶k je̱'e̱ Dios tyuung tuunu̶yu̶ ajtu̶m ajku̶xy je̱'e̱ mu̶dyiibu̶ u̶u̶ch ya naaxwiiñ tu̶ xykyexyu̶ñ; ma yam xyu̶u̶mnu̶ju̶ch, y ko naty je̱'e̱ koodzpu̶ myiinu̶ ka'p mu̶baad n'o'ktuunu̶nu̶ ajtu̶m ajku̶xy. 5Ma u̶u̶ch yam naaxwiiñ nyajpaatyñu̶ju̶ñ, u̶u̶ch je̱'e̱ tu̶y'ajt nmu̶u̶d ma je̱'e̱ naaxwiiñjya'ayu̶ñ, du'un u̶u̶ch neby tu'ug je̱'e̱ ju̶u̶n je̱'e̱ mu̶dyiibu̶ je̱'e̱ naaxwiiñjya'ay kudu̶kxp kujajpu̶ñ.
6Ko je̱'e̱ Jesús du'un myu̶naandaay, chi naaxkú̶xy chujy y yaj'o'ky je̱'e̱ mo'ondz we̱e̱nu̶ mu̶u̶d je̱'e̱ chujyñu̶u̶, y yajjáxu̶ je̱'e̱ wiindzja'ay wyiin je̱'e̱ mo'ondz. 7Chi nu̶maay:
—Nu̶kx naywyinbuj nayjyu̶jppúju̶ ma je̱'e̱ nu̶u̶'abojtzu̶'u̶gy mu̶dyiibu̶ xu̶u̶'ajtpu̶ñ Siloé (je̱'e̱ mu̶dyiibu̶ du'un wimbu̶dzu̶u̶mbu̶ñ: “Kexyo'oybyu̶”).
Chi je̱'e̱ wiindzja'ay ñu̶kxy y ñaywyinbuj ñayjyu̶jppuju̶, y ko wyimbijtnu̶ windú̶kxnu̶py najty. 8Je̱'e̱ myu̶ju̶u̶n myu̶du̶jk ajku̶xy y je̱'e̱ mu̶dyiibu̶ najty jékyu̶p tu̶ y'ixyii ko jaboom jaboom lyimoosnu̶ yujkwa'añ, chi ñayyajtu̶u̶du̶gu̶u̶yu̶gu̶xy amíñ u̶xu̶py:
—¿Nej ka'p adaa jye̱'e̱ju̶ch je̱'e̱ mu̶dyiibu̶ ijty xii ya u̶ñaaby lyimoosnu̶ yujkwa'añ?
9Nije̱' myu̶naangu̶xy:
—Jaanch, yu̶'u̶ je̱'.
Nije̱' je̱'e̱ wiingpu̶ myu̶naangu̶xy:
—Ka'p, ka'p yu̶'u̶ jye̱'e̱ju̶ch, oy du'un jya'aku̶xu̶'u̶gy.
Peru̶ je̱' ku̶'u̶m mu̶naan:
—Jaanch, u̶u̶ch je̱'.
10Mu̶'it yajtu̶u̶gu̶xy:
—¿Y neby mwiindu̶kxu̶'ky?
11Chi je̱' y'adzoowu̶gu̶xy:
—Je̱'e̱ ja'ay mu̶dyiibu̶ Jesús xu̶u̶'ajtpu̶ñ, je̱' je̱'e̱ mo'ondz yaj'o'k mu̶u̶d je̱'e̱ chujyñu̶; xyajjáxu̶ch je̱'e̱ nwiin y xyñu̶maayu̶ch: ‘Nu̶kx ma je̱'e̱ nu̶u̶'abojtzu̶'u̶gy mu̶dyiibu̶ xu̶u̶'ajtpu̶ñ Siloé, y naywyinbuj nayjyu̶jppúju̶ jim.’ Chi u̶u̶ch nnu̶kxy, y ko u̶u̶ch nnaywyinbuj nnayjyu̶jppuju̶, mu̶'it u̶u̶ch nwiindu̶kxu̶'ky.
12Mu̶'it yajtu̶u̶gu̶xy:
—¿Ma je̱'e̱ ja'ay?
Y chi je̱' y'adzoowu̶gu̶xy:
—Ka'p u̶u̶ch nnejwu̶'u̶y.
