MHO" PEIM: 29
29
Moba Mug: Mae Israel Byumyu" We' To" Ra" Asang: Dao: Thang"
1Cegu: wa- Moba mug: mae Israel byumyu" we' to: nae" qhid' mae" Moshe re Asang: yang amyin" byid' ra" dao: thang" mae bo: ra" dao: kheim: jham ngad: ra". Ceru alhab' wa- Sina bam mae Asang: yang yao: bam we' to" ra" dao: thang" mae laung" ke' ru ngad: ra".
2Moshe wa shava byu alhab' re khai: zhang: to: mung: yao: bam re- Asang: yang Egutu kho:kham re yao" zug: ade, qere- yao" mung" re khoru: kad' lai: lo: rure- naonhaung" yao: myao: avako". 3Asang: yang kad' ra" gyaug pho: qam" no jham mug' pho: ve,lho we' qi" qhang: ra" mug' pho: mau" zo" re naonhaung" myao vako" ra". 4Ngadqere: ana" ba joe" sho' naonhaung" thaung" qhug' lai: lo: rure yao" yang naonhaung" re maba: gyo: nhao shingad: ra". 5Byid xe zin geim" naonhaung" re Asang: yang din"pyad' yo khyo" jhui" lai: lo: re naonhaung" mai bau: jham we' khyid zhaung: jham khonhae" re: majad: byaug ngad: ra". 6Naonhaung" wa- zo: nae" mug maqo"- shaug' nae" sabyi re: naug qang: re: maqo" ngadqere:- Asang wa naonhaung" Mao"So ngad: rure naonhaung" ba gesho' mho" shid' nae" qhid' mae" naonhaung" mae ca" qo: rure qu" jaung byid: va". 7Aimung: ngonhaung" ce: jo, qo khyo joe" li" re- Heshbon kho:kham Sihon we' Bashan kho:kham Oga shid' yaug wa ngonhaung" re khe' zin: nae" ga: thug' li" ako". Ngadqere: yao: shid' zo: re- ngonhaung" yang khe' aung: pye' va". 8Yao: shid' zo" nho: mug: re yu: pye' byid: mung: airu re Rubin- Gad we' Manashe kaung agaung: kho' re- kho' gae: pye' va". 9Aimung: naonhaung" kad' ru ja: khao: ngo" mae aung doe, nae" qhid' mae"- ce: dao: thang" mae bo: ra" dao: kheim: alhab' re jhaug' zaug taung" phug' cao" na ge,.
10-11Ana" ba naonhaung" alhab' mo,- naonhaung" au: jhaung qe we' zug: ade, qe- naonhaung" yauggai qe- naonhaung" myiqe: qe we' naonhaung" phaung gaung: mae na mung: naonhaung" qhid' mae" thao: gaug qid khae byid' ra" taung bug byu qe wa naonhaung" Mao"So Asang: ra" qhid' kheim: mae ana" ba ye; jo; ako". 12Naonhaung" wa ce: jo, qo mae- ana" ba naonhaung" Mao"So Asang: yang naonhaung" we' to" to: nae" dao: thang" re lhang: yu mung:- aimae bo: ra" qo re khae: yu ca" ko" ra". 13Aimung: Asang wa naonhaung" we' naonhaung" phug' pho" Abraham- Isag we' Yaku bam re yao" yang dao:so: byid' to" ru we' dakhyo: naonhaung" re yao" byumyu" khyo" we' yao: wa naonhaung" Mao:So khyo" gang" tang nhao: ra". 14Asang: wa ce: dao: thang" re ana" cemae na: ra" mo, we' za: kad' to" ru mangad:- 15Yao: wa ana" ba ce: yao" qhid' kheim: mae ye; jo; ra" ngonhaung" alhab' we' re: makhau: li" shi" ra" ngonhaung" nho: myid:zo: qe we' re: dao: thang" to" ru ngad: ra".
