San Juan 8
8
1Mu̶'it je̱'e̱ Jesús pya'ttu̶gu̶u̶y ma je̱'e̱ kopt mu̶dyiibu̶ xu̶u̶'ajtpu̶ñ Olivos, 2y kujaboom jopy je̱'e̱ Jesús ja'adu'ook wyimbijty ma je̱'e̱ mu̶jtzajptu̶jku̶ñ. Chi je̱'e̱ mayjya'ay ñimiinu̶, y chi ñaxwech y yaj'u̶xpu̶jktu̶gu̶u̶y je̱'e̱ mayjya'ay.
3Mu̶'it je̱'e̱ Moisés y'ane̱'e̱mu̶ñ windzu̶ndu̶jk y je̱'e̱ fariseotu̶jk ajku̶xy je̱'e̱ Jesús to'oxyu̶jk tu'ug yajninú̶kxku̶xy, je̱'e̱ mu̶dyiibu̶ je̱'e̱ wiingpu̶ ya'aydyu̶jk najty tu̶ yajmu̶badu̶u̶ygyu̶xyu̶ñ mu̶dtuundu̶góy najty. Chi pu̶daakku̶xy mayjya'ay'agujk, 4y chi je̱'e̱ Jesús nu̶maaygyu̶xy:
—Windzú̶n, adayaaba to'oxyu̶jk wiingpu̶ ya'aydyu̶jk u̶u̶ch adaa tu̶ nyajmu̶badu̶u̶ygyu̶xy mu̶dtuundu̶góy najty. 5Ma u̶u̶ch je̱'e̱ ngu'utujku̶ñ ajku̶xy, du'un je̱'e̱ Moisés jiiby jékyu̶p y'ane'emy ko adaa du'umbu̶ to'oxyu̶jktu̶jk yajtzaagu'uga'tzku̶xu̶ch. ¿Miich nej m'okmu̶naambu̶?
6Je̱' paady je̱'e̱ yajtu̶u̶gu̶xy okjoot'íx okwinma'añ'ixaangu̶xy, y u̶xtaaygyu̶xy neby mu̶baad xu̶'u̶gu̶xyu̶ñ. Chi je̱'e̱ Jesús wyindaaky y jyaaydyu̶gu̶u̶y mu̶u̶d je̱'e̱ kyu̶'u̶wa'axk naaxkú̶xy. 7Je̱' ko yajtu̶u̶'adu̶u̶tzku̶xypy najty, chi je̱'e̱ Jesús tyu̶naayu̶'ky y ñu̶maayu̶ ajku̶xy:
—Pu̶n ka'p pyokymyu̶u̶d kyu̶dyeeymyu̶u̶du̶ch ma miich ajku̶xyu̶ñ, wan je̱'e̱ tzaa konu̶'u̶gy y ka'adzu̶ch jayu̶jp adayaaba to'oxyu̶jk.
8Y chi je̱'e̱ Jesús ja'adu'ook wyindaaknu̶ba y jyaay'adu̶u̶ch naaxkú̶xy. 9Ko adayaaba ayuuk du'un mu̶doogu̶xy neby je̱'e̱ Jesús myu̶naañu̶ñ, chi ixy ka'a'íxy yo'oychóngu̶xnu̶, je̱'e̱ amu̶jja'aydyu̶jk jayu̶jp yo'oychóngu̶x, jyu̶wu̶u̶ygyu̶x je̱'e̱ pyoky kyu̶dyeey du'un. Ko je̱'e̱ Jesús nime̱tzk wyu̶'u̶mgu̶xy mu̶u̶d je̱'e̱ to'oxyu̶jk, 10chi wya'kkugu̶u̶y y yajtu̶u̶y:
—To'oxyu̶jk, ¿maaju̶tz je̱'e̱ ja'ay ajku̶xy mu̶dyiibu̶ tu̶ xyu̶'u̶gu̶xyu̶ñ? ¿Ka'p ni pu̶n tu̶ xychaachtyúñ mu̶u̶d je̱'e̱ mboky?
11Chi je̱'e̱ to'oxyu̶jk y'adzooy:
—Ka'p ni pu̶n, Windzú̶n.