Fariseotu̶jk je̱'e̱ wiindzja'ay yajtu̶u̶gu̶xy mu̶dyiibu̶ tzooku̶ñ
13Chi je̱'e̱ ja'ay je̱'e̱ tu̶u̶bu̶ najty wyindu̶kxu̶'u̶gy yajnú̶kxu̶ ma je̱'e̱ fariseotu̶jk wyinduuy ajku̶xyu̶ñ. 14Y pokxyxyu̶u̶ najty mu̶naa je̱'e̱ Jesús mo'ondz yaj'o'ogyu̶ñ mu̶u̶d je̱'e̱ chujyñu̶u̶ y yajwindu̶kxu̶'ky je̱'e̱ wiindzja'ay. 15Chi je̱'e̱ fariseotu̶jk yajtu̶u̶wu̶ ajku̶xy neby najty tu̶ wyindu̶kxu̶'u̶gyu̶ñ. Y chi je̱' y'adzoowu̶gu̶xy:
—Mo'ondz u̶u̶ch je̱'e̱ xypyu̶daaku̶ ma u̶u̶ch je̱'e̱ nwiinu̶ñ, y nnaywyinbuj nnayjyu̶jppuju̶ch y mu̶'it u̶u̶ch nwindu̶kxu̶'ky.
16Chi je̱'e̱ fariseotu̶jk nije̱' myu̶naangu̶xy:
—Je̱'e̱ ja'ay mu̶dyiibu̶ du'un tu̶ y'adu̶'u̶chu̶ñ ka'p je̱'e̱ Dios tu̶ kyexyii, je̱' ko je̱'e̱ pokxyxyu̶u̶ ka'p amay'aty.
Peru̶ nije̱' je̱'e̱ wiingpu̶ najty myu̶naangu̶xy:
—¿Peru̶ neby je̱'e̱ ijxpe̱jt mu̶jwinma'añbyu̶ tuñ, pu̶nu̶ pokyjya'ay je̱'?
Ka'p ñay'ayuukwinju̶wu̶u̶yu̶ ajku̶xy, y chi me̱jtzpú̶ky ñayyajwa'kxu̶ ajku̶xy, 17y chi je̱'e̱ ja'ay ja'adu'ook yajtu̶u̶gu̶xy je̱'e̱ mu̶dyiibu̶ najty jékyu̶p wiindzu̶ñ:
—Y miich, ¿nej m'okmu̶naambu̶? ¿Pu̶n ja'ay je̱' je̱'e̱ tu̶u̶bu̶ xyajwindu̶kxu̶'u̶gy?
—Chi je̱' y'adzooy:
—Bueno u̶u̶ch mu̶naamb ko Dios y'ayuuknajtzkapxu̶u̶ybyu̶ju̶ch.
18Peru̶ je̱'e̱ judío ja'ay ajku̶xy ka'p najty je̱'e̱ timymyu̶bu̶gaangu̶xy ko je̱'e̱ ja'ay najty wyiindzu̶ch y ko najty tu̶ wyiindu̶kxu̶'knu̶, u̶xtu̶ koonu̶ je̱'e̱ tyaj tyeedy mu̶jwoowu̶ ajku̶xy, 19y yajtu̶u̶gu̶xy:
—¿Nej miich adaa m'ung ajku̶xy? ¿Nigápxku̶x nej jaanch yu̶'u̶ wiindz myiiñu̶? ¿Y neby tu̶ wyiindu̶kxu̶'u̶gy?
20Chi je̱'e̱ tyaj tyeedy y'adzoogu̶xy:
—Jaanch, u̶u̶ch n'ung yu̶'u̶ ajku̶xy, y jaanch yu̶'u̶ wiindz myiiñ, 21peru̶ ka'p u̶u̶ch nnejwu̶u̶ygyu̶xy neby yu̶'u̶ tu̶ wyiindu̶kxu̶'u̶gyu̶ñ, y nan ka'p u̶u̶ch nnejwu̶u̶ygyu̶xy pu̶n je̱'e̱ tu̶ yajtzo'ogyiiju̶ñ. Yu̶'u̶ yajtu̶u̶gu̶x; mu̶j'ana'ku̶ñ yu̶'u̶, y mu̶baad yu̶'u̶ ku̶'u̶m nigapxy.
