1 Juan 2
2
Cristo, u̶u̶ch nwingapxpu̶ ajtu̶m ajku̶xy
1“Mu̶gu'uktu̶jk, mu̶dyiibu̶ u̶u̶ch du'un nju̶wu̶u̶by neby je̱'e̱ ung ana'ku̶ñ, cham adaa tu̶y'ajt nyajnijayu̶u̶ygyu̶xy ka'pu̶ mduundu̶gooygyu̶xu̶ch. Peru̶ pu̶nu̶ tuundu̶gooby pu̶n nidu'ugtu̶, nmu̶dajtu̶mby je̱'e̱ wingapxpu̶ tu'ug ma je̱'e̱ Dios Teedy winduuyu̶ñ, je̱'e̱ Jesucristo je̱' y tu'uda'agy je̱'. 2Jesucristo nayyojxu̶ je̱' ma je̱'e̱ o'ku̶ñ ke̱e̱ku̶ñ neby je̱'e̱ windzu̶gu̶'u̶ñdyu̶ñ, neby je̱'e̱ nboky ngu̶dyeey du'un yajwinmé̱kxu̶mu̶chu̶ñ ajku̶xy, y ka'p u̶u̶ch nboky ngu̶dyeey ajtu̶m ajku̶xy, ku̶xyu̶ je̱'e̱ naaxwiiñjya'ay pyoky kyu̶dyeey nandu'un ajku̶xy.
3Pu̶nu̶ nguydyuunu̶py je̱'e̱ Dios y'ane̱'e̱mu̶ñ ajtu̶m ajku̶xy, mu̶'it je̱'e̱ tu̶y'ajt nmu̶dajtu̶m ajku̶xy ko je̱'e̱ Dios nmu̶bu̶jku̶m ajku̶xy. 4Peru̶ pu̶nu̶ jii pu̶n myu̶na'añ: “U̶u̶ch nmu̶bu̶jkypyu̶ch je̱'e̱ Dios” y ka'p je̱'e̱ y'ane̱'e̱mu̶ñ kuydyuunu̶, anu̶u̶'ajtp naty je̱'e̱ du'un y ka'p je̱'e̱ tu̶y'ajt yajpaady ma je̱'e̱ju̶ñ. 5Peru̶ pu̶n je̱'e̱ Dios y'ayuuk tyu̶y'ajt yajkoptu̶gu̶u̶ybyu̶ñ, jim je̱'e̱ ñi'igu̶xu̶'u̶gy tu'kku̶'u̶yu̶ ma je̱'e̱ju̶ñ ko je̱'e̱ Dios jaanch tzoky ju̶wu̶'u̶y, y mu̶'it du'un nnejwu̶u̶yu̶m ajku̶xy ko tu'ugyu̶ n'ijtu̶m ajku̶xy mu̶u̶d je̱'e̱ Dios. 6Pu̶n mu̶maamb ko tu'ugyu̶ y'ity mu̶u̶d je̱'e̱ Dios, du'un je̱'e̱ chu̶na'awu̶ch neby je̱'e̱ Jesucristo chu̶naayu̶ñ.
Je̱'e̱ jembyu̶ ane̱'e̱mu̶ñ
7“Mu̶gu'uktu̶jk, adaa ane̱'e̱mu̶ñ mu̶dyiibu̶ yam nyajnijayu̶u̶ygyu̶xypyu̶ñ ka'p adaa jyémyu̶ch. Je̱' ane̱'e̱mu̶ñ adaa mu̶dyiibu̶ mgu'ubu̶jkku̶xu̶ñ ko je̱'e̱ Jesucristo mmu̶bu̶jktzóngu̶xy. Adaa jekypyu̶ ane̱'e̱mu̶ñ, je̱'e̱ ayuuk tu̶y'ajt adaa mu̶dyiibu̶ tu̶ mmu̶doogu̶xyu̶ñ. 8Oy adaa ane̱'e̱mu̶ñ kya'ajémyu̶ch peru̶ du'un adaa yam nyajnijayu̶u̶ygyu̶xy neby jémbyu̶ju̶ñ, je̱'e̱ mu̶dyiibu̶ je̱'e̱ tu̶y'ajt mu̶u̶d ma je̱'e̱ Cristo y ma miich ajku̶xyu̶ñ, y ko je̱'e̱ ane̱'e̱mu̶ñ nguydyuunu̶mu̶ch ajku̶xy, mu̶'it je̱'e̱ ju̶bu̶kpu̶ yaj'u̶xmách y yajpanú̶kxnu̶ je̱'e̱ tu̶y'ajtpu̶ tu̶y'ajt, du'un neby je̱'e̱ koodzpu̶ ñaxyu̶ñ, y myiñ je̱'e̱ tu̶kxu̶ñ jaju̶ñ.
