KUAN-KUANEN 1
1
Tujun pengajaren enda
1Enda me pengajaren Salomo, anak Daud raja Israel. #1Raj 4:32 2Tujunna e me nampati kalak gelah pentar dingen ngaloken pengajaren si mehuli, janah ngantusi ranan si mbages ertina. 3Iajarkenna kalak maka nggeluh pentar, bujur, adil dingen benar. 4Iajarkenna kalak si langa erpengalamen gelah cerdik, kalak si nguda gelah pantas dingen pentar. 5Pengajaren enda banci nambahi pemeteh kalak pentar, janah kalak si enggo meganjang sekolahna pe banci erlajar i jenari. 6Alu bage banci mbages isipatina erti si terbuni i bas pengajaren enda janah ietehna njabap persoalen-persoalen si ibereken kalak pentar.
Ajar man anak perana
7Guna ndatken pemeteh, si pemenana si la banci la lit i bas kalak e me mehamat dingen erkemalangen man TUHAN. Kalak lenge la nggit mperdiateken kepentaren dingen la ia nggit erlajar. #Jop 28:28; Msm 111:10; Kua 9:10
8O anakku, perdiatekenlah kai si ikataken nande bapandu man bandu, 9sabap ajarenna e nambahi lagu langkah si mehuli kap, si desken rudang-rudang i babo takalndu tah pe bura-bura i bas kerahungndu si erbahanca kam mejile.
10O anakku, adi iajuk-ajuk kalak jahat kam ola kam nggit. 11Kune ikatakenna nina, “Ota si darami kalak maka si bunuh! Ota sipesenang dirinta alu nggempangi kalak si la ersalah. 12Tupung sijumpai ia nggeluh alu mejuah-juah, tapi tupung si tadingken ia enggo mate. 13Sirampuk barang-barangna si meherga gelah rumahta dem alu barang-barang rampasen. 14Ota ras kita, gelah si bagi-bagiken barang si itangko kita e.”
15O anakku ola kam nggit ngikutken kalak si bage. Sirangilah ia. 16La ia erkari-kari adi erbahan jahat. Katawari pe enggo sikap ia lako munuh. 17Perik-perik pe la nggit ndedeh siding adi idahna siding e itogeng. 18Tapi kalak jahat ikurukna kap lubang jadi siding man kesahna janah ia nge gedap ku bas. 19Perampok, kesah kap asamna ngerampuk – enda me si jadi man kalak si nggeluh ndarami untung melket.
Kepentaren erdilo
20Dengkehkenlah! Kepentaren erlebuh i gedang-gedang pasar bage pe i tiga. #Kua 8:1-3 21Megang sorana erlebuh i pintu-pintu gerbang dingen i bas ingan pulung jelma si nterem.
22Nina, “O kalak motu! Asa kai nari atendu dekahna kam tetap motu? Asa kai nari dekahna meriah iakapndu i bas kebodohenndu janah la nggit erlajar? 23Tinggelken adi kam kutembehi, gelah kam kuajarken alu mehuli jenari kubereken pemetehku man bandu. 24Enggo kam kudilo dingen kuendik-endik tapi la ibegikenndu. 25Kerina ajarku la diatendu pe, dingen la atendu ngena adi kam kupandang. 26E maka tupung kam i bas kiniseran, tawa aku. Tupung kam i bas kebiaren kuguro-guroken kam. 27Kutawa-tawai kam tupung kam iderpa galumbang kiniseran si reh desken angin kalinsungsung, seh maka kam suhsah janah mesui atendu. 28I je maka ilebuhndu aku, tapi la kualoi, idaramindu aku tapi la kam jumpa ras aku. 29La pernah turah ukurndu maka perlu kepe pemeteh. La kam nggit ngikutken TUHAN. 30La pernah kam nggit ngaloken ajarku, janah la pernah iperdiatekenndu kune kupandang kam. 31Dage nanamindu me bekas perbahanenndu, janah mesui me atendu. 32Kalak si la erpengalamen, mate erkiteken itulakna kepentaren. 33Tapi kalak si megiken kepentaren, teneng geluhna janah la perlu ia mbiar.”
Currently Selected:
KUAN-KUANEN 1: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.