MHO" PEIM: 31
31
Moshe Khu Mae Yoshu Au: Jhaung Boe" Lo: Ru
1Moshe wa Israel byumyu" re xo' ta" mung:- 2Ana" ngo wa 120 zin ngad va" rumung: naonhaung" au: jhaung maqo" boe" lo:- ai tho' mago"- Yodan gyaung: re ngo maqo" gau" phyid' nae" ga: ngore Asang: yang bin: ta" kyo: va". 3Naonhaung" qhid' mae naonhaung" Mao"So Asang yao: ye: mung: aimae na: ra" byumyu" qere phyo' qheim" se' pye' li" nae". Aimung: naonhaung" wa- yao: bam: mug:myid re yeqo" sang: yu genae". Aimung: Asang ta" to: va" ru we' dakhyo: Yoshu wa naonhaung" au: jhaung boe" li" nae". 4Naonhaung" nho: Mao"So Asang wa byu qenho: kho:kham Sihon kho:kham Oga,- Amori we' yao: bam mung" re phyo' qheim" pye' ru we' dakhyo: yao: ai: byumyu" qere phyo' qheim" pye' byid' li" nae". 5Asang wa naonhaung" re aibam: dao mae aung: pye' nhao: li" nae"- aimung: naonhaung" wa ngo: yang naonhaung" re ta" ru we' dakhyo: khyag' za: yao: bam re kad' ca" genae". 6Myid: phyid' ci mung:- vae" myid bo ge,. Yao: bam re dagyaug ge,. Naonhaung" nho: Mao"So Asang yao: naonhaung" we' daga" ngad nae" yao: wa naonhaung" we' daga" ngad nae" yao: wa naonhaung" re mato: co' nae" mangad: lao" mashapye' pye' nae"- ga: ta" ra".
7Ai: thao Moshe wa- Yoshu re khai: yu mung: Israel byumyu" qe alhab' nho: qhid' kheim: mae yao: re- myid: phyid' ci: mung:- ve" ra" myid bo wa,- nao wa ce: byu qere- Asang: yang yao: bam: phug' phyid' qere dao:so: byid' to" ra" mug:myid khyo yevao: sang: na nae" qhid' mae" jhui" ye: nae" yaug ngad: ra". 8Nao re Asang yao: yao: au: she mung: nao we' daga" ngad: li" nae". Yao: wa nao re mato: co' nae" mashapye' nae". Aimung: nhag' lam: dathao" gyaug re: dagyaug- ga: ta" ra".
Nhad' Zin Byang" Khao: Ngo" Tarha" Re Nghe' Ca" Ra" Khyo
9Aimung: Moshe wa Mao"So nho: Tarha" re tung" mung: Asang: Dao: Thang" Ban" re qu" nae" qo vin: ra" Levi khinjaung qe we' Israel zug: ade, au: jhaung qere byid' ra". 10Yao: wa yao: bam re- nhad' zin thao" khao: ngo" jhin: phyaug' pye' ra" zin joe" lao" lao" ceru re zaung poe mae thoe qi: we' nghe' ge,. 11Israel byu qe naonhaung" Mao"So Asang re caung:pa" nae" qhid' mae" caung:pa" jo, qo khyo li" ko" ra" au: re yao: bam re ai nghe' kyo: ge,. 12Yauggai- myiqe:- zoshao qe we' naonhaung" vogaung: jham mae na: ra" taung bug byu alhab' re daga" za: khai: zhang wa,- ailao" yaug khao: ngo" wa airu re the' gyo: mung:- naonhaung" Mao"So Asang re nga: yhe' byid: nae" we' yao" mho" shid' dao: jham re jhaug' zaug taung" phug' cao" nae" qhid mae" qo" mho" zhao: yu: li" genae". 13Cekhyo" yang- naonhaung" Mao"So Asang: Tarha" re khonhae" re: maqhug' gyo" qu" ra" naonhaung" myid:zo: qe wa aire the' gyo" yu: li" genae". Airumung: yao: bam wa- Yodan gyaung: thoete' mae" naonhaung" yesang: na nae" mug myid mae yao: bam daui: na: ra" ayo, gu: mae Asang re qo" phug' cao" nae" qhid' mae" yao: bam mho" zhao: yu ca" li" genae"- ga: amyin" byid' ra".
Moshe Re Byid' Ra" Asang: Lo" Thao" Mae" Mho" Shid' Ru
14Ai: thao Asang wa Moshe' re- Nao wa myao" sho' maqo" na lo nae" Yoshu re khai: yu mung: yao: re Zaung khyo jhui" li" wa,- airumung: yao: re ngoyang khyo mho" shid' byid: nae"- ga: ta" ra". Moshe we' Yoshu wa zaung khyo ye: mung:- 15Asang wa ai: jo, qo mae" Zaung kham: zang nhae mae jham thaui: zang baung: khyo" yao: shid' zo: re na: qhu" byid' ra".
16 Asang wa Moshe re- mataung" myao" re nao shid zai va". Aimung: nao shid: byaug thao ai: byumyu" wa ngore jhaug' mazaug lo: boe" li" mung: ngo yao: bam we' kad' to" ra" dao: thang" re phyo' pye' li" genae". Yao: bam wa ngore lhaui" pye' mung: yao: bam vao ye: nae" za: angad: lo" ra" mug: mae" so jham re caung:pa" li" genae". 17Airu boe" lo lao" yao: bam re ngo nhag' yo" li" nae". Yao: bam re ngo shapye' pye' mung: yao: bam wa phyo' qheim" pye' ru qhug' genae". Yao: bam: dao mae gyaug pho: qug: khai: byo; qeim: ru myo: sho' joe" lo: li" nae". Alao" yao: bam wa- yao: bam: Mao"So ngo- yao: bam we' mana lo: mung: cejham boe" na: rure myid: beim: so" lo: li" genae". 18Ai: au: re ngo wa- yao: bam re mabo: bao" yu nae"- pe"mung:ga"re- yao: bam wa makhyang: mashab: ru gatau: so jham re caung:pa" avako".
19Ana" ce: nghaui" caung: re tung" to: wa, Israel byumyu" qere airu mho" byid: wa, airumung: yang:- airu wa yao: bam re ca nae" sagse: boe" jo; li" nae". 20Yao: bam: phug' phyid' qere dao:so: byid' to: va" ru we' dakhyo: yao: bam re ngoyang ce: jo,nho" byang" mung: myid xau gai: ra" mug: khyo jhui" vao ye: nae". Ai: jo, qo mae yao: bam wa yao: bam o: nho" zo:ve qo" yu genae". Aimung: yao: bam wa myan myan za: qo" na: li" genae". Ngadqere: yao: bam wa gashad' khyo nghung" lo" mung: gatau: so jham re caung:pa" li" genae". Yao: bam wa ngore ngag: ha: pye' mung: nga" nho: dao: thang" re phyo' pye' li" genae". 21Aimung: gyaug ci" pho: no phyo: myo: sho' wa yao: bam mae joe" lo: li" nae"- ngadqere: ce: nghaui" caung: re akhun" na shi: genae". Aimung: airu wa yao: bam re ca nae" qhid' mae" sagse: khyo" ajo; jo; nae". Ana" ngadqere:- yao: bam re ngo: yang byid: nae" ein: dao:so: byid' to" ra" mug: khyo ngo majhui" vao shimae" yao: bam pe" myid: na: rure ngo ba: pye' byid' ra"- ga: ta" ra".
22Moshe wa aiba jao" yao: ai: nghaui" caung: re tung" to: mung: Israel byumyu" re airu mho" byid' ra".
23Ai: thao Asang wa- Nun nho: yauggai zo: Yoshu re myid: phyid' ci mung: vae" ra" myid bo wa,- nao wa Israel byumyu" qere- ngo: yang dao:so: byid' to" ra" mug:myid khyo jhui" ye: ca" nae". Aimung: ngo wa nao we' daga" ngad nae"- ga: ta" ra".
24Moshe wa mugsug' dapaug' mae daja: re: magyo" losho' lha" yang: Mao"So: Tarha" re tung" to" ra". 25Yao: bin: tung" lao" Asang: Dao: thang" Ban" re qu" caung: na: ra" Levi khinjaung qere- 26Mao"So: Tarha" mugsug' paug' re yu mung:- naonhaung" Mao"So Asang: Dao: Thang" Ban" yae mae khyo" to: ge,- ailao" airu wa ai: jo, qo mae yao" byumyu" qere ca nae" qhid' mae" sagse: boe" jo; li" nae". 27Yao: bam khoqhi" nhag' lam: qao: rure we' tau: lhan: mo, ngad: rure ngo ba: ra". Yao: bam wa nga" pyad mae Asang re tau: lhan" lo: avako". Aimung: ngo shid thao re yao: bam wa je: yang: tau: lhan" li" genae". 28Naonhaung" nho: byumyu" kaung alhab' mae" au: jhaung qe we' zug: ade, qe alhab' re nga" qhid' kheim: mae khai: zhang ge,- alao" ngo wa yao: bam re cegu: qo" ta" kyo: nae". Ngo wa yao: bam re ca nae" sagse: khyo" mug:gaung we' myidgaung re khai: yao nae". 29Ngo shid: byaug: thao mae ai: byumyu" wa makhyang: mashab mung: li" ru we' yao: bam re ngo mho" shid' to: va" rure ngag: ha: pye' li" genae" rure ngo ba byid' ra". Aimung: joe" lo nae" ra" ayo, mae yao: bam wa byo; qeim: ra" qug: khai: phau: zo" li" genae". Pe"mung:ga"re- yao: bam wa dakad' ga: tam" to" rure kad' mung: Asang re nhag' yo: nhao: li" genae"- ga: ta" ra".
Moshe Nho: nghaui" caung:
30Ai: thao Moshe wa- Israel byumyu" alhab' tae" gyo" na: ra" au: re nghaui" caung: dao: kheim: re nhad' thoe: yang ta" kyo" ra".
Currently Selected:
MHO" PEIM: 31: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009