1 Corintios 16
16
Je̱'e̱ mu̶gu'uktu̶jk myeeñ ajku̶xy mu̶dyiibu̶ mujku̶ñ
1Ko naty je̱'e̱ meeñ myajmujkku̶xy mbube̱daangu̶xy je̱'e̱ mu̶gu'uktu̶jk mu̶dyiibu̶ je̱'e̱ Dios mu̶bu̶jkku̶xpu̶ñ, du'un tuungu̶x neby u̶u̶ch je̱'e̱ mu̶bu̶jkpu̶du̶jk tu̶ nyajni'ixu̶u̶ygyu̶xyu̶ñ jim Galacia naaxjooty. 2Domingo domingo, je̱'e̱ mmu̶ju'uñ we̱e̱nu̶ nidu'ug nidu'ug mbugoongu̶xu̶ch, du'un neby naty tu̶ mguduungu̶xyu̶ñ y chi mbu̶gu̶'kku̶xu̶ch ka'pu̶ mu̶'it myajmujkku̶xu̶ch ko u̶u̶ch naty jim nja'ady. 3Y ko u̶u̶ch naty jim nja'ady ma miich ajku̶xyu̶ñ, mu̶'it u̶u̶ch je̱'e̱ ja'ay jim Jerusalén ngué̱xu̶ch, je̱'e̱ mu̶dyiibu̶ naty miich mwin'ijxku̶xypyu̶ñ y nmo'owu̶chu̶ch je̱'e̱ naky ajku̶xy wan je̱'e̱ jimbu̶ mu̶bu̶jkpu̶du̶jk yajku̶'u̶du̶gu̶u̶ygyu̶xu̶ch kipxy mu̶u̶d je̱'e̱ meeñ mu̶dyiibu̶ naty miich tu̶ myajmujkku̶xyu̶ñ. 4Y pu̶nu̶ u̶u̶ch xyjyatytimypyaatp nnú̶kxu̶chu̶ch, mu̶'it u̶u̶ch je̱'e̱ xypyanú̶kxku̶xu̶ch.
Pablo wyinmay ko nu̶kxy wyu̶dita'añ
5Ko u̶u̶ch naty ndu'ubú̶ky naxu̶'u̶wu̶bu̶ch Macedonia naaxjooty, y ko u̶u̶ch naty jim Macedonia ndzooñ mu̶'it u̶u̶ch jim Corinto nja'adu̶ch. 6Wandu̶ u̶u̶ch jim tu'ktiempo nwu̶'u̶mu̶ch mu̶u̶d miich ajku̶xy, o nyajnáxu̶chu̶ch je̱'e̱ tu̶u̶chpyoj tiempo jim ku̶xyu̶, y mu̶'it u̶u̶ch mu̶baad xypyube̱jtku̶xy ma u̶u̶ch naty nnu̶kxa'añu̶ñ ko u̶u̶ch naty jim ndzooñ ma miich ajku̶xyu̶ñ. 7Ka'p miich tzojku̶ mgu'ix nmu̶gapxaangu̶xy, nju̶jp'ijxypyu̶ch n'idú̶chu̶ch jim tu'ktiempo mu̶u̶d miich ajku̶xy, pu̶nu̶ je̱'e̱ Windzú̶n naty du'un tzojkp; 8peru̶ wu̶'u̶mu̶bu̶ch jim Éfeso u̶xtu̶ koonu̶ je̱'e̱ Pentecostés xu̶u̶ ñáxu̶ch. 9Je̱' ko mu̶j u̶u̶ch je̱'e̱ tiempo tu̶ nja'ayajmo'oy neby u̶u̶ch je̱'e̱ Windzú̶n Jesús tyuung ndúnu̶chu̶ñ; ngapxwa'kxu̶chu̶ch je̱'e̱ y'ayuuk tyu̶y'ajt y nyajmu̶bú̶ku̶chu̶ch je̱'e̱ ja'ay nimay ajku̶xy. Oy u̶u̶ch je̱'e̱ may xyjya'amu̶dzip'áty.
10Y pu̶nu̶ ja'tp je̱'e̱ Timoteo jim ma miich ajku̶xyu̶ñ, jatytimykyu'ubu̶jkku̶x oy yajxón wan jootkujk ñayjyu̶wu̶'u̶wu̶u̶ju̶ch, je̱'e̱ Windzú̶n Jesús tyuung je̱'e̱ nandu'un tyuunu̶py du'un neby u̶u̶chu̶ñ. 11Y du'unu̶tz, ka'p mbe̱jxku̶xu̶ch, ni'igyu̶ mbube̱jtku̶xu̶ch wan jootkujk tyu'uyo'oy'adu̶'u̶dzu̶ch, wan ya myínu̶ch ma u̶u̶chu̶ñ; je̱' ko cham u̶u̶ch je̱'e̱ nja'ay'éxy kipxy mu̶u̶d je̱'e̱ wiingpu̶ mu̶bu̶jkpu̶du̶jk ajku̶xy.
