LUKAS 1
1
Kata Perlebe
1Teopilus si ihamati.
Nterem kalak enggo nuratken alu ratur kerna kejadin-kejadin si terjadi i tengah-tengahta. 2Kalak enda nuratken kai si enggo ituriken man banta, e me si ituriken kalak si ngidah kejadin e tangtangna nari dingen meritakenca. 3Dage, perbahan enggo kupepayo alu megermet kerina kejadin e i bas mula-mulana nari, e maka mehuli kuakap adi kusuratken ka alu ratur man bandu. 4Kubahan e gelah tangkas man bandu, maka tuhu-tuhu nge kerina si enggo iajarken man bandu e.
Berita kerna ketubuhen Johanes Peridiken
5Asum Herodes jadi raja i taneh Judea, lit me i je sekalak imam, gelarna Sakaria; ia i bas terpuk Abia nari. Ndeharana Elisabet gelarna; ia pe kesusuren imam. #1Kro 24:10 6Duana ia nggeluh rikutken ate Dibata ngena janah idalankenna kerina pedah ras Undang-undang Tuhan bagi patutna. 7Anakna la lit, perbahan si Elisabet la ertuah, janah duana ia enggo metua.
8I bas sada wari Sakaria sangana ndahiken dahin imam i lebe-lebe Dibata, rikutken giliren terpukna ndahiken dahin i bas kebaktin pelayanen si tep-tep wari. 9Rikutken kebiasan imam-imam, ibahan me tikam tanduk, e maka Sakaria me si terpilih bengket ku bas Kamar si Badia guna nutung kumenen i je. 10Jelma si nterem ertoto i darat seh dung kumenen e itutung. 11Paksa si e, reh me malekat Tuhan ndahi Sakaria. Malekat e tedis arah kemuhen batar-batar ingan nutung kumenen. 12Ngidah malekat e, sengget dingen mbiar kal Sakaria. 13Tapi nina malekat man bana, “O, Sakaria ola kam mbiar! Pertotonndu enggo ibegiken Dibata. Ndeharandu Elisabet ipupusna me pagi sada anak dilaki. Bahan gelarna Johanes. 14Meriah dingen malem pagi atendu, janah kalak si deban pe meriah ukurna arah ketubuhenna. 15Ia jadi kalak si mbelin i lebe-lebe Tuhan. La banci inemna lau anggur tah pe inemen keras si deban. Mulai tubuhna pe ia enggo dem alu Kesah Si Badia. #Bil 6:3 16Arah ia nterem pagi kalak Israel mulihken erkemalangen man Tuhan Dibatana. 17Leben pagi ia reh asa Tuhan; ia megegeh dingen erkuasa bagi Nabi Elia. Idamekenna pagi bapa ras anak-anakna; ibahanna kalak jahat jadi bujur; alu bage isikapkenna man Tuhan bangsa si metunggung.” #Mal 4:5-6
18Ngaloi Sakaria man malekat ndai, “Kai dage tanda man bangku maka kueteh tuhu si ikatakenndu e? Sabap aku ras ndeharangku enggo metua.”
19Erjabap malekat, “Aku kap Gabriel suruh-suruhen Dibata. IsuruhNa aku ngerana ras kam guna peseh Berita Si Meriah enda man bandu. #Dan 8:16; 9:21 20Tapi la kam tek si kuberitaken enda, si tuhu-tuhu pagi jadi i bas paksana. Erkiteken si e e maka lanai kam banci ngerana, pekak kam seh idahndu jadi si kukataken ndai.”
21Paksa si e, tertima-tima kalak si nterem, janah mamang atena sabap ndekahsa akapna si Sakaria i bas Kamar si Badia. 22Dungna kenca Sakaria ndarat lanai ia banci ngerana man kalak si nterem, e maka iangka kalak si nterem maka Sakaria enggo ngidah sada pengenehenen i bas Kamar si Badia e. Perbahan lanai banci ia ngerana, e maka ibahanna tanda-tanda alu tanna man kalak si nterem.
23Kenca dung masa penugasenna i Rumah Pertoton e, mulih ia ku rumah. 24Jenari mehuli me kula ndeharana Elisabet janah seh lima bulan ia la ndarat i rumah nari. 25Nina Elisabet, “Dungna isampati Tuhan ka nge aku, janah ibahanNa aku lanai medungu i lebe-lebe jelma si nterem.”
