MHO" PEIM: 33
33
Israel Byumyu" Kaung Jham Re Moshe Shaman" Byid' Ru
1Cegu: wa- Mao"So: byu Moshe mashid shire Israel byumyu" qere shaman" byid' ra" dao: jham ngad: ra".
2 Asang wa Sina bam mae" gyo" li" va".
Yao: wa Edom dao mae ba ru: thug' mung:
yao" byumyu" qe: dao mae Paran bam mae" zho bao byid' ra".
Mug: lagyo: datug wa yao: we' ngad: ako".
Yao" lo, yo lo, mae nga" na: ra" myishae bo: ra".
3 Asang wa yao" byumyu" re jhid'de; mung:
yao" yang sang: ra" mo, re gug:gam byid' ra".
Aimung: yao" khyid qao: mae ngonhaung" goe; pa" mung:-
yao" amyin" dao: jham re phug' cao" na: bam: ra".
4Ngonhaung" re Moshe yang byid' ra" Tarha" re ngonhaung" phug' cao" ra".
Aiwa ngonhaung" byumyu" nho: phug' de; thao" ra" jo,nho" ngad: ra".
5 Asang wa- yao" byumyu" kaung qe we' ade, au: jhaung qe daga" phaung: ham: na: au: re
yao" byumyu" Israel nho: kho:kham boe" lo: ra".
6Moshe wa Rubin kaung we' sin: yang:-
Rubin wa byu malaug qere:
khonhae" re: mashid dam: vashao:- ga: ta" ra".
7Yao: wa Yuda kaung we' sin: yang:-
Asang we"- bao" yu nae" qhid' mae" yao: hug' yao: rure tae" gyo: byid: wa,.
yao: bam re gatau: kaung boe: we' dam: zham" qhan: byid: wa,.
Aimung: yao" gyevo qere yao: bam qhid' mae" khe' zin: byid' rumae
bao" thaug' byid: wa,- ga: ta" ra".
8Levi kaung we' sin: yang:-
Asang we"- nao wa ni" myid mae o ngaui: rure Urim we' Thummim khyo" jhaug' zaug: ra"
ni" daui daui mo, Levi qekhyo" qhu" byid' ra".
Nao wa yao: bam re Masa mae jham" qu" ava".
Aimung: Meriba qid thug' jham mae yao: bam re kyang" san: yu: ava".
9Yao: bam wa myhi" pho" mangad: lao" mao:nhaung: bam mangad lao" myid:zo: qere
tho' mae" nao re je: jhaug' zaug: ra" khyo qhu" byid' ako".
Yao: bam wa ni" nho: amyin" jham re phug' cao" ako".
Aimung: ni" nho: dao: thang" re jhaug' zaug: ako".
10Yao: bam wa ni" nho: tarha" re phug' cao" nae" qhid' mae" ni" byumyu" re mho" byid' li" genae".
Yao: bam wa ni" nho: phan mae xeim: ngaui" byid' li" genae".
11 Asang we"- yao: bam: byumyu" kaung re qam: bo: lo nae" qhid' mae" bao" thaug' byid: wa,.
Yao: bam kad' ra" mau" zo" re ngaui byid: la,.
Yao: bam nho: gyevo alhab' re khyoe' pye' byid: wa,.
Yao: bam re khonhae" re: dadam: to" li" nhao lo:- ga: ta" ra".
12Yao: wa- Benyamin kaung we' sin: yang:-
Ce: byumyu" kaung wa Asang jhid'de; mung: gug:gam byid' ra" kaung ngad: ra".
Yao: wa yao: bam re dane, geim" lhaug' zaung" byid' na: ra".
Aimung: yao: wa yao: bam: phaung gaung: mae bona: jo; ra".
13Yao: wa Yoseb kaung we' sin: yang:-
Asang wa yao: bam: mug:myid re mug: qu: yang shaman" byid: vashao:-
Myidgaung gyid' mae" qid: yang re: shaman" byid: vashao:-
14Yao: bam nho: mug:myid wa ba yang lhe' mhang" ra" shi: khyo" shaman" ru qo" yu vashao:-
Lho khye' ayo, khao: ngo" mae shi: myo: sho' zaui: vashao:.
15Ganhae" gaco' mae" yao: bam: bug gaung jham mae gai: thao" ra" shi: byang" vashao:.
16Yao: bam: mug myid: mae gai: ru alhab' we' byang" jo; vashao:.
Myi: nga" na: ra" thao" paung" mae" jhau: ke' ra" yaug-
Asang: gai: ruyang shaman" byid: vashao:.
Yoseb kaung boe: mae ce: shaman" jeju jham joe" li" vashao:.
Pe"mung:ga"re- yao: wa yao: mao: yao:nhaung: bam: phaung gaung: mae" au: jhaung ngad: ra".
17Yoseb wa nung: lo:- qam: bo: ra" nung: lae" khyug jham qo" ra".
Yao" khyug jham wa- Manashe nho: ataung taung we'
Ephrim nho: atug tug ngad: ako".
Yao: wa ai: khyug jham: yang byumyu" qe re khe' thaung" ra" aimung:-
yao: bam re mug:myid thao" sho' khe' jhin" thug' pye' ra"- ga: ta" ra".
18Zebulun kaung we' Isakha kaung: ra" khyo re-
Zebulun wa panglai: dao mae" yao: bam: phaga: mau" mae aung doe na: dai vashao:-
Isakha nho: jo,nho" wa yao" yham mae myo" laug: lo vashao:-
19Yao: shid' zo: wa taung bug byu qere yao: shid' zo" nho: bam khyo khai: yu: mung:
ai: jo, qo mae jo; ra" xeim: ngaui" byid' ako".
Yao: shid' zo: wa yao: shid' zo: nho: jo,nho" re panglai: mae" we'
panglai: tham: yae mae jo; ra" ma dam: mae" qo" yu: ako"- ga: ta" ra".
20Yao: wa- Gad kaung we' sin: yang: yao: bam: mug:myid re ce" lu: ke' byid' ra" yaug-
Mao"So re caung:khin" byid: ge,-
Gad wa khang khyi we' dakhyo: lo,pau" we' au: gye, re bin" cad' kho' pye' nae" lao" na: ra".
21Yao: bam wa yao: bam: qhid' mae" gai: thao" ra" mug: re yu: ako".
Yao: bam re- au: jhaung dayaug: nho: gae bam gae byid: va".
Yao: bam wa- Israel au: jhaung qe we' daga" za: phaung: ham: na: au: re-
Asang: amyin" dao: jham we' tarha" jham re phug' cao" avako"- ga: ta" ra".
22Yao: wa- Dan kaung we' sin: yang:
Dan wa khangkhyi lo: nau" ngad: ra".
Yao: wa Bashan mae" byae: thug' li" ra"- ga: ta" ra".
23Yao: wa- Nabhtali kaung we' sin: yang:-
Nabhtali wa Asang: yang nga: yhe' byid' ra" jeju yang myo: sho' shaman" byid' ru qhug' ra".
Yao: bam: mug:myid wa- Galile tham: mae" mug: thao khyo joe" li" ra"- ga: ta" ra".
24Yao: wa Ashe kaung we' sin: yang:
Ashe wa gakaung qe tho' je yang: shaman" jeju qo" yu: ra".
Yao: wa yao: mao: yao: nhaung: bam: o ngaui: thao" yaug ngad vashao:-
yao" mug: re: zhanlun gae byang" sho' yaug: jo; vashao:.
25Yao" nho: vogaung: jham wa jo, to' kham: mo" jham: yang gug:gam byid' to: vageshao:-
Aimung: yao: wa khonhae" re: khyao za: gug:gam taung" qo" na vashao:- ga: ta" ra".
26Israel byumyu" qe we"- naonhaung" Mao"So we' dau: ra" so mana
yao: wa mug:gaung byang" sho' phungbao mae zaung: lai: phyid' lo" ra".
Naonhaung" re bao" thaug' yu nae" qhid' mae" jham thaui: re zaung mung: li" ra".
27Mao"So wa khonhae" re:- naonhaung" re gyevha: byid: yaug ngad: lai: lo va".
Yao" nho: apyad ato mae" lo,pau" wa naonhaung" bao" thaug' ru ngad: ra".
Naonhaung" qhid' au: khyo jhin" vao lo: ra" au: re yao" yang naonhaung" gyevo qere khe' thug' pye' byid' mung:
yao: bam alhab' re phyo' qeim" pye' nae" qhid' mae" naonhaung" re ta" ava".
28Aimung: Yaku nho: myid:zo: qe wa yaug yo za: qo" na genae".
Mug:gaung mae" nghin: yang myidgaung re sheim" jhug' byid' ra" jo, qo-
gaug zo we' sabyi qang: byang" ra" mug:gaung- yaug yo za: qo" na: ako".
29Israel we"- nao wa khonho" ngaui lho" ra" yaug ngad i?
Asang: yang khyad' yu: ru qhug' ra" naonhaung" we' dau: ru kho: byumyu" re: mana ngad: ra".
Asang yao: yao:- naonhaung" re gyevha gug:gam byid: mung:-
aung doe, nhao nae" qhid' mae" naonhaung" gyego we' shae pyang: boe" byid' ra".
Naonhaung" gyevo qe wa nhag' khyag' yu nae" qhid' mae"
naonhaung" re li" mho' yao: li" genae".
Aimung: naonhaung" wa yao: bam re qo" zab: nhae" pye' li" genae".
Currently Selected:
MHO" PEIM: 33: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009