MHO" PEIM: 24
24
Myi: Lao Jho" Gao" Ru We' Lo, Dam: Xo' Ru
1Byu dayaug wa myiqe: dayaug re lo, xo' yu mung: thao re- yao" yang maqu" ngaui: ru daja: ja: the' myao: ra" mathao mae yao: re ma-o lo: ga: myid: phyid' mung: yao: wa- myi: lao jho" gao: nae" mugsug' tung" byid: yang: ai: myiqe: re yao" yham mae" phao nhao: ke' ein gelang:- 2Ai: thao- ai: myiqe: wa yauggai gatau dayaug dam: yu: ein gelang:- 3Aimung: ai: yauggai re- yao: re madam: o lo: mung: myi: lao jho" gao: nae" mugsug' tung" byid: yang: ai: myiqe: re yao" yham mae" phao: nhao: pye' ein gelang: mangad: lao" thao mae" yauggai yaug shid: pye' ein gelang:- 4Ai: shid' ja: mae" khoja: boe" ngadqere: yao" sao qhid' mae" yham sang pho" wa yao: re madam: gai: lo, xo' yu ngad: ra". Yao: wa ai: myiqe: re yug va" ein: myid: pye' ca". Yao: wa ai: myiqe: re dam: lo,xo' yu: ngad: re- ai wa- Mao"So re maphug' makhyad' kad' ru ngad: ra". Naonhaung" wa- naonhaung" Mao"So Asang: yang naonhaung" re byid: nae" mug: mae airu" ru gyaug pho: qobo re magai: kad' nae".
Tarha" Ja: Nam Jab
5Yauggai dayaug wa- asag' shi" myi: yu: re yao: re gyezo: magai: kad' nhao nae" gatau mung" shava mau" re: magai: zaui: nhao nae" yao: wa yham mae na mung: yao" yham sang myhi" we' daga" qo" pyo" na nae" qhid' mae" mau" mae" dazin loe, nhao ca" ra".
6Nao wa dayaug yaug re daja: ja: jhid' byid' re yao" laug lhang re pakham: khyo" magai: yu: pye' byid: nae". Ceru: kad' re ai: byu qe daui: na nae" qhid' mae" zo:ve nyhang" ra" zai re yu: pye' byid' ra" khyo" boe" doe, nae" ngad: ra".
7Israel mao:nhaung: yao: cao: dayaug yaug re taung" yu mung: jeim khyo" aung: zo" pye' yaug khag' re ngadqere: se' pye' ca" ra"- ceru: kad' yang: naonhaung" wa ce: makhyang: mashab: rure qo" yu: pye' nae" ngad: ra".
8Nao wa- gyaug pho: ye,bab de; re Levi khinjaung: yang ta" rure khyag' za: cao" ca" ra" yao: bam re ngoyang byid' to" ra" mho" shid' dao: jham re cao" ye: wa,. 9Naonhaung" Egutu mae" phao: lo: ra" au: Miriam re- naonhaung" Mao"So Asang: yang pe" kad' rure myid: beim: ge,.
10Nao wa byu dayaug yaug re daja: ja: jhid' byid' ra" au:- yao" yang pakham: khyo" nao re byid: nae" yao" mai bau: re yu nae" qhid' mae" yao" yham khug khyo davao ye:- 11Taung gaung mae yelao" na wa, aire yao: re cithug' li" nhao wa,. 12Yao: wa myaung yaug qe ngad: re- ai: mai bau: re damyi: geim" dayu: to: byid:- 13Airu re yao: jhao" myi" thao khao: ngo" dam: tug' byid: wa,- aire yao: wa airu qo" ve; yab nae" ngad: ra". Ailao" yao: jeju beim: mung: ni" Mao"So Asang wa nao re ngaui: li" nae".
14Naonhaung" nho: vogaung: jham mae" davo vo mae na: ra" Israel mao:nhaung: ngad ngad taung bug ngad ngad myaung sho: mo, qo ca" ra" okaung re damhug' pyag' zo: ge,. 15Ba khao: ngo" ba mavao shire- yao: re ai: ba mae" okaung aphug' byid: wa,- yao: wa ngaui qo yaug ngad mung: aire qo" yu nae" qhid' mae" myid: lam: na: ra". Nao: yang yao: re mabyid: ngad: re yao: wa ai: qhid' mae" Asang re hug' yao: li" nae" ailao" nao wa qobo qo" yaug boe" li" nae".
16Myhi" pho" qe wa- yao: bam: yao: zo: qe shad' nghung" ra" qobo: mathao mae se' ru magai: qhug'- yao: zo: qere: yao: myhi" yao: pho" bam shad' nghung" ra" qobo: mathao mae se' pye' ru magai: qhug'- byu dayaug wa yao: yao: shad' nghung" ra" yug: mau" ra" mathao mae za: se' pye' ru qhug' ca" ra".
17Taung bug byu qe we' cug' zonau" qere- yao: bam qo" yu ang: ru dakhyo" pye' byid: ge,. Cug' mo" myhi" nho: mai bau: rere:- yao: re jhid' byid' ra" ngaui qhid mae" pakham: khyo" dayu: to: ge,. 18Naonhaung" wa Egutu mae jeim boe" co' mung: naonhaung" Mao"So Asang: yang naonhaung" re khyad' yu: rure myid: beim: ge,. Ai: mathao mae- ngo wa naonhaung" re ce: amyin" dao: byid' to: va".
19Nao wa gaug zo re yad mung:- nao yad: phyid' to: va" gaug zo damyo" re maqo" tai: yu: ra" au:- ai: qhid' mae" dadam: tug' ye: lo:- airu re taung bug byu qe- cug' zonau" qe we' cug' mo" qe: qhid' mae" tang" to: byid: ca" ra". Ailao" naonhaung" Mao"So Asang nao kad' ru ja: khao: ngo" mae nao re shaman" byid' li" nae". 20Ni" zhanlun shi: re nao dalhang bin: phyo' lao" dang: rure daye: dam: yu lo:- aigu: wa taung bug byu qe- cug' zonau" qe we' cug' mo" qe: qhid' mae" ngad: ra". 21Ni" sabyi shi: re nao dalhang bin: phyo' yu lao" sabyi khyae jham khyo shid' lhang khyo" yang: dadam: yekam: lo:- dang co' ra" sabyi shi: jham wa taung bug byu qe- cug' zonau" qe we' cug' mo" qe: qhid' mae" ngad: ra". 22Egutu mae naonhaung" jeim doe; lo: rure nao khonhae" re: dato" myhid' ge,. Ai: mathao mae- ngo wa naonhaung" re ce: amyin" byid' to: va".
Currently Selected:
MHO" PEIM: 24: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009