9Pu̶nu̶ jii pu̶n myu̶na'añ ko yajpaady ma je̱'e̱ tu̶y'ajt mu̶dyiibu̶ du'un neby je̱'e̱ tu̶kxu̶ñ jaju̶ñ, peru̶ myu̶'ixnaaby je̱'e̱ myu̶gu'ug y ka'p ixa'añ, agootztuum je̱'e̱ yajpaatyñu̶. 10Pu̶n je̱'e̱ myu̶gu'ug tzojkp ju̶wu̶u̶by je̱'e̱ tu̶y'ajt je̱'e̱ kyuydyuumby, je̱'e̱ mu̶dyiibu̶ du'un neby je̱'e̱ tu̶kxu̶ñ jaju̶ñ, y ka'p je̱'e̱ ni pu̶n yajtuundu̶goyu̶u̶wu̶ch. 11Peru̶ pu̶n je̱'e̱ myu̶gu'ug mu̶'ixnaaby y ka'p ixa'añ, agoodztuum je̱'e̱ chu̶na'ay y yajpaady, y ka'p nejwu̶'u̶y maa ñu̶kxyu̶ñ, je̱' ko je̱'e̱ pokytuñyiibyu̶ je̱'e̱ du'un tu̶ yajwimbidyii neby wiindzpu̶ju̶ñ.
12“Mu̶gu'uktu̶jk, mu̶dyiibu̶ u̶u̶ch du'un nju̶wu̶u̶by neby je̱'e̱ ung ana'ku̶ñ, cham nnijayu̶u̶ygyu̶xy je̱' ko je̱'e̱ Dios mboky mgu̶dyeey tu̶ xywyinme̱kxu̶ ajku̶xy Jesucristo kyu̶xpu̶. 13Mu̶j'ana'ktu̶jk, mu̶dyiibu̶ u̶u̶ch du'un nju̶wu̶u̶by neby je̱'e̱ taj teedyu̶ñ, cham miich nnijayu̶u̶ygyu̶xy je̱' ko tu̶ miich je̱'e̱ Cristo mmu̶bu̶jkku̶xy, je̱'e̱ mu̶dyiibu̶ najty jii je'emy ko je̱'e̱ naaxwiimbu̶ aga'an chonda'agy. Tzugajy'ana'ktu̶jk, cham miich nnijayu̶u̶ygyu̶xy je̱' ko tu̶ miich je̱'e̱ ju̶bu̶kpu̶ ka'a'óybyu̶ mmu̶madaakku̶xy.
14Tu̶ miich nnijayu̶u̶ygyu̶xy, miich mu̶dyiibu̶ u̶u̶ch du'un nju̶wu̶u̶by neby je̱'e̱ ung ana'ku̶ñ, je̱' ko tu̶ miich je̱'e̱ Dios Teedy mmu̶bu̶jkku̶xy. Tu̶ miich nnijayu̶u̶ygyu̶xy mu̶j'ana'ktu̶jk, mu̶dyiibu̶ u̶u̶ch du'un nju̶wu̶u̶by neby je̱'e̱ taj teedyu̶ñ je̱' ko tu̶ miich je̱'e̱ Cristo mmu̶bu̶jkku̶xy, je̱'e̱ mu̶dyiibu̶ najty jii je'emy ko je̱'e̱ naaxwiimbu̶ aga'an chonda'agy. Nan tu̶ miich nandu'un nnijayu̶u̶ygyu̶xy, miich tzugajy'ana'ktu̶jk ajku̶xy je̱' ko mu̶k miich ajku̶xy ma je̱'e̱ mjoot mwinma'añdyu̶ñ y tu̶ miich je̱'e̱ Dios y'ayuuk tyu̶y'ajt mgu'ubu̶jkku̶xy ma je̱'e̱ mjoot mwinma'añdyu̶ñ ajku̶xy, y tu̶ miich je̱'e̱ ju̶bu̶kpu̶ ka'a'óybyu̶ mmu̶madaakku̶xy.
15Ka'p je̱'e̱ pokytyunu̶u̶ m'adzojkku̶xy ni je̱'e̱ ju̶bu̶kpu̶ mu̶dyiibu̶ ya naaxwiiñ yajpaatpu̶ñ. Pu̶n je̱'e̱ pokytyunu̶u̶ adzojkpu̶ñ, ka'p Dios je̱'e̱ mu̶bu̶ky; 16ku̶xyu̶ mu̶dyiibu̶ je̱'e̱ naaxwiiñ y'awanu̶u̶by, ka'p je̱'e̱ jiiby chooñ ma je̱'e̱ Dios Teedyu̶ñ, yaayu̶ je̱'e̱ chooñ ya naaxwiiñ. Y adaaju̶tz je̱'e̱ naaxwiiñ y'awanu̶u̶by: je̱'e̱ ju̶bu̶k naaxwiiñjya'ay adzojku̶ñ winma'añ, ku̶xyu̶ tii adzojku̶ñ mu̶dyiibu̶ nayyajnaygyu'umaayu̶bu̶ñ ma je̱'e̱ ja'ay ajku̶xyu̶ñ y je̱'e̱ amu̶j jootmu̶j'ajtu̶ñ winma'añ ko ku̶xyu̶ tii yajmu̶dáty. 17Ku̶xyu̶ tijaty ya naaxwiiñ yajpaatp, kú̶xu̶p tu̶góyu̶p je̱' mu̶u̶d je̱'e̱ jyu̶bu̶k'adzojku̶ñ ku̶xyu̶; peru̶ pu̶n je̱'e̱ Dios chojku̶ñ kuydyuumb jugy'ajtku̶xu̶p je̱'e̱ wiinu̶u̶xu̶u̶.
Je̱'e̱ tu̶y'ajt y je̱'e̱ anu̶u̶
18“Mu̶gu'uktu̶jk, mu̶dyiibu̶ u̶u̶ch du'un nju̶wu̶u̶by neby je̱'e̱ ung ana'ku̶ñ, tu̶ je̱'e̱ xu̶u̶ tiempo paatnu̶ mu̶naa je̱'e̱ naaxwiimbu̶ tyu̶goyaanu̶ju̶ñ. Miich tu̶ mnejwu̶u̶ygyu̶xy ko je̱'e̱ ja'ay tu'ug myina'añ, je̱'e̱ mu̶dyiibu̶ je̱'e̱ Cristo mu̶dzip'ajtpu̶ñ. Y jada'achám jii je̱'e̱ ja'ay may mu̶dyiibu̶ je̱'e̱ Cristo mu̶dzip'ajtku̶xpu̶ñ. Y paady du'un nnejwu̶u̶yu̶m ajku̶xy ko je̱'e̱ xu̶u̶ tiempo tu̶ paatnu̶ mu̶naa je̱'e̱ naaxwiimbu̶ tyu̶goyaanu̶ju̶ñ. 19Je̱'e̱ du'umbu̶ ja'ay ajku̶xy jii je̱'e̱ tu̶ pyu̶dzu̶u̶mgu̶xy ma u̶u̶ch ajtu̶m ajku̶xyu̶ñ. Peru̶ ka'p najty je̱'e̱ tu'ugyu̶ tu'ug'aa tu'ugjoot y'ijtku̶xy mu̶u̶d u̶u̶ch ajtu̶m ajku̶xy, ko u̶xyu̶py najty tu'ugyu̶ tu'ug'aa tu'ugjoot y'ok'ijtku̶xy mu̶u̶d u̶u̶ch ajtu̶m ajku̶xy, ka'p u̶xyu̶py tu̶ xypyuyo'oydyuuttu̶m ajku̶xy, peru̶ tu̶ je̱'e̱ du'un tyuñyii jyadyii wan du'un oy wa'adz ñi'igu̶xu̶'u̶gu̶ch ko ka'p najty je̱'e̱ nigu̶xyu̶ tu'ug'aa tu'ugjoot y'ijtku̶xy mu̶u̶d u̶u̶ch ajtu̶m ajku̶xy.
20Miich ajku̶xy tu̶ miich je̱'e̱ Cristo je̱'e̱ Espíritu Santo xymyooygyu̶xy y nigu̶xyu̶ miich mnejwu̶u̶ygyu̶xnu̶ ku̶xyu̶ je̱'e̱ tu̶y'ajt. 21Cham nnijayu̶u̶ygyu̶xy, ka'p ko je̱'e̱ tu̶y'ajt mga'anejwu̶u̶ygyu̶xy, paady nnijayu̶u̶ygyu̶xy ko je̱'e̱ tu̶y'ajt mnejwu̶u̶ygyu̶xy. Y miich mnejwu̶u̶ygyu̶xypy ko ka'p je̱'e̱ ja'ay tu̶y'ajt mu̶dajtku̶xy je̱'e̱ mu̶dyiibu̶ anu̶u̶'ajtku̶xpu̶ñ. 22¿Y pu̶n je̱' je̱'e̱ anu̶u̶'ajtpu̶? Je̱' je̱' je̱'e̱ mu̶dyiibu̶ du'un mu̶naamb ko ka'p je̱'e̱ Jesús jye̱'e̱ju̶ch je̱'e̱ Cristo. Y je̱' je̱'e̱ Cristo mu̶dzip'ajtp, je̱'e̱ mu̶dyiibu̶ je̱'e̱ Dios Teedy ni je̱'e̱ Dios Ung ka'p ku'ubú̶kyu̶ñ. 23Wanpú̶nu̶ch pu̶n je̱'e̱ Dios y'Ung ka'p mu̶bu̶jku̶, nan ka'p je̱'e̱ Dios Teedy mu̶bu̶ky, peru̶ pu̶n je̱'e̱ Dios y'Ung mu̶bu̶jku̶py, nan myu̶bu̶jkypy je̱'e̱ Dios Teedy nandu'un. #2.23 Y nigu̶xyu̶mmu̶dajtku̶xy: nije̱' wiingpu̶ jaaybyu̶du̶jk myu̶naangu̶xy: y miich ajku̶xy mnejwu̶u̶ygyu̶xypy miich je̱'e̱ tu̶y'ajt ku̶xyu̶ ajku̶xy. #2.23 Mesías:
24Paady mu̶dajtku̶x je̱'e̱ ayuuk tu̶y'ajt ma je̱'e̱ mjoot mwinma'añ ajku̶xyu̶ñ mu̶dyiibu̶ mmu̶doogu̶xu̶ñ ko aga'an mmu̶bu̶jktzóngu̶xy. Y pu̶nu̶ mmu̶'ijtku̶xypy je̱'e̱ ayuuk tu̶y'ajt mu̶dyiibu̶ mmu̶doogu̶xu̶ñ ko aga'an mmu̶bu̶jktzógu̶xy, mu̶'it du'un nandu'un tu'ugyu̶ myajpaatku̶xu̶ch mu̶u̶d je̱'e̱ Dios Ung y mu̶u̶d je̱'e̱ Dios Teedy. 25Y adaa je̱'e̱ Jesucristo tu̶ xyajwinwaanu̶u̶yu̶m ajku̶xy je̱'e̱ jugy'ajt wiinu̶u̶xu̶u̶bu̶.
26Paady yam nnijayu̶u̶ygyu̶xy ka'pu̶ myajwin'u̶u̶ngu̶xu̶ch ma je̱'e̱ du'umbu̶ ja'ay ajku̶xyu̶ñ. 27Peru̶ miich mmu̶dajtku̶xypy miich je̱'e̱ Espíritu Santo, je̱'e̱ mu̶dyiibu̶ je̱'e̱ Jesucristo tu̶ xyaj'adu̶gu̶u̶y xyajjoottu̶gu̶u̶ygyu̶xyu̶ñ, y paady miich ka'p myajmayjyajtku̶xy pu̶n xyaj'u̶xpu̶jkku̶xu̶bu̶ñ, je̱' ko je̱'e̱ Espíritu Santo miich ku̶'u̶m xyaj'u̶xpu̶jkku̶xp ku̶xyu̶ je̱'e̱ tu̶y'ajt, y tu̶y'ajt je̱'e̱ y'u̶xpu̶jku̶ñ y ka'p y'anu̶u̶ju̶ch. Ijtku̶x tu'ugyu̶ mu̶u̶d je̱'e̱ Cristo, du'un neby je̱'e̱ Espíritu Santo tu̶ xyajni'ixu̶u̶ygyu̶xyu̶ñ.
28Jada'achám, mu̶gu'uktu̶jk mu̶dyiibu̶ u̶u̶ch du'un nju̶wu̶u̶by neby je̱'e̱ ung ana'ku̶ñ, ijtku̶x tu'ugyu̶ mu̶u̶d je̱'e̱ Cristo wan jootkujk nju̶jp'ijxu̶mu̶ch ajku̶xy ko naty ya naaxwiiñ ja'adu'ook wyimbity y ka'pu̶ ndzu̶gu̶u̶y ndzo'oydyuunu̶mu̶ch ajku̶xy ko naty myiñ. 29Miich ajku̶xy mnejwu̶u̶ygyu̶xypy ko je̱'e̱ Jesucristo tyu'uda'agyu̶ch y mnejwu̶u̶ygyu̶xypy nandu'un ko ku̶xyu̶ pu̶n tii tuumb mu̶dyiibu̶ tu'uda'agyu̶ñ, je̱' je̱'e̱ Dios ung'ajtu̶p ajku̶xy.
Currently Selected:
1 Juan 2: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005