Berita ketubuhen Jesus
26Kenca enggo enem bulan Elisabet natang tuah, Dibata nuruh malekat Gabriel ku kuta Nasaret i daerah Galilea. 27Gabriel isuruh ndahi sekalak singuda-nguda tergelar si Maria. Singuda-nguda e enggo ertunangen ras sekalak anak perana tergelar si Jusup, kesusuren Raja Daud. #Mat 1:18 28Idahi malekat ndai Maria nina, “Mejuah-juah! Tuhan kap ras kam janah enggo iberekenNa pasu-pasuNa si mbelin man bandu!”
29Sengget kal Maria megi kata malekat e, jenari nungkun i bas ukurna ntah kai erti kata e. 30E maka nina malekat ndai man bana, “Ola kam mbiar, Maria, sabap enggo ibereken Dibata perkuah ateNa man bandu. 31Mehuli pagi kulandu janah ipupusndu sada anak dilaki, bahanlah gelarna Jesus. #Mat 1:21 32IA pagi jadi kalak si mbelin dingen igelari pe Anak Dibata si Meganjangna kal. Tuhan Dibata pagi njadiken IA jadi Raja bagi ninina Daud, #2Sam 7:12,13,16; Jes 9:7 33janah IA me pagi raja man kesusuren Jakup seh rasa lalap; KinirajanNa la erkeri-kerin.”
34Ngaloi Maria man malekat ndai, “Kuga banci jadi e man bangku, sabap aku singuda-nguda denga?”
35Erjabap malekat nina, “Kesah Si Badia pagi nusur ku babondu janah kuasa Dibata ringan i bas kam. Perbahan si e me, maka anak si ipupusndu e pagi Badia janah igelari Anak Dibata. 36Nehenlah kade-kadendu Elisabet. Ikataken kalak maka ia la banci mupus, tapi enggo peenem bulanken mehuli kulana, aminna gia ia enggo metua. 37Sabap la lit si metahat i bas Dibata.” #Kej 18:14
38Ngaloi Maria, “Kuendesken diringku man Tuhan. Janah jadilah i bas aku bagi si enggo ikatakenndu e!” Kenca bage itadingken malekat ndai ia.
Maria ras Elisabet
39Minter kenca si e, lawes Maria ku sada kuta i Judea i daerah si erdeleng-deleng. 40I je lawes ia ku rumah Sakaria. Janah sanga ia bengket ku rumah e ikatakenna man Elisabet, “Mejuah-juah.” 41Asum ibegi Elisabet sora Maria, minter kemuit anak si lit i bas bertinna. Elisabet dem alu Kesah Si Badia. 42E maka alu sora megang nina, “Kerina diberu, Kam me si mbelinna daten pasu-pasu! Ipasu-pasu gelah anak si ipupusndu! 43Ise kin aku, maka nande Tuhan reh ndahi aku? 44Sabap kenca kubegi sorandu, minter kemuit anak si lit i bas bertinku alu meriah ukur. 45Malem tuhu-tuhu atendu sabap tek kam maka kai si iberitaken Tuhan man bandu tuhu-tuhu jadi.”
Ende-enden pujin Maria
46Nina Maria,
“Tendingku muji Tuhan. #1Sam 2:1-10
47Meriah ukurku perbahan Dibata Penebusku.
48Sabap enggo ingetNa aku, kawanNa si meteruk!
Genduari nari kerina kalak ngataken maka aku daten tuah. #1Sam 1:11
49Sabap Dibata si Mada Kuasa ncidahken perbahanenNa man bangku.
Badia me gelarNa.
50IcidahkenNa perkuah ateNa man kalak si erkemalangen man baNa.
51IcidahkenNa KuasaNa alu perbahanen tanNa,
janah iambatiNa gelah ola seh sura-sura kalak si meganjang ukurna.
52IpeterukNa raja-raja si erkuasa,
janah ipeganjangkenNa kalak si meteruk. #Jop 5:11; 12:19
53Kalak si melihe ibesuriNa alu kerina si mehuli,
janah kalak bayak isuruhNa lawes ngambe-ngambe.
54IngetNa padan si enggo ibahanNa ras nini-nininta,
janah reh IA nampati kalak Israel kawanNa.
55La IA lupa ncidahken perkuah ateNa man Abraham,
bage pe man kerina kesusurenna seh rasa lalap.” #Kej 17:7
56Kira-kira telu bulan dekahna Maria ringