YouVersion Logo
Search Icon

Matta 2

2
Juldız izertlewshiler
1Iysa Yahudiyanıń Beytlehem qalasında, patsha Hirodtıń zamanında tuwıldı. Uzaq waqıt ótpey, Erusalim qalasına kúnshıǵıstan juldız izertlewshiler kelip:
2– Yahudiylerdiń jańa tuwılǵan Patshası qayaqta eken? Óytkeni bizler kúnshıǵısta Onıń juldızın kórip, Oǵan tabınıwǵa keldik, – dep soradı.
3Bunı esitken patsha Hirod hám onıń menen birge pútkil Erusalim qalası tınıshsızlanıp qaldı. 4Hirod xalıqtıń barlıq bas ruwxaniylerin hám diniy muǵallimlerin jıynap alıp, olardan Masiyxtıń qay jerde tuwılıwı tiyis ekenin soradı.
5Olar bılay dedi:
– Yahudiyadaǵı Beytlehemde. Sebebi payǵambar arqalı mınaday sózler jazılǵan:
6«Háy, Yahuda jerindegi Beytlehem!
Yahudadaǵı baslı qalalardan sen hesh kem emesseń!
Óytkeni Meniń xalqım Izraildı baǵatuǵın Kósem
Sennen shıǵadı»#2:6 Mix 5:2..
7Sonda Hirod juldız izertlewshilerdi jasırın shaqırtıp, olardan juldızdıń shıqqan waqtın bilip aldı. 8Olardı Beytlehemge jiberip:
– Barıp, Náreste haqqında jaqsılap bilip alıń. Onı tapqannan keyin, maǵan xabar beriń, men de barıp Oǵan tabınayın, – dedi.
9Olar patshanıń sózin esitip bolıp, júrip ketti. Sonda ózleri kúnshıǵısta kórgen juldız olardıń aldında júrip, jol kórsetti hám Náreste jatqan úydiń ústinde toqtadı. 10Juldızdı kórgende, olar qattı quwandı. 11Úyge kirip, Náresteni hám Onıń anası Máriyamdı kórdi de, Náresteniń ayaǵına jıǵılıp, Oǵan tabındı. Ózleriniń ǵáziyne ıdısların ashıp, Oǵan altın, ladan hám mirra#2:11 Ladan hám mirra – belgili bir tereklerdiń qatqan shiresinen tayarlanǵan xosh iyisli nárse. degen xosh iyisli zatlardı sıyǵa berdi. 12Olar Hirodqa qaytıp barmaw haqqında túslerinde eskertilgenlikten, basqa bir jol menen óz ellerine qaytıp ketti.
Mısırǵa qashıw
13Juldız izertlewshiler ketkennen keyin, Jaratqan Iyeniń bir perishtesi Yusuptiń túsine enip:
– Ornıńnan tur da, Náreste menen anasın alıp, Mısırǵa qash! Saǵan ózim xabar bergenimshe, sol jerde bol! Sebebi Hirod Náresteni óltiriw ushın izlemekte, – dedi.
14Yusup turdı da, Náreste menen anasın alıp, tún ishinde Mısırǵa qashıp ketti. 15Hirodtıń ólimine shekem sol jerde boldı. Solay etip, Jaratqan Iyeniń: «Ulımdı Mısırdan shaqırıp aldım»#2:15 Hosh 11:1., – dep payǵambar arqalı aldın ala aytqan sózleri orınlandı.
16Al Hirod juldız izertlewshilerdiń aldap ketkenin túsinip, qattı ashıwlandı. Juldız izertlewshilerden waqıttı bilip alǵan ol Beytlehemdegi hám onıń dógeregindegi eki jasqa shekemgi ul balalardıń hámmesin óltiriwdi buyırdı. 17Solay etip, Eremiya payǵambar arqalı aytılǵan mına sózler orınlandı:
18«Ramadan bir dawıs esitildi,
Qattı zarlap jılaǵan.
Balaların joqlap jılar Rahila.
Jubanǵısı kelmes, óytkeni joq endi olar»#2:18 Erm 31:15..
Mısırdan Nasıraǵa qaytıw
19Hirod ólgennen keyin, Jaratqan Iyeniń bir perishtesi Mısırda Yusuptiń túsine enip:
20– Ornıńnan tur da, Náreste menen anasın alıp, Izrail eline qayt. Sebebi Náresteni óltirmekshi bolǵanlar óldi, – dedi.
21Yusup turıp, Náreste menen anasın alıp, Izrail eline qayttı. 22Biraq Yahudiyada Hirodtıń ornına balası Arxelay patsha bolıp otırǵanın esitip, Yusup ol jerge barıwǵa qorqtı. Túsinde ayan arqalı eskertilgen ol Galila úlkesine ketip, 23Nasıra degen qalaǵa ornalastı. Solay etip, «Ol nasıralı dep ataladı», dep payǵambarlardıń aldın ala aytqanları orınlandı.

Currently Selected:

Matta 2: QrqMK22

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy