San Juan 18
18
Jesús mach ajku̶xy
(Mt 26.47-56; Mc 14.43-50; Lc 22.47-53)
1Ko je̱'e̱ Jesús du'un myu̶dyaaktaay, chi choñ mu̶u̶d je̱'e̱ dyiscípulotu̶jk; ñú̶kxku̶xy wok'awiimb, je̱'e̱ mu̶dyiibu̶ xu̶u̶'ajtpu̶ñ Cedrón. Jim najty kam tu'ug, jim je̱'e̱ Jesús tyu̶gu̶u̶y mu̶u̶d je̱'e̱ dyiscípulotu̶jk ajku̶xy. 2Je̱'e̱ Judas je̱'e̱ mu̶dyiibu̶ je̱'e̱ Jesús najty ku̶'u̶ye̱gaamb ma je̱'e̱ myu̶dzipu̶ñ, nan y'ixy'ajtypy najty je̱'e̱ kam, je̱' ko ka'anaag'ook najty je̱'e̱ Jesús jiiby tu̶ ñaymyujku̶gu̶xy mu̶u̶d je̱'e̱ dyiscípulotu̶jk. 3Chi je̱'e̱ Judas oy woy je̱'e̱ tziptuumbu̶tu̶jk ajku̶xy mu̶u̶d je̱'e̱ mu̶jtzajptu̶jk kweentu̶'ajtpu̶ nije̱' ajku̶xy, je̱'e̱ mu̶dyiibu̶ je̱'e̱ teedy windzu̶ndu̶jk y je̱'e̱ fariseotu̶jk kye̱jxku̶xu̶ñ. Chi mu̶dja'ty ma je̱'e̱ Jesús najty yajpaadyu̶ñ; agu̶ lámpara mu̶u̶d y tzinju̶u̶n mu̶u̶d ajku̶xy y mu̶dajtku̶xy tii mu̶u̶d chiptuungu̶xyu̶ñ. 4Peru̶ je̱' ko je̱'e̱ Jesús ñejwu̶ydyaaby najty je̱'e̱ ku̶xyu̶ neby najty jyat y'abe̱da'añu̶ñ, chi je̱'e̱ myu̶dziptu̶jk nibu̶dzu̶u̶my y yajtu̶u̶gu̶xy:
—¿Pu̶n m'u̶xtaaby ajku̶xy?
5Chi je̱' myu̶dzip y'adzooy ajku̶xy:
—Je̱'e̱ Jesús, je̱'e̱ mu̶dyiibu̶ Nazaret tzombu̶ñ, je̱' u̶u̶ch n'u̶xtaaygyu̶xypy.
Chi je̱'e̱ Jesús y'adzooy:
—U̶u̶ch je̱'e̱ du'un.
Je̱'e̱ Judas, je̱'e̱ mu̶dyiibu̶ najty ku̶'u̶ye̱jku̶bu̶ñ ma je̱'e̱ myu̶dzipu̶ñ, jim najty je̱' mu̶u̶d je̱'e̱ mu̶dziptu̶jk ajku̶xy. 6Ko je̱'e̱ Jesús du'un y'adzoowu̶ ajku̶xy: “U̶u̶ch je̱'e̱ du'un”, chi y'u̶xtu̶gu̶'u̶wa'kku̶xy y kyu̶daagu̶xy. 7Chi je̱'e̱ Jesús ja'adu'ook yajtu̶u̶wu̶gu̶xy:
—¿Pu̶n m'u̶xtaaby ajku̶xy?
Chi ja'adu'ook y'adzoogu̶xnu̶ba:
—Je̱'e̱ Jesús, je̱'e̱ mu̶dyiibu̶ Nazaret tzombu̶ñ, je̱' u̶u̶ch n'u̶xtaaygyu̶xypy.
8Chi je̱'e̱ Jesús ja'adu'ook ñu̶maayu̶gu̶xnu̶ba:
—Tu̶ nnu̶maaygyu̶xy ko u̶u̶ch je̱'e̱ du'un. Pu̶nu̶ u̶u̶ch miich xy'u̶xtaaygyu̶xp, u̶xmajtzu̶gyu̶ch yu̶'u̶ ndiscípulotu̶jk ajku̶xy wan nú̶kxku̶xy.
9Adaa paady adaa du'un tyuunu̶ jyajtu̶ wan du'un yajkuydyunu̶ch neby je̱'e̱ Jesús najty ku̶'u̶m tu̶ myu̶na'añu̶ñ. “Dios Teedy, ku̶xyu̶ je̱'e̱ mu̶dyiibu̶ u̶u̶ch tu̶ xymyo'oyu̶ñ ka'p je̱'e̱ m'ayuuk mdu̶y'ajt ni tu'ug tu̶ xyajtu̶gooyu̶ ajku̶xy.” 10Mu̶'it je̱'e̱ Simón Pedro mu̶dyiibu̶ najty je̱'e̱ espaadu̶ tu'ug mu̶dajtpu̶ñ, chi je̱'e̱ y'espaadu̶ juty y katzpujxu̶ je̱'e̱ teedy windzú̶n nigu'ubajk'ajtpu̶ tyuumbu̶ tyadzak tu'ug a'oy'eembyu̶, je̱'e̱ mu̶dyiibu̶ najty xu̶u̶'ajtpu̶ñ Malco. 11Chi je̱'e̱ Jesús nu̶maay je̱'e̱ Pedro:
—Pu̶da'ag yu̶'u̶ m'espaadu̶ ma yu̶'u̶ ñidu̶jku̶ñ. Pu̶nu̶ je̱'e̱ Dios Teedy u̶u̶ch je̱'e̱ tzaachpyu̶ ayo'on du'un xymyooby, ni'igu̶ nmu̶nax ngu'ubu̶gú̶byu̶ch je̱'e̱ du'un.
Jesús yajpaady ma je̱'e̱ Anás wyinduuyu̶ñ
(Mt 26.57-58; Mc 14.53-54; Lc 22.54)
12Chi je̱'e̱ tziptuumbu̶tu̶jk mu̶u̶d je̱'e̱ tziptuumbu̶ windzú̶n y mu̶u̶d je̱'e̱ judío mu̶jtzajptu̶jk kweentu̶'ajtpu̶ ajku̶xy majtzku̶xy je̱'e̱ Jesús, y chi ku̶'u̶xojtzku̶xy. 13Chi jayu̶jp yajnú̶kxy ajku̶xy ma je̱'e̱ Anás tyu̶jku̶ñ, je̱'e̱ Caifás myu̶'u̶d, je̱'e̱ mu̶dyiibu̶ najty je̱'e̱ teedy windzú̶n nigu'ubajk'ajtp je̱'e̱ mu̶'it jumu̶jtjooty. 14Je̱'e̱ Caifás je̱' najty je̱' je̱'e̱ mu̶dyiibu̶ je̱'e̱ judío ja'ay najty tu̶ oknu̶maaygyu̶xpu̶ju̶ñ ko ni'igu̶ oy mu̶u̶d je̱' ajku̶xy ko je̱'e̱ ja'ay tu'ug je'eyu̶ y'o'ogu̶ch mu̶u̶d je̱'e̱ naax kajpt kyu̶xpu̶.
Pedro kuyu'uch ko ka'p ixy'aty je̱'e̱ Jesús
(Mt 26.69-70; Mc 14.66-68; Lc 22.55-57)
15Je̱'e̱ Simón Pedro mu̶u̶d je̱'e̱ ja'adu'ukpu̶ discípulo pyanú̶kxku̶xypy najty je̱'e̱ Jesús. Y je̱'e̱ ja'adu'ukpu̶ discípulo ixy'ajtu̶p najty je̱'e̱ teedy windzú̶n nigu'ubajk'ajtpu̶, y pyadu̶gu̶u̶y je̱'e̱ Jesús ma je̱'e̱ teedy windzú̶n nigu'ubajk'ajtpu̶ tyu̶jku̶ñ. 16Peru̶ je̱'e̱ Pedro jiiby tu̶ba'ay je̱'e̱ wyu̶'u̶my tu̶jk'aguuy. Paady je̱'e̱ discípulo, je̱'e̱ mu̶dyiibu̶ je̱'e̱ teedy windzú̶n nigu'ubajk'ajtpu̶ najty ixy'ajtu̶p pyu̶dzu̶u̶my y mu̶gapxy je̱'e̱ po'oduumbu̶ tu̶jk'aguuy kweentu̶'ajtpu̶, y chi je̱'e̱ Pedro yajtu̶jktu̶gu̶u̶y. 17Chi je̱'e̱ po'oduumbu̶ tu̶jk'aguuy kweentu̶'ajtpu̶ je̱'e̱ Pedro yajtu̶u̶y:
—¿Nej ka'p miich nidu'ugtu̶ mje̱'e̱ju̶ch adayaaba ja'ay dyiscípulo?
Chi je̱'e̱ Pedro y'adzooy:
—Ka'p, ka'p u̶u̶ch nje̱'e̱ju̶ch.
18Je̱' ko janch tu̶u̶chk najty, je̱'e̱ tuumbu̶du̶jk y je̱'e̱ mu̶jtzajptu̶jk kweentu̶'ajtpu̶ ajku̶xy tu̶ najty je̱'e̱ jyu̶u̶n yajmu̶ju̶u̶ygyu̶xy, y jim najty xyaamgu̶xy; nan jim najty je̱'e̱ Pedro nandu'un xyamy mu̶u̶d je̱' ajku̶xy ju̶u̶nba'a'aay.
Je̱'e̱ teedy windzú̶n nigu'ubajk'ajtpu̶ je̱'e̱ Jesús yajtú̶y
(Mt 26.59-66; Mc 14.55-64; Lc 22.66-71)
19Chi je̱'e̱ teedy windzú̶n nigu'ubajk'ajtpu̶ je̱'e̱ Jesús yajtu̶u̶du̶gu̶u̶y pu̶njaty dyiscípulo'ajtypyu̶ñ y tijaty najty yaj'u̶xpu̶jkypyu̶ñ. 20Chi je̱'e̱ Jesús y'adzooy:
—U̶u̶ch tu̶ u̶u̶ch mayjya'ayjyooty ngapxy nmu̶dya'agy; tu̶ u̶u̶ch nyaj'u̶xpú̶ky ma je̱'e̱ naymyujktaakt y ma je̱'e̱ mu̶jtzajptu̶jku̶ñ, ma je̱'e̱ judío ja'ay nigu̶xyu̶ ñayyo'oymyujku̶gu̶xy; y ka'p u̶u̶ch nimu̶naa ni tii ayu'uch amechu̶ tu̶ nigapxy tu̶ nimu̶dya'agy. 21¿Y ti u̶u̶ch ko u̶u̶ch xyajtú̶y? Je̱' yajtu̶u̶gu̶x pu̶njaty u̶u̶ch je̱'e̱ n'ayuuk tu̶ xymyu̶doowu̶ju̶ñ ajku̶xy, y je̱' wan nigápxku̶xy tii u̶u̶ch tu̶ nyajmu̶dmu̶dyaakku̶xyu̶ñ. Je̱' nejwu̶u̶ygyu̶xp nebyjyaty u̶u̶ch tu̶ nmu̶na'añu̶ñ.
22Ko je̱'e̱ Jesús du'un y'adzooy, chi je̱'e̱ mu̶jtzajptu̶jk kweentu̶'ajtpu̶ nidu'ugtu̶ tu'ku̶'u̶ y'akojxu̶'ku̶, cham ñu̶ma'ayii:
—¿Ti ko du'un m'adzoy je̱'e̱ teedy windzú̶n nigu'ubajk'ajtpu̶?
23Chi je̱'e̱ Jesús y'adzooy:
—Pu̶nu̶ tu̶ u̶u̶ch we̱e̱nu̶ ngapxtu̶goy, awaanu̶gyu̶ch tii gyu̶xpu̶ u̶u̶ch ko du'un tu̶ n'adzoy, y pu̶nu̶ oy u̶u̶ch du'un tu̶ n'adzoy, ¿ti u̶u̶ch ko xykyoxy?
24Mu̶'it je̱'e̱ Anás kejxy je̱'e̱ Jesús ku̶'u̶xóch ma je̱'e̱ Caifás tyu̶jku̶ñ, je̱'e̱ teedy windzú̶n nigu'ubajk'ajtpu̶.
Pedro ja'adu'ook kuyu'uch je̱'e̱ Jesús ko ka'p ixy'aty
(Mt 26.71-75; Mc 14.69-72; Lc 22.58-62)
25Je̱'e̱ Pedro jim najty je̱'e̱ xyaam'adu̶'u̶ch ju̶u̶nba'a'aay. Chi yajtu̶u̶wu̶ ajku̶xy:
—¿Nej ka'p miich nidu'ugtu̶ mje̱'e̱ju̶ch adayaaba ja'ay dyiscípulo?
Pedro kyuyu'tz je̱', y myu̶naañ:
—Ka'p, ka'p u̶u̶ch nje̱'e̱ju̶ch.
26Chi je̱'e̱ teedy windzú̶n nigu'ubajk'ajtpu̶ tyuumbu̶ nidu'ugtu̶ ñu̶maayu̶, je̱' y'amu̶gu'ug je̱'e̱ mu̶dyiibu̶ je̱'e̱ Pedro tyadzak najty tu̶ katzpujxu̶ju̶ñ:
—¿Nej ka'p mdijy jiiby n'ijxy mu̶u̶d yu̶'u̶ ja'ay ma je̱'e̱ kamu̶ñ?
27Pedro kyuyu'tz je̱'e̱ ja'adu'ook, y je̱'e̱ timymyu̶'ityu̶ je̱'e̱ tzeyñu̶'u̶'aa oy yaxu̶'u̶gy.
Jesús yajpaady ma je̱'e̱ Pilato wyinduuyu̶ñ
(Mt 27.1-2, 11-14; Mc 15.1-5; Lc 23.1-5)
28Chi je̱'e̱ Jesús jim yajtzóñ ajku̶xy ma je̱'e̱ Caifás tyu̶jku̶ñ y yajnú̶kxku̶xy ma je̱'e̱ gobernador romano myu̶jtu̶jku̶ñ. Je̱' ko jobu̶u̶yñu̶py najty, ka'p je̱'e̱ judío ja'ay jiiby tyu̶gu̶u̶ygyu̶xy ma je̱'e̱ mu̶jtu̶jku̶ñ; je̱' ko ka'p je̱'e̱ kyostumbre du'un myiingu̶xy nu̶kxy tyu̶gu̶u̶ygyu̶xy ma je̱'e̱ ka'pu̶ judío ja'ay tyu̶jk ajku̶xyu̶ñ, y pu̶nu̶ adu̶u̶tzku̶xp najty du'un, ka'p je̱'e̱ Pascua adzuu najty du'un mu̶baad kaaygyu̶xy. 29Paady je̱'e̱ Pilato ñibu̶dzu̶u̶mu̶ ajku̶xy; ñu̶maayu̶ ajku̶xy:
—¿Ti yu̶'u̶ jiibu̶ ja'ay myajku'uxu̶'u̶wu̶u̶ygyu̶xypy?
30Chi y'adzoowu̶ ajku̶xy:
—Ko u̶xyu̶py adaa ja'ay tu̶ kya'aku̶dyeey, ka'p u̶xyu̶py adaa yam nyajku̶'u̶du̶gu̶u̶ygyu̶xy.
31Chi je̱'e̱ Pilato ñu̶maayu̶ ajku̶xy:
—Yajwimbijtku̶x, y tu̶ydyuungu̶x du'un neby je̱'e̱ mgu̶'u̶m'ane̱'e̱mu̶ñ y'ane̱'e̱mgu̶xyu̶ñ.
Chi je̱'e̱ judío ja'ay y'adzoogu̶xy:
—U̶u̶ch judío ja'ay u̶u̶ch ajku̶xy, ka'p u̶u̶ch xypyaatku̶xy nú̶kxyu̶ch je̱'e̱ ja'ay nyaj'o'kku̶xy.
32Du'un je̱'e̱ du'un yajkuydyuuñ neby je̱'e̱ Jesús najty tu̶ myu̶na'añu̶ñ, neby najty y'o'oga'añu̶ñ. 33Chi je̱'e̱ Pilato ja'adu'ook tyu̶gu̶u̶y jiiby ma je̱'e̱ myu̶jtu̶jku̶ñ, chi je̱'e̱ Jesús kuyaaxu̶u̶y y yajtu̶u̶y:
—¿Nej miich je̱' je̱'e̱ judío ja'ay myu̶j'ane̱'e̱mbu̶ ajku̶xy?
34Chi je̱'e̱ Jesús y'adzoowu̶:
—¿Nej mgu̶'u̶mwinma'añ u̶u̶ch du'un xyajtú̶y pu̶nu̶ u̶u̶ch mu̶j'ane̱'e̱mbu̶'ajtp, o wiingja'ay du'un tu̶ xyñu̶ma'ayu̶?
35Chi je̱'e̱ Pilato y'adzooy:
—¿Nej nan judío ja'ay u̶u̶chu̶? Je̱'e̱ mgu̶'u̶mmu̶gunaax mgu̶'u̶mmu̶gugajpt y je̱'e̱ teedy windzu̶ndu̶jk tu̶ xykyu̶'u̶ye̱jkku̶xy ma u̶u̶chu̶ñ. ¿Ti tu̶ mduundu̶góy?
36Chi je̱'e̱ Jesús y'adzooy:
—U̶u̶ch ka'p u̶u̶ch ya n'ane'emy ma adayaaba naaxwiiñu̶ñ. Ko u̶u̶ch u̶xyu̶py ya naaxwiiñ n'ok'ane'emy, tu̶ u̶u̶ch u̶xyu̶py je̱'e̱ nduumbu̶du̶jk xyñidziptuungu̶xyu̶ch, y ka'p u̶u̶ch u̶xyu̶py tu̶ nyajku̶'u̶yéky ma je̱'e̱ judío ja'ay ajku̶xyu̶ñ. Peru̶ ka'p u̶u̶ch ya n'ane'emy.
37Mu̶'it je̱'e̱ Pilato je̱'e̱ Jesús nu̶maay:
—¿Miich tyú̶mu̶tz je̱'e̱ mu̶j'ane̱'e̱mbu̶?
Chi je̱'e̱ Jesús y'adzooy:
—Miich du'un mmu̶naamb: u̶u̶ch je̱'e̱ mu̶j'ane̱'e̱mbu̶. Y paady u̶u̶ch ya naaxwiiñ tu̶ nmiñ, y tu̶ nma'axung'átyu̶ch neby u̶u̶ch je̱'e̱ tu̶y'ajt mu̶baad nyekyu̶ñ. Y ku̶xyu̶ pu̶njaty je̱'e̱ tu̶y'ajt kuydyuungu̶xpu̶ñ xy'amdo'ijtu̶byu̶ch n'ayuuk je̱'e̱ ajku̶xy.
38Chi je̱'e̱ Pilato y'adzooy:
—¿Y ti du'un mdijpy tu̶y'ajt?
Jesús y'o'ku̶ñ yajmo'oy
(Mt 27.15-31; Mc 15.6-20; Lc 23.13-25)
Ko je̱'e̱ Pilato je̱'e̱ Jesús najty tu̶ yajtú̶y, chi ja'adu'ook tyu̶jkpu̶dzu̶u̶my; mu̶dmu̶dya'aga'añ je̱'e̱ judío ja'ay ajku̶xy, y nu̶maay ajku̶xy:
—U̶u̶ch ka'p u̶u̶ch ni tii poky nbaady ma adayaaba ja'ayu̶ñ. 39Peru̶ miich ajku̶xy, du'un miich je̱'e̱ kostumbre mu̶dajtku̶xy ko je̱'e̱ pujxtu̶jkja'ay tu'ug nnajtzmadzu̶u̶yu̶ch ajku̶xy mu̶jPascuaxu̶u̶jooty: ¿nej mdzojkku̶xypy ko nnajtzmadzu̶u̶yu̶ch ajku̶xy je̱'e̱ judío ja'ay myu̶j'ane̱'e̱mbu̶ ajku̶xy?
40Chi ja'adu'ook nigu̶xyu̶ yaaxke̱e̱kku̶xnu̶ba:
—¡Ka'p adayaaba ja'ay mnajtzmadzu̶'u̶y! ¡Yu̶'u̶ Barrabás mnajtzmadzu̶'u̶!
Y je̱'e̱ Barrabás me̱e̱tzpu̶ je̱'e̱ najty.
Currently Selected:
San Juan 18: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005