12Tu̶ u̶u̶ch je̱'e̱ Apolos, je̱'e̱ nmu̶gu'ugtu̶jk ajtu̶m nja'amu̶nukxta'agy ko u̶xyu̶py je̱'e̱ mu̶bu̶jkpu̶du̶jk tu̶ mu̶dnu̶kxy ma miich ajku̶xyu̶ñ; oy u̶xyu̶py tu̶ xykyu'ijx tu̶ xymyu̶gápxku̶xy, peru̶ ka'p jada'achám tu̶ ku'ubú̶ky ñú̶kxu̶ch ma miich ajku̶xyu̶ñ. Jiinu̶ ñú̶kxu̶ch ko naty yajnibaadu̶'u̶y.
Pablo myu̶gu'ugtu̶jk yajpókxu̶ñ jak'yajniguéxy
13Wijy ijtku̶x y tu'uda'agy ma je̱'e̱ mmu̶bu̶jku̶ñ ajku̶xyu̶ñ. Mmu̶dajtku̶x je̱'e̱ jootmu̶k'ajtu̶ñ y ka'p m'u̶xtu̶gu̶'u̶wa'kku̶xu̶ch ma je̱'e̱ mmu̶bu̶jku̶ñ ajku̶xyu̶ñ. 14Y ku̶xyu̶ tii naty mduungu̶xypyu̶ñ, tuungu̶x oy yajxón mu̶u̶d je̱'e̱ tzojku̶ñ ju̶wu̶u̶yu̶ñ.
15“Mu̶gu'uktu̶jk, miich mnejwu̶u̶ygyu̶xypy ko je̱'e̱ Estéfanas jyuugy myu̶gu'ug je̱'e̱ Jesucristo y'ayuuk tyu̶y'ajt jayu̶jp mu̶bu̶jktzóngu̶x jim Acaya naaxjooty, y tu̶ je̱'e̱ myu̶gu'ugtu̶jk pube̱jtu̶u̶gu̶xy, je̱'e̱ mu̶dyiibu̶ je̱'e̱ Jesucristo mu̶bu̶jkku̶xpu̶ñ. 16Du'un u̶u̶ch ndzoky, ko miich ajku̶xy je̱'e̱ du'umbu̶ ja'ay neby je̱' ajku̶xyu̶ñ mgapxymyu̶doogu̶xu̶ch ku̶xyu̶ mu̶dyiibu̶ je̱'e̱ myu̶gu'ugtu̶jk pube̱jtku̶xpu̶ñ y mu̶dyiibu̶ je̱'e̱ Dios tyuung tuunu̶u̶ygyu̶xpu̶ñ.
17Xondaakp u̶u̶ch ko je̱'e̱ Estéfanas, je̱'e̱ Fortunato y je̱'e̱ Acaico ya tu̶ mye̱jtzku̶xy, tu̶ xykyudu̶naaygyu̶xy miich, 18je̱'e̱ u̶u̶ch tu̶u̶ xyajjootkugu̶u̶ygyu̶xy ko u̶u̶ch ya tu̶ xyñime̱jtzku̶xy neby miichpyu̶ ajku̶xyu̶ñ. Je̱'e̱ du'umbu̶ ja'ay ajku̶xy neby je̱' ajku̶xyu̶ñ paattu̶gu̶xp je̱' myajmu̶j'ajtku̶xu̶ch.
19Xyajnigue̱jxku̶xp je̱'e̱ mu̶bu̶jkpu̶du̶jk yajpókxu̶ñ je̱'e̱ mu̶dyiibu̶ jim Asia naaxjooty tzu̶naaygyu̶xpu̶ñ. Je̱'e̱ Aquila y je̱'e̱ Prisca, y je̱'e̱ mu̶bu̶jkpu̶du̶jk mu̶dyiibu̶ jim nayyo'oymyujku̶gu̶xpu̶ñ ma je̱'e̱ tyu̶jk ajku̶xyu̶ñ, je̱' yajpókxu̶ñ xyajnigue̱jxku̶xp Windzú̶n Jesucristo kyu̶xpu̶. 20Xyajpókxku̶xp je̱'e̱ mu̶bu̶jkpu̶du̶jk miich nigu̶xyu̶ ajku̶xy. Nayyajpókxu̶gu̶x xi'ig xon amíñ u̶xyu̶py; cham mnaymyajtz mnaymyu̶ne̱e̱nu̶gu̶xy.
21U̶u̶ch Pablo, cham adaa yajpókxu̶ñ nyajnijayu̶u̶ygyu̶xy mu̶u̶d u̶u̶ch je̱'e̱ ngu̶'u̶mgu̶'u̶ ngu̶'u̶mleetra.
22Pu̶nu̶ jii je̱'e̱ Windzú̶n Jesucristo ka'p pu̶n tzoky ju̶wu̶'u̶y tzaachtyunu̶u̶ju̶p Dios je̱'. ¡Min Jesucristo, u̶u̶ch nWindzu̶n'ajtu̶m ajku̶xy!#16.22 ¡Min Jesucristo, u̶u̶ch nWindzú̶n ajtu̶m ajku̶xy!: nije̱' wiingpu̶ versión myu̶na'añ: je̱'e̱ Windzú̶n Jesucristo miinu̶py.
23Wan je̱'e̱ Windzú̶n Jesucristo oy'ajt may'ajt tuñ ma miich ajku̶xyu̶ñ. 24Nigu̶xyu̶ miich je'emy ndzojkku̶xy nju̶wu̶u̶ygyu̶xy Cristo Jesús kyu̶xpu̶.
Currently Selected:
1 Corintios 16: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005