22Paady je̱'e̱ tyaj tyeedy du'un y'adzoogu̶xy, je̱' ko najty chu̶gu̶u̶ygyu̶xy, je̱' ko tu̶ je̱'e̱ judío ja'ay najty ñaygyápxu̶gu̶xy ko yajpu̶dzu̶maangu̶xy ma je̱'e̱ naymyujktaaktu̶ñ pu̶njaty du'un mu̶naambu̶ñ ko je̱'e̱ Jesús jye̱'e̱ju̶ch je̱'e̱ Cristo. 23Paady je̱'e̱ tyaj tyeedy du'un myu̶naangu̶xy: “Yu̶'u̶ yajtu̶u̶gu̶x, mu̶j'ana'ku̶ñ yu̶'u̶.”
24Chi je̱'e̱ judío ja'ay ja'adu'ook mu̶jwoogu̶xy je̱'e̱ ja'ay, je̱'e̱ mu̶dyiibu̶ najty jékyu̶p wiindzu̶ñ, y nu̶maaygyu̶xy:
—Awaanu̶gyu̶ch ajku̶xy tu̶y tu'uda'agy pu̶nu̶ y'ijxypy je̱'e̱ Dios. U̶u̶ch nnejwu̶u̶byu̶ch ajku̶xy ko je̱'e̱ Jesús pyokyjya'ayu̶ch.
25Mu̶'it je̱' y'adzoowu̶ ajku̶xy:
—U̶u̶ch ka'p u̶u̶ch nnejwu̶'u̶y pu̶nu̶ pokyjya'ay je̱' o pu̶nu̶ ka'p. Je̱'e̱ mu̶dyiibu̶ u̶u̶ch tu'kpajk nnejwu̶u̶ybyu̶ñ je̱' je̱' ko u̶u̶ch najty nwiindzu̶ch y cham ijxnu̶byu̶chu̶ñ.
26Chi ja'adu'ook yajtu̶u̶gu̶xy:
—¿Neby je̱'e̱ tu̶ xytyuñ? ¿Ti tu̶ tuñ ko tu̶ xyajwindu̶kxu̶'u̶gy?
27Mu̶'it y'adzoowu̶gu̶xy:
—Tu̶ nja'a''awaanu̶ ajku̶xy, peru̶ ka'p u̶u̶ch je̱'e̱ n'ayuuk xymyu̶bu̶jku̶ ajku̶xy. ¿Ti u̶u̶ch ko ja'adu'ook xyajnigapxaangu̶xy? ¿Nej mbanu̶kxaanu̶py je̱'e̱ y'ayuuk tyu̶y'ajt miich nandu'un ajku̶xyu̶?
28Mu̶'it ojku̶xy yaaxku̶xy, y nu̶maaygyu̶xy:
—Miich yu̶'u̶ jiibu̶ ja'ay y'ayuuk tyu̶y'ajt mbanú̶kxu̶py, peru̶ u̶u̶ch ajku̶xy je̱'e̱ Moisés y'ayuuk tyu̶y'ajt mbanú̶kxku̶xypy. 29U̶u̶ch nnejwu̶u̶ygyu̶xypyu̶ch ko je̱'e̱ Moisés Dios myu̶gapxu̶, peru̶ yu̶'u̶ jiibu̶ ja'ay ni nga'anejwu̶u̶ygyu̶xyu̶ch maa yu̶'u̶ chooñu̶ñ.
30Chi je̱'e̱ ja'ay y'adzooy je̱'e̱ mu̶dyiibu̶ najty jékyu̶p wiindzu̶ñ:
—Oyyajju̶wu̶u̶yñu̶ je̱'e̱ du'un ko miich mga'anejwu̶u̶ygyu̶xy ma je̱'e̱ tu̶ chooñu̶ñ, peru̶ tu̶ u̶u̶ch je̱'e̱ xyajwindu̶kxu̶'u̶gy. 31Oy yajxón nnejwu̶u̶yu̶m ajku̶xy ko je̱'e̱ Dios ka'p je̱'e̱ pokyjya'aydyu̶jk y'ayuuk amdo'ijtu̶; je̱' je̱'e̱ y'ayuuk je'eyu̶ y'amdo'ijtu̶py je̱'e̱ mu̶dyiibu̶ windzu̶gu̶u̶yu̶gu̶xpu̶ñ y je̱'e̱ mu̶dyiibu̶ je̱'e̱ y'ayuuk tyu̶y'ajt du'un kuydyuunu̶gu̶xpu̶ñ neby je̱' tzokyu̶ñ. 32Nimu̶naa du'un kya'ayajmu̶dóyñu̶ ko je̱'e̱ ja'ay wiindzja'ay yajwindu̶kxu̶'u̶gy mu̶dyiibu̶ du'un tu̶ myiñu̶ñ wiindz. 33Ko u̶xyu̶py adayaaba ja'ay je̱'e̱ Dios tu̶ kya'akexyii, ka'p u̶xyu̶py yu̶'u̶ tii tuñ.
34Mu̶'it ñu̶maayu̶ ajku̶xy:
—Miich tu̶ mmiñ pokymyu̶u̶d ku̶dyeeymyu̶u̶d, y ¿ti u̶u̶ch miich xyajni'ixu̶'u̶waamb ajku̶xy?
Y chi yajpu̶dzu̶u̶mu̶ ajku̶xy ma je̱'e̱ naymyujktaaktu̶ñ.#9.34 Ma je̱'e̱ naymyujktaaktu̶ñ du'un neby je̱'e̱ v. 22 myu̶na'añu̶ñ. Ma je̱'e̱ texto griego ka'p adayaaba texto tu'ktúkypyu̶ jiiby yajpaady.
Je̱'e̱ ja'ay mu̶dyiibu̶ je̱'e̱ Dios y'ayuuk tyu̶y'ajt ka'p mu̶bu̶jkku̶xyu̶ñ, du'un je̱'e̱ ajku̶xy neby wiindzpu̶ju̶ñ
35Jesús ñejwu̶u̶y je̱'e̱ du'un ko najty tu̶ yajpu̶dzu̶myii ma je̱'e̱ naymyujktaaktu̶ñ, je̱'e̱ mu̶dyiibu̶ najty jékyu̶p wiindzu̶ñ; y ko oy mu̶dnaybyaadyii, chi yajtu̶u̶y:
—¿Nej mmu̶bu̶jkypy mmu̶jpu̶daakypy miich je̱'e̱ ja'ay je̱'e̱ mu̶dyiibu̶ tzon tzajpjooty?
36Chi je̱' y'adzooy:
—Windzú̶n, awaanu̶gyu̶ch pu̶n je̱'e̱ du'un, wan u̶u̶ch je̱' y'ayuuk tyu̶y'ajt nmu̶bu̶jku̶yu̶ch.
37Chi je̱'e̱ Jesús y'adzoowu̶:
—Tu̶ je̱'e̱ m'ixy; u̶u̶ch je̱'e̱ du'un, pu̶n yam xymyu̶dmu̶dyaakpu̶ñ.
38Mu̶'it je̱'e̱ ja'ay ñayñajtzkojxtu̶na'awu̶u̶yu̶ ma je̱'e̱ Jesús wyinduuyu̶ñ, y nu̶maay:
—Nmu̶bu̶jkypyu̶ch, Windzú̶n.
39Mu̶'it je̱'e̱ Jesús myu̶naañ:
—U̶u̶ch paady u̶u̶ch ya naaxwiiñ tu̶ nmiñ neby u̶u̶ch je̱'e̱ ja'ay ndu̶ydyúnu̶chu̶ñ, neby mu̶baad wyindu̶kxu̶'kku̶xyu̶ñ je̱'e̱ mu̶dyiibu̶ du'un yajpaatku̶xpu̶ñ neby je̱'e̱ wiindzpu̶ ajku̶xyu̶ñ y neby wyiindzu̶u̶ygyu̶xu̶chu̶ñ je̱'e̱ mu̶dyiibu̶ du'un ja'awindú̶kxku̶xpu̶ñ.
40Nije̱' je̱'e̱ fariseotu̶jk ajku̶xy mu̶dyiibu̶ najty jim tu̶naaygyu̶xpu̶ñ ma je̱'e̱ Jesús ñamu̶jku̶ñ, ko adaa du'un mu̶doogu̶xy, chi je̱'e̱ Jesús nu̶maaygyu̶xy:
—¿Nej nan wiindzu̶ch u̶u̶ch nandu'un ajku̶xyu̶?
41Chi je̱'e̱ Jesús y'adzoowu̶gu̶xy:
—Ko u̶xyu̶py miich m'okwiindzu̶ch ajku̶xy, ka'p u̶xyu̶py je̱'e̱ poky ku̶dyeey m'ixy'ajtku̶xy. Peru̶ je̱' ko du'un mmu̶naangu̶xy ko m'ijxku̶xy, paady mbokymyu̶u̶du̶ch ajku̶xy.
Currently Selected:
San Juan 9: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005