DANIELA 4
4
Nebugkhaneza Myao: Ra" Yab Mo, Shid' Ja: Ein: ja:
1Kho:kham Nebugkhaneza wa mug: myid geim" mae" amyu" mung"dan: jham- byumyu" cao jab myan" aja:ja: jhau mo, alhab' jhao" o mae" amyin" lau dao: re vhin: ke' ra".
Bang" se" ke' ra" wo"- 2Myao: thao" Mao"So: yang ngo re qhu" byid' ra" mug" pho: qhu" lho: akhyo re tae" gyo: ge,.
3Ngonhaung" re Mao"So: qhu" byid' ra" mug' pho: jham wa khoqhi" qi" qhang: ra" i?
Yao: kad' ra" mug' pho" mau" jham wa khonho" kheim: so' qi" ra" i?
Mao"So wa apyad ato mae kho:kham ngad: ra". Yao: wa ayo, byang" sho' mae eib: na: li" nae".
4Ngo wa nga" kho:kham kho" mae jo,nho" zai yo myo: sho' kham zo: mung: myan myan na: jo,- 5Ngadqere: ngo yab: jo; ra" au: gyaug din taung" ra" yabmo, daja: mo, mung: qu" gyaug qu" lhaung sho' ra" qhu" lho jham re the' myao:- 6Ngo wa ai: yab mo; nho: lajheim: re qo" ta" phyid: kyo: nae" qhid' mae" Babelon mae" kho:kham pha,jhi" byid: mo, alhab' re khai: to: nae" amyin" byid' ke' va". 7Aimung: boe, phyid' mo, mandan: vha" mo,- jan: zho: mo, we' kyi do: qu" mo, alhab' re khai: jhui" vhao" lo: ako". Ngo wa yao: bam re nga" yab mo, ta" kyo: ngadqere: yao: bam ai: lajheim: ngo re maqo" ta" shid' ngad: ako". 8Ai: thao Daniela vao li" ra". (Yao" mang wa nga" nho: so mang khyo" cao" yang: Belteshaza ga: re: mang: ra".) Gyang" lho" ra" so jham: nho: byo wa yao: mae bo: mung: ngo ta" kyo: va". Ngo wa yao: re ce ru: ein: ta" va". 9Boe, ba: phyid' mo, nho: au: jhaung Belteshaza we"- gyang" lho" ra" so jham: nho: byo wa ni" khug mae bo: rure ngo the' myao mung: nao wa mug' pho: ja: alhab' re nao ba: gyo" ra". Nga" nho: yab mo, wa ceru: ngad: ra". Ai wa pe" ngad: ru ngo re ta" shid' la,.
10Ngo yab: myhid' jo, ra" au:- myid gaung dao agaung: mae gyai qi" ra" sag' mo" gae dagae re qhu" lho mae the' myao:- 11Airu wa je: je: yaug: qi" li" mung: mug: gaung khyo joe" lo" ra". Aimung: myid gaung dao mae" byu yaug khao: ngo" yang ai re qo" the' myao: ako". 12Ainho: avho' jham wa yaung" mung: ai: ashi: jham wa damug: myid: geim" qo" ceim" zo: nae" nho" mung: zaui" cam" lao" jo, ako". Ai: sag' qab mae seyo: gug'nyhug' jham no" na: ako". Ai: sag' kaung jham mae ngho' jham ngho' sad' sad' mung:- kao so' daui: ra" ja: khao: ngo" wa ai: ashi: re zo" ako".
13Ai: qhu" lho we' sin: yang: ngo myid: qu" na: au: mug:gaung mae" mug: lagyo: dayaug zhao: zhao: mung: lhaug' qu" nho: hab gyo" li" rure the' myao:- 14Yao: wa thoe qi" ke' mung:- ai: sag' gae re thau: khyang: ke' mung: akaung jham re sag' vho' jham re xe" pye' yang: sag' shi: jham re phyo' pye' byid: ge,. Ai: sag' qab khug mae" gug'nyhug' jham re khe' tao" pye' mung: sag' kaung jham mae" ngho' jham re khe' sin" pye' ge,. 15Ngadqere: ai: sag' ngad re wa jo, to' we' gyid: jao co: taui" yang taui: mung: myid gaung mae tang" to: ge,.
Airu re pa: din" mae" vohau: we' daga" to: co' ge,. Ana" byu ceyaug: dao mae nghin khyo" sheim: nhao mung: yao: wa gug'nyhug' jham we' sag' zo: vo: zo: jham we' daga: na: jo, vashao:- 16Yao: wa nhad' zin lam: lam: byu xao su myid mabo nae"- gug'nyhug' myid bo: jo; li" nae". 17Ceru wa zhao: zhao: mung: lhaug' qu" na: ra" mug: lagyo: jham: nho: myid: phyid' to" ra" khyo ngad: ra". Aimung: khyi" khao:ngo" mae" byu alhab' wa- xao su byu: mung"dan: jham: dao mae myhao: thao" ra" Mao"So nho: kheim: so' yang eib: na mung: yao: wa yao: khyin: yu: ra" yaug khag' re ngadqere: ai: mung"dan: jham qo" byid' ra". Je: maboe" madoe; thao" ra" byu qere lhao" re: qo" byid' ra".
18Kho:kham Nebugkhaneza wa- ceru wa ngo myao: ra" yabmo, ngad: ra". Belteshaza we"- Yab mo, ai pe" lajheim: bo: ru ngo re ana" ta" kyo: la,- nga" kho:kham vang" mae" pha,jhi" byid, mo, khag' re: ngo re maqo" ta" kyo: ngad: ako". Ngadqere: nao kam" wa qo" ta" kyo" ra". Pe"mung:ga"re gyang" lho" ra" so jham nho: byo wa nao mae bo: ra"- ga: ta" ra".
Yabmo, Re Daniela Lajheim: Pheim: Kyo" Ra" Khyo
19Ceru: lao"- Belteshaza ga: re: mang: ra" Daniela wa gyo" din: mug' byaug mung:- pe" maba: tho' ta" lo: ngad: ra".
Kho:kham pho" wa yao: re- Belteshaza we"- ai: yabmo, we' airu: nho: lajheim: wa nao re magyaug: mug' nhao vashao:- ga: ta" ra". Belteshaza wa- Asang kho:kham we"- ai: yabmo, we' airu: nho: lajheim: wa nao re mangad: lo:- ni" gyevo qere qang: qa: we"- 20Ai: sag' gae wa- mug:gaung joe" myhi sho' myao: mung: mug: myid dao mae" byu alhab' mo, yang ceim" the' myao: ra". 21Ai: nho: sag' vho' jham wa gyai yaung" mung: aimae damug: myid geim" mae" yaug khao:ngo" re qo" khau nae" nho" sag' shi: zaui" ra". Ainho: sag' qab mae seyo: gug'nyhug' jham khug: no" na mung: ai: nho: sag' kaung jham mae ngho' jham ngo' sad' sad' ako".
22Asang kho:kham we"- nao wa ai: gyai myhao mung: gang" tang" ra" sag' mo" gae ngad: ra". Nao wa gyai qi" qhang sho' yaug: do, lo" mung: mug:gaung re myhi: ra". Aimung: ni" nho: kheim: so' wa damug: myid geim" dao mae cin" je" lo" ra". 23Asang kho:kham nao lhaug' qu" na: au: re mug:gaung mae" mug: lagyo: dayaug gyo" li" mung:- ai: sag' gae re thau: khyang: ke' mung: phyo' qheim" pye' wa,- ngadqere: sag' ngad re wa myid gaung mae tang" to: byid: wa,- aire jo,to' we' gyid: taui" yang taui: mung: ai: pa: din" mae vohau: we' daga" to: co' wa,- byu ceyaug: dao mae nghin gyo" sheim: vashao:- aimung: yao: wa gug'nyhug' jham we' daga" nhad' zin na: jo, vashao:-
24Aimung: ai: lajheim: wa ceru: ga" ru ngad: ra". Asang kho:kham we"- Ce: ru wa nao mae boe" lo nae" rure myhao: thao" ra" Mao"So: yang ta" kyo" ru ngad: ra". 25Nao wa byu phaung mae" khe' thug' pye' ru qhug' mung: seyo: gug'nyhug' jham we' na ca" li" nae". Nao wa nhad' zin geim" nung: jaung lo: we' dakhyo: vohau: zo: mung:- ni" dao mae nghin gyo" ra" din"pyad' yo mae yab ca" li" nae". Ailao" nao wa xao su byu: mung"dan: alhab' re myhao: thao" ra" Mao"So: yang zaui" ci" ru we' yao: wa aire yao: khyin: yu yang: khag' re ngadqere: qo" byid' pye' rure nao khae: yu: li" nae". 26Mug: lagyo: wa sag' ngad re myid gaung mae tang" to: nae" qhid' mae" amyin" byid' ra". Ceru wa damug: myid geim" re Mao"So eib: na: rure nao xam" so: lao"- nao kho:kham dam: boe" nae" ga" ru ngad: ra". 27Aimung: Asang kho:kham we"- nga" pha,jhi" byid: dao: re cao" wa,- qobo kad' rure thang: pye' wa, jo: rure kad' mung: myaung mo, re nhag' khyag' wa,. Aire nao wa xo' yang: qo" na: dai: li" nae"- ga: ta" ra".
28Cegu: alhab' kho:kham Nebugkhaneza mae dang za: boe" lo va". 29Lho" daxe: shid' khye' shi" kyo: re Babelon mae" yao" nho: kho:kham kho" yham khaungdao mae su" keim" au:- 30Yao: wa Babelon khonho" qi" qhang: mung: khid: rure qu" qu" shige,. Ngo wa nga" nho: kheim: so' we' kho:kham qam: o: nga" phungbao we' kho:kham qam: so' re qhu" byid: nae" qhid' mae" ai: rure nga" vogaung: mo" khyo" ngo zhaug' te" to" ru ngad:- ga: ta" ra".
31Ai: dao: kheim: jham yao" nhad' mae" mathug' shire mug:gaung mae" thoe dathoe jhau: thug' li" ra". Kho:kham Nebugkhaneza we"- ngo ta" rure tae" gyo: wa,- ni" kho:kham kheim: so' re ana" nao mae" yu: pye' byid' ava". 32Nao wa xao su byu: phaung mae" khe' thug' pye' ru qhug' nae". Seyo: gug'nyhug' jham we' na ca" li" nae". Aimung: nhad' zin lam: lam: nung: jaung lo: we' dakhyo: mhin: zo" li" nae". Ailao" myhao: thao" ra" Mao"So wa xao su byu qenho: mung"dan: jham re eib nae" kheim: so' qo" mung: yao: khyin: to" ra" byu khag' re ngadqere: airu: qo" byid' rure nao lhang: so" yu: li" nae"- ga: ta" ra".
33Ai: dao: jham wa aijao" yao: dang: lo: ra". Nebugkhaneza re xao su byu: phaung mae" khe' thug' pye' qhug' mung: yao: wa nung: jaung lo: dadau: we' dakhyo: mhin: zo" ra". Yao" nho: gaung dao mae nghin khyo" sheim: mung: yao" shomug' jham wa zeim baung: mug' we' dakhyo: yaug: qhang: li" yang: yao" nho: lo, sang: jham wa ngho' khyid sin: jham we' dakhyo: qhang: li" ako".
Nebugkhaneza Mao"So Re Caung:khin" Ra" Khyo
34Kho:kham pho" wa- nhad' zin lai: lo" lao" mug:gaung khyo ngo tau: qu" ke' re nga" nhag' dam: gyang" lo:. Ngo wa myhao: thao" ra" Mao"So re caung:khin" mung: apyad ato mae daui: na yaug re nga: yhe' byid' ru we' phungbao byid: va".
Yao: wa apyad ato mae eib: li" nae".
Aimung: yao" nho: mung"dan: wa ayo, alhab' mae gang" tang: jo; li" nae".
35Yao: wa myid gaung: dao mae" byu qere pe" mangad' khyo" qu" ra".
Mug:gaung mae" mug: lagyo: qe we' myid gaung dao mae" byu jham wa yao" nho: eib khang" ra" qao: mae ngad: ako".
Yao: myid: o: rure khag' yang maqo" ngag: thaug' ngad: ako".
Yao: kad' rure dao: myid: maqo" myid: ngad: ako".
36Nga" nhag' lam: dam: gyang" lo: re nga" nho: nga: ye; ru- nga" nho: kho:kham aya:- nga" mung"dan: nho: phungbao jham ngo re dam: byid' ra". Nga" zug: ade, qe we' byu zang qe wa ngo re lham: pang" tug: yu: ako". Aimung: ngo re qhid' phyo: mae" tho' lhao" je: qi" ra" kho:kham kheim: so' dam: byid' ako".
37Aimung: ana" ngo Nebugkhaneza wa mug:gaung mae" kho:kham re caung:khin" nga: yhe' byid: mung:- phungbao byid' ra". Yao: kad' ru ja: khao: ngo" wa jo mung: tarha" din: man" ra". Aimung: nhag' lam: myao: ra" khyo" kad' qhu" yaug khag' rere: yao: qo" deim" nyam: khyo" pye' ra"- ga: ta" ra".
Currently Selected:
DANIELA 4: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009