Chi je̱'e̱ Jesús je̱'e̱ to'oxyu̶jk nu̶maay:
—Ni u̶u̶ch miich nga'atzaachtyúnu̶ch mu̶u̶d je̱'e̱ mboky; nu̶kxnu̶ y ka'p m'okpokytyuunu̶ch.]#8.11 Adayaaba texto korchete mu̶u̶dpu̶, niwe̱e̱nu̶ je̱'e̱ jaaybyu̶du̶jk je'eyu̶ tu̶ paatku̶xy.
Jesús du'un je̱' neby tu'ug je̱'e̱ ju̶u̶n ma je̱'e̱ naaxwiiñjya'ayu̶ñ
12Chi je̱'e̱ Jesús je̱'e̱ ja'ay ja'adu'ook mu̶gápxnu̶ba, nu̶maaygyu̶xy:
—U̶u̶ch je̱'e̱ tu̶y'ajt nmu̶u̶d ma je̱'e̱ naaxwiiñjya'ayu̶ñ; du'un u̶u̶ch neby tu'ug je̱'e̱ ju̶u̶n mu̶dyiibu̶ je̱'e̱ naaxwiiñjya'ay kudu̶kxp kujajpu̶ñ, pu̶n u̶u̶ch je̱'e̱ n'ayuuk ndu̶y'ajt xymyu̶bu̶jku̶byu̶ñ, pyaadu̶py je̱'e̱ tu̶y'ajtu̶ñ mu̶dyiibu̶ je̱'e̱ jugy'ajtu̶ñ wiinu̶u̶xu̶u̶bu̶ ye̱jkpu̶ñ, y nimu̶naa je̱'e̱ agootztuuby kya'ayajpaadu̶ch.
13Mu̶'it je̱'e̱ fariseotu̶jk je̱'e̱ Jesús nu̶maaygyu̶xy:
—Miich ku̶'u̶m du'un mnayñidu̶y'ajt'adyii ko du'un tyu̶y'ajtu̶ch: yu̶'u̶ du'umbu̶ nidu̶y'ajt'adyiibyu̶ ka'p je̱'e̱ du'un tyu̶y'ajtu̶ch.
14Chi je̱'e̱ Jesús y'adzoowu̶gu̶xy:
—Ko u̶u̶ch ku̶'u̶m nnayñidu̶y'ajt'adyii, jaanch je̱'e̱ du'un tyu̶y'ajtu̶ch; oy u̶u̶ch du'un ku̶'u̶m nja'anidu̶y'ajt'adyii, peru̶ jaanch je̱'e̱ du'un tyu̶y'ajtu̶ch. Je̱' ko u̶u̶ch nnejwu̶u̶by ma u̶u̶ch tu̶ ndzooñu̶ñ y ma u̶u̶ch nnu̶kxyu̶ñ; y miich ajku̶xy ka'p mnejwu̶u̶ygyu̶xy ma u̶u̶ch tu̶ ndzooñu̶ñ y ma u̶u̶ch nnu̶kxyu̶ñ. 15Miich ajku̶xy mboky'ijxku̶xypy je̱'e̱ mmu̶gu'ugtu̶jk nigoo mu̶u̶d je̱'e̱ mgu̶'u̶mwinma'añ ajku̶xy. Peru̶ u̶u̶ch ka'p u̶u̶ch ni pu̶n nigoo nboky'ixy; 16peru̶ pu̶nu̶ nboky'ijxypyu̶ch je̱'e̱ ja'ay, tu̶y tu'uda'agy u̶u̶ch je̱'e̱ nboky'ixy mu̶u̶d je̱'e̱ tu̶y'ajtu̶, je̱' ko ka'p je̱'e̱ u̶u̶ch naydyu'um nboky'ijxypy, je̱'e̱ Dios Teedy mu̶dyiibu̶ u̶u̶ch ya naaxwiiñ tu̶ xykyexyu̶ñ je̱' u̶u̶ch je̱'e̱ mu̶u̶d nboky'ixy. 17Je̱' ko du'un jiiby kuja'ay myiñ ma je̱'e̱ mgu'utujku̶ñ miich ajku̶xyu̶ñ ko je̱'e̱ me̱tzkpu̶ nidu̶y'ajt'ajtpu̶ y'ayuuk naty tyu'ugu̶u̶ygyu̶xy; mu̶'it je̱'e̱ nidu̶y'ajt'adyiibyu̶ naty du'un jaanch tyu̶y'ajtu̶ch. 18U̶u̶ch ku̶'u̶m nnayñidu̶y'ajt'ajtu̶p ko du'un jaanch tyu̶y'ajtu̶ch, y je̱'e̱ Dios Teedy mu̶dyiibu̶ u̶u̶ch ya naaxwiiñ tu̶ xykyexyu̶ñ je̱' ja'adu'ug testigo.
19Mu̶'it je̱'e̱ Jesús yajtu̶u̶gu̶xy:
—¿Ma je̱'e̱ mDeedy?
Chi je̱'e̱ Jesús y'adzoowu̶ ajku̶xy:
—Miich ajku̶xy ka'p u̶u̶ch miich xy'ixy'ajtku̶xy, nan ka'p u̶u̶ch je̱'e̱ nDeedy miich xy'ixy'ajtu̶ ajku̶xy; ko u̶u̶ch u̶xyu̶py miich xy'ok'ixy'ajtku̶xy, nan m'ixy'ajtypy u̶xyu̶py ajku̶xy pu̶n u̶u̶ch nDeedy'ajtypyu̶ñ.
20Jiiby je̱'e̱ Jesús du'un kyapxy myu̶dyaaky mu̶wingón je̱'e̱ limoosnu̶ kaaxu̶ ma je̱'e̱ mu̶jtzajptu̶jku̶ñ; cham je̱'e̱ mayjya'ay najty yaj'u̶xpú̶ky. Peru̶ ka'p ni pu̶n myajtzu̶, je̱' ko ka'anu̶ je̱'e̱ tyiempo najty paatyñu̶ mu̶naa yajmádzu̶chu̶ñ.
“Ma u̶u̶ch nnu̶kxyu̶ñ, miich ajku̶xy ka'p mu̶baad mnú̶kxku̶xy”
21Chi je̱'e̱ Jesús ja'adu'ook ñu̶maayu̶gu̶xnu̶ba:
—U̶u̶ch nnu̶kxaanu̶byu̶ch, y miich xy'u̶xta'awu̶bu̶ch miich ajku̶xy, peru̶ je̱'e̱ mboky ju̶bu̶ktuum xyajka'agu̶xu̶p. Ma u̶u̶ch nnu̶kxyu̶ñ, miich ajku̶xy ka'p mu̶baad mnú̶kxku̶xy.
22Chi je̱'e̱ judío ja'ay myu̶naangu̶xy:
—¿Nej yu̶'u̶ da'a wyinmay ko ku̶'u̶m ñayyaj'o'oga'añyii, y paady du'un myu̶na'añ ko ka'p mu̶baad nnú̶kxu̶m ajku̶xy ma yu̶'u̶ ñu̶kxyu̶ñ?
23Chi je̱'e̱ Jesús ñu̶maayu̶ ajku̶xy:
—Miich ajku̶xy ya miich mdzóngu̶xy ma adayaaba naaxwiiñu̶ñ, peru̶ u̶u̶ch ka'p u̶u̶ch ya ndzooñ ma adayaaba naaxwiiñu̶ñ; jiiby tzajpjooty u̶u̶ch ndzooñ. 24Paady du'un tu̶ nnu̶maaygyu̶xy ko pokymyu̶u̶d ku̶dyeeymyu̶u̶d m'o'kku̶xu̶ch; je̱' ko naty mga'amu̶bu̶jkku̶xy pu̶n u̶u̶chu̶ñ, pokymyu̶u̶d ku̶dyeeymyu̶u̶d m'o'kku̶xu̶ch.
25Mu̶'it je̱'e̱ Jesús yajtu̶u̶gu̶xy:
—¿Miich, pu̶n miich?
Chi je̱'e̱ Jesús y'adzoowu̶gu̶xy:
—Chi ja'adu'knáx, ¿ti miich ko ti n'awaan n'adiju̶ch ajku̶xy?#8.25 Chi ja'adu'knáx, ¿ti miich ko ti n'awaan n'adiju̶ch ajku̶xy?: nije̱' wiingpu̶ jaaybyu̶du̶jk myu̶naangu̶xy: Je̱' u̶u̶ch neby timyjyayu̶jp'ajt tu̶ nnu̶maaygyu̶xyu̶ñ. 26U̶u̶ch may u̶u̶ch je̱'e̱ ayuuk nmu̶u̶du̶ch mu̶dyiibu̶ nyajnu̶ma'awaangu̶xypyu̶ñ y mu̶dyiibu̶ mu̶u̶d ndu̶ydyunaangu̶xyu̶ñ ko je̱'e̱ Dios tu̶ mmu̶duundu̶gooygyu̶xy, peru̶ je̱'e̱ mu̶dyiibu̶ u̶u̶ch ya naaxwiiñ tu̶ xykyexyu̶ñ tu̶y'ajt je̱'e̱ kyapxy; y du'un neby u̶u̶ch je̱'e̱ naaxwiiñjya'ay nnu̶ma'ayu̶ñ, je̱' u̶u̶ch du'un tu̶ nmu̶doy myu̶na'añ du'un.
27Peru̶ je̱' ka'p je̱'e̱ winju̶wu̶u̶y ajku̶xy ko je̱'e̱ Dios Teedy najty je̱'e̱ Jesús du'un tyijpy. 28Paady je̱'e̱ Jesús ñu̶maayu̶gu̶xy:
—Ko u̶u̶ch naty miich tu̶ xyajcruutzpe̱jtku̶xy, u̶u̶ch je̱' je̱'e̱ ja'ay mu̶dyiibu̶ tzon tzajpjooty, mu̶'it mnejwu̶u̶ygyu̶xu̶ch pu̶n u̶u̶chu̶ñ, y ko u̶u̶ch ka'p tii nduñ ku̶'u̶mjoot ku̶'u̶mwinma'añ; je̱'e̱ u̶u̶ch je'eyu̶ ngapxypy nmu̶dyaakypy mu̶dyiibu̶ u̶u̶ch je̱'e̱ Dios Teedy tu̶ xyajni'ixu̶'u̶yu̶ñ. 29Je̱'e̱ mu̶dyiibu̶ u̶u̶ch ya naaxwiiñ tu̶ xykyexyu̶ñ, je̱' u̶u̶ch mu̶u̶d n'ity; y ka'p u̶u̶ch je̱'e̱ nDeedy naydyu'um xy'u̶xmachñu̶, je̱' ko je'emy u̶u̶ch du'un nduñ du'un neby je̱' tzokyu̶ñ.
30Ko je̱'e̱ Jesús du'un myu̶naañ, may je̱'e̱ ja'ay y'ayuuk tyu̶y'ajt myu̶bu̶jkku̶xu̶.
Je̱'e̱ mu̶dyiibu̶ je̱'e̱ Dios ung'ajtu̶bu̶ñ ajku̶xy y je̱'e̱ mu̶dyiibu̶ je̱'e̱ ju̶bu̶kpu̶ ane̱'e̱mu̶bu̶ñ ajku̶xy
31Chi je̱'e̱ Jesús nu̶maay je̱'e̱ judío ja'ay ajku̶xy je̱'e̱ mu̶dyiibu̶ je̱'e̱ y'ayuuk tyu̶y'ajt najty tu̶ myu̶bu̶jkku̶xu̶ ajku̶xy:
—Pu̶nu̶ xymyu̶bu̶jku̶byu̶ch je̱'e̱ n'ayuuk ndu̶y'ajt ajku̶xy y pu̶nu̶ ka'p nimu̶naa m'u̶xmajtzku̶xy, mu̶'it u̶u̶ch miich jaanch ndiscípulos'ajtku̶xu̶ch, 32y mnejwu̶u̶ygyu̶xu̶ch je̱'e̱ tu̶y'ajt y je̱'e̱ tu̶y'ajt xyaj'awa'adzpu̶dzu̶u̶mgu̶xu̶p.
33Chi je̱' oy y'adzoogu̶xy:
—U̶u̶ch Abraham u̶u̶ch xy'ok'ung xy'ok'ana'k'ajtp ajku̶xy, y nimu̶naa u̶u̶ch du'un nga'a'ijtku̶xyñu̶ neby je̱'e̱ tuumbu̶ ni'idoogypyu̶ju̶ñ ajku̶xy. ¿Y ti miich ko du'un mmu̶na'añ ko u̶u̶ch n'awa'adzpu̶dzu̶u̶mgu̶xu̶ch?
34Chi je̱'e̱ Jesús ñu̶maayu̶gu̶xy:
—Janch tu̶y'ajtu̶ñ du'un nnu̶maaygyu̶xy ko ku̶xyu̶ pu̶njaty pokytyuungu̶xpu̶ñ, je̱'e̱ ju̶bu̶kpu̶ je̱'e̱ ane̱'e̱mu̶gu̶xp. 35Tu'ug je̱'e̱ ja'ay ni'idoogypyu̶ ka'p je̱'e̱ wiinu̶u̶xu̶u̶ y'ijtu̶y ma myu̶duñu̶ñ; peru̶ tu'ug je̱'e̱ ung ijtu̶u̶b je̱'e̱ wiinu̶u̶xu̶u̶ ma je̱'e̱ jyu̶u̶n tyu̶jku̶ñ. 36Y du'unu̶tz, pu̶nu̶ xyaj'awa'adzpu̶dzu̶u̶mgu̶xp je̱'e̱ Dios y'Ung, mu̶'it miich du'un jaanch m'awa'adzpu̶dzu̶u̶mgu̶xu̶ch. 37U̶u̶ch nnejwu̶u̶ybyu̶ch ko je̱'e̱ Abraham miich xy'ok'ung xy'ok'ana'k'ajtku̶xy; peru̶ xyaj'o'ogaambu̶ch miich ajku̶xy, je̱' ko u̶u̶ch je̱'e̱ n'ayuuk ndu̶y'ajt xykya'aku'ubu̶jku̶ ajku̶xy du'un neby nja'anu̶maaygyu̶xyu̶ñ. 38U̶u̶ch je̱' u̶u̶ch ngapxypy nmu̶dyaakypy je̱'e̱ tu̶u̶bu̶ u̶u̶ch je̱'e̱ nDeedy xyaj'íxy xyajnejwu̶'u̶y, y miich ajku̶xy je̱' miich mduungu̶xypy je̱'e̱ mu̶dyiibu̶ je̱'e̱ mdeedy tu̶ xyajnu̶maaygyu̶xyu̶ñ.
39Mu̶'it je̱' myu̶naangu̶xy:
—¡Je̱'e̱ Abraham u̶u̶ch nmu̶j'ap'ajtypy nmu̶jteedy'ajtypy ajku̶xy!
Chi je̱'e̱ Jesús y'adzoowu̶gu̶xy:
—Ko u̶xyu̶py miich jaanch xy'ok'ung'aty xy'ok'ana'k'áty ajku̶xy je̱'e̱ Abraham, du'un u̶xyu̶py mja'ay'áty ajku̶xy neby je̱' jya'ay'ajtyu̶ñ. 40Peru̶ xyaj'o'ogaambu̶ch miich ajku̶xy, oy je̱'e̱ tu̶y'ajtu̶ñ tu̶ nja'ayajmu̶dmu̶dyaakku̶xy neby u̶u̶ch je̱'e̱ Dios tu̶ xyñu̶ma'ay. ¡Ka'p je̱'e̱ Abraham du'un mu̶naa y'adu̶u̶ch du'un neby miich m'adu̶'u̶dzaangu̶xyu̶ñ! 41Miich timydyu'un miich mja'ay'ajtku̶xy neby je̱'e̱ mdeedy jya'ay'ajtku̶xyu̶ñ.
Chi je̱' Jesús nu̶maaygyu̶xy:
—¡Ka'p u̶u̶ch nnaydyu'um'úng u̶u̶ch ajku̶xy; tu'ug u̶u̶ch je̱'e̱ ndeedy je'eyu̶ ajku̶xy y je̱'e̱ Dios je̱'!
42Chi je̱'e̱ Jesús y'adzoowu̶gu̶xy:
—Ko u̶xyu̶py je̱'e̱ Dios jaanch m'okteedy'ajtku̶xy, xychojkpu̶ch xyjyu̶wu̶u̶ybyu̶ch u̶xyu̶py miich ajku̶xy, je̱' ko jiiby u̶u̶ch ndzooñ ma je̱'e̱ Diosu̶ñ y chaa u̶u̶ch cham nyajpaady ya naaxwiiñ. Ka'p u̶u̶ch ku̶'u̶mjoot ku̶'u̶mwinma'añ tu̶ nmiñ, je̱'e̱ Dios u̶u̶ch ya naaxwiiñ tu̶ xykyexy. 43¿Ti u̶u̶ch je̱'e̱ n'ayuuk ndu̶y'ajt ko miich xykya'awinju̶wu̶u̶yu̶ ajku̶xy? Paady je̱'e̱ mga'awinju̶wu̶u̶ygyu̶xy je̱' ko u̶u̶ch je̱'e̱ n'ayuuk ka'p xytyimymyu̶dowaanu̶ ajku̶xy. 44Miich je̱' miich mdeedy'ajtypy ajku̶xy je̱'e̱ mu̶jku'u; je̱' miich xykyu̶'u̶'aam'ajtku̶xp y mduungu̶xy nebyjyaty je̱'e̱ y'aa jyoot tzokyu̶ñ. Je̱'e̱ mu̶jku'u je̱' je̱'e̱ ja'ayyaj'o'ogu̶u̶ yajtzondaak maabu̶ je̱'e̱ naaxwiiñ chondaakyu̶ñ. Ka'p je̱'e̱ Dios tyu̶y'ajt nimu̶naa kuydyuunu̶, y nimu̶naa tu̶y'ajt kya'akápxy kya'amu̶dya'agy. Ko y'anu̶u̶'ajttu̶gu̶'u̶y, du'un je̱'e̱ kyapxy myu̶dya'agy neby it je̱'e̱ jaanchpyu̶ju̶ñ; je̱' ko jyanch'anu̶u̶ju̶ch y je̱' je̱'e̱ anu̶u̶'adu̶u̶ nigopt'ajtp. 45Peru̶ u̶u̶ch je̱'e̱ tu̶y'ajtu̶ñ miich nyajmu̶dmu̶dyaakku̶xypy, y miich ka'p u̶u̶ch je̱'e̱ n'ayuuk ndu̶y'ajt xymyu̶bu̶jku̶ ajku̶xy. 46¿Pu̶n jii ma miich ajku̶xyu̶ñ mu̶dyiibu̶ ijx nejwu̶u̶ybyu̶ñ ko u̶u̶ch nbokyjya'ayu̶ch? Y pu̶nu̶ je̱'e̱ tu̶y'ajtu̶ñ ngapxypy nmu̶dyaakypyu̶ch, ¿ti u̶u̶ch je̱'e̱ n'ayuuk ndu̶y'ajt ko xykya'amu̶bu̶jku̶ ajku̶xy? 47Mu̶dyiibu̶ yajpaatp ma je̱'e̱ Diosu̶ñ, y'amdo'ijtu̶py je̱'e̱ Dios y'ayuuk tyu̶y'ajt; peru̶ je̱' ko miich ka'p myajpaatku̶xy ma je̱'e̱ Diosu̶ñ, paady je̱'e̱ Dios y'ayuuk tyu̶y'ajt ka'p m'amdo'idaanu̶ ajku̶xy.
Je'emy najty je̱'e̱ Cristo jii ko je̱'e̱ Abraham jyugy'ajty
48Mu̶'it je̱'e̱ judío ja'ay nu̶maaygyu̶xy je̱'e̱ Jesús:
—Tu̶y'ajtu̶ñ u̶u̶ch du'un nmu̶naangu̶xy ko du'un nnu̶maaygyu̶xy ko miich msamariaja'ayu̶ch y ko je̱'e̱ mu̶jku'u mu̶u̶du̶ch ma je̱'e̱ mjoot mwinma'añdyu̶ñ.
49Chi je̱'e̱ Jesús y'adzoowu̶gu̶xy:
—Ka'p u̶u̶ch je̱'e̱ mu̶jku'u nmu̶u̶du̶ch ma u̶u̶ch je̱'e̱ njoot nwinma'añdyu̶ñ. Je̱'e̱ mu̶dyiibu̶ u̶u̶ch du'un nduumbyu̶ñ je̱'e̱ nDeedyu̶ch du'un nyajmu̶j'ajtypy; y miich ajku̶xy ka'p u̶u̶ch miich xyajmu̶j'ajtku̶xy. 50Ka'p du'un u̶u̶ch ku̶'u̶m mu̶naamb ko u̶u̶ch xyajmu̶j'ajtku̶xu̶ch, je̱'e̱ nDeedyu̶ch du'un mu̶naamb ko u̶u̶ch xyajmu̶j'ajtku̶xu̶ch, y je̱' je̱'e̱ ja'ay tu̶ydyunaamb pu̶njaty u̶u̶ch ju̶bu̶k axu̶u̶g xyñigapxp xyñimu̶dyaakku̶xpu̶ñ. 51Janch tu̶y'ajtu̶ñ du'un nnu̶maaygyu̶xy, pu̶n u̶u̶ch je̱'e̱ n'ayuuk ndu̶y'ajt xymyu̶bu̶jku̶byu̶ñ, ka'p je̱'e̱ nimu̶naa y'o'ogu̶ch tyu̶góyu̶ch.
52Chi je̱'e̱ judío ja'ay y'adzoowu̶gu̶xy:
—Cham tu̶y tyu̶y'ajtu̶ñu̶ch neby u̶u̶ch nmu̶naangu̶xyu̶ñ ko je̱'e̱ mu̶jku'u miich mu̶u̶du̶ch ma je̱'e̱ mjoot mwinma'añdyu̶ñ. Je̱'e̱ Abraham y ku̶xyu̶ je̱'e̱ Dios y'ayuuknajtzkapxu̶u̶ybyu̶du̶jk o'ktaaygyu̶x je̱', y miichu̶tz mmu̶naamb: ‘Pu̶n u̶u̶ch je̱'e̱ n'ayuuk ndu̶y'ajt xymyu̶bu̶jku̶byu̶ñ, ka'p je̱'e̱ nimu̶naa y'o'ogu̶ch tyu̶góyu̶ch.’ 53¿Nej ni'igyu̶ je̱'e̱ mu̶k'ajt miich mu̶u̶du̶ch ni'igu̶ ka'p u̶u̶ch je̱'e̱ nmu̶j'áp nmu̶jteedy Abraham ajku̶xy? Je̱'e̱ o'k je̱', y nan o'kku̶x je̱'e̱ Dios y'ayuuknajtzkapxu̶u̶ybyu̶du̶jk nandu'un. ¿Oktimypyú̶n miich tijy da'a?
54Chi je̱'e̱ Jesús y'adzoowu̶gu̶xy:
—Pu̶nu̶ nnaygyu'umaayu̶bu̶ch ku̶'u̶m, ka'p je̱'e̱ du'un maa chobaady ko u̶u̶ch naty ku̶'u̶m nnaygyu'umayii. Peru̶ je̱'e̱ mu̶dyiibu̶ u̶u̶ch xykyu'umaaybyu̶ñ je̱' je̱' je̱'e̱ nDeedyu̶ch, je̱'e̱ mu̶dyiibu̶ du'un miich mdijku̶xypyu̶ñ ko mDios'ajtku̶xy. 55Peru̶ miich ka'p je̱'e̱ m'ixy'ajtku̶xy. U̶u̶ch tu̶y n'ixy'ajtypyu̶ch je̱'; y ko u̶u̶ch du'un n'okmu̶na'anu̶ch ko u̶u̶ch ka'p n'ixy'aty, anu̶u̶'ajtpu̶ch naty du'un; du'un neby miich ajku̶xyu̶ñ. Peru̶ tu̶y'ajtu̶ñ je̱', ko u̶u̶ch n'ixy'aty, y nguydyuunu̶byu̶ch je̱'e̱ y'ayuuk tyu̶y'ajt. 56Je̱'e̱ Abraham, miich je̱'e̱ mmu̶j'áp mmu̶jteedy ajku̶xy, janch jootkujk je̱'e̱ ñayjyu̶wu̶u̶yu̶ ko u̶u̶ch najty xy'ixa'añ nmina'añu̶ch ya naaxwiiñ; y ko u̶u̶ch ya nmiiñ xy'ijxu̶ch je̱', y chi jyootkugu̶u̶y.
57Chi je̱'e̱ judío ja'ay je̱'e̱ Jesús nu̶maaygyu̶xy:
—Ka'anu̶ je̱'e̱ mjumu̶jt juxytyikxymyajk y'abetyñu̶, ¿y mmu̶na'añu̶tz ko je̱'e̱ Abraham tu̶ m'ixy?
58Chi je̱'e̱ Jesús y'adzoowu̶gu̶xy:
—Janch tu̶y'ajtu̶ñ du'un nnu̶maaygyu̶xy ko je'emy u̶u̶ch najty jii ko je̱'e̱ Abraham jyugy'ajty.
59Mu̶'it je̱'e̱ tzaa konu̶'kku̶xy ka'adzaangu̶xy najty; peru̶ chi je̱'e̱ Jesús ñayyu'tzu̶ y myu̶jtzajptu̶jkpu̶dzu̶u̶my.
Currently Selected:
San Juan 8: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005