16Egutu mae" byuna khoru: ngad: ru we' gayaug: mug: khyo" gyaung: su" lai: lo: re khoru: mung: rure- naonhaung" myid: beim: gau ngad vako" ra". 17Sag' thaung:- laugbaui- ngaui we' qhang: yang kad' to" ra" yao: bam: qu" ca' sho' ra" solho jham re naonhaung" the' myao: avako". 18Ana" ba cemae ye; jo; mo, mae" yauggai- myiqe: khoyaug re:- dayham khaung bao: we' dayham khaung bao: re:- ngonhaung" nho: Mao"So Asang mae" phaug' lo" mung: gatau: byumyu" qenho: so jham re macaung:pa" genae" qhid' mae" khyag' za: lha" na ge,. Ceru wa kho: mung: daug thin: ra" agae yaug thug' li" ra" agyi we' dau: li" nae". 19Ce: tarha" mae mho' to" ru jham re ana" ba cemae the' gyo" yu yaug khag' ngadqere:- yao: o: ra" khyo: nhag' lam: qao taung" ye" lo" ngad: re lhao" re: yao: mae alhab' agai za: boe" nae" ein:- yao: yao" gaung re damyid: lam- airu wa- naonhaung" mae gai mo, we' makhyang: mo, alhab' re dakhyo: za: byo; qeim nhao: li" nae". 20Asang wa- airu" yaug re qobo khyad' byid: nae" mangad:. Ai: atha" Asang: nhag' jam: yo" ru wa yao: re mhai: zao" mung:- yao: bin: byo; qeim sho' ce: mugsug' paug' mae tung" to" ra" qug: khai: qam" alhab' wa yao" dao mae gyo" zao" li" nae". 21Asang wa yao: re- Israel byumyu" kaung alhab' mo; phaung mae" phoe' pye' mung:- Asang: tarha" mugsug' paug' mae tung" to" ra" dao: thang" khug mae" nhang: kheim: jham alhab' japhin: we' dakhyo: yao" dao mae qam" gyo" nhao: li" nae".
22Cethao: ne, mae" naonhaung" myid:zo: qe we' mug: va: mae" taung bug byumyu" qe wa Asang: yang naonhaung" dao mae joe" nhao: ra" qug: khai: qam" jham we' khyag' qhui leim zo" rure the' myao: li" genae". 23Qhovo: yo jham wa- vhang we' xo: bam" pye' mung: shao" byaug: li" nae"- pe" re: magai: qho: zo: nae"- aimung: ai: jo, qo mae mhin jham lhao" mayaug lo nae" naonhaung" mug:myid wa Asang nhag' jam: yo" ra" au: re Asang: yang phyo' qeim" pye' ra" Sodom we' Gomora ru:- Adma we' Zeboiim vogaung: jham we' dakhyo: boe" lo" li" nae". 24Ailao" damugmyid geim" wa Asang wa pe"mung: yang: yao: bam: mug:myid re ceru: kad' byid' laug i? yao" gyaug pho: nhag' jam: yo" ru wa pe" mae" qhid: lo: laug i? ga: myid' li" genae". 25Aimung: dao: phyid kam" wa- yao: bam: phug' phyid' qere Egutu mae" jhui" thug' lo: ra" au: re- yao: bam: phug' pho" qenho: Mao"So: yang yao: bam we' dao: thang" to" ra" dao: thang" re- Asang: byumyu" yang phyo' pye' mung: boe" lo: ru ngad: ra" ga: ta" li" genae". 26Yao: bam wa- qhid' phyao: yao: bam khonhae" re: macaung:pa" qu" ra" so jham- macaung:pa" nae" qhid' mae" Asang: yang yao: bam re tam" to" ra" so jham re yao: bam caung da" byid' ako". 27Aimung: yang:- Asang wa yao: bam re nhag' yo" lo mung:- ce: mug'sug' paug' mae tung" to" ra" qug: khai: qam" alhab' re yao: bam: mug:myid mae nhao: ke' byid' ra". 28Asang wa xo sho' nhag' yo: mung:- yao" nhag' yo" ruyang yao: bam re yao: bam: mug: mae" phan" pye' ru we' taung bug: mung" khyo shalhaui" pye' ra"- aimung: yao: bam ana" ba ai: jo, qo mae na: bam: ako"- ga: ta" li" genae".
29Ngonhaung" nho: Mao"So Asang wa gatau daqhae: re nyham" shaung: to" ra". Ngadqere: yao: wa yao" tarha" re qhu" byid' ava". Aimung: ngonhaung" we' ngonhaung" nho: myid:zo: qe wa aire apyad ato mae phug' cao" na: bam ca" ra".
Currently Selected:
MHO" PEIM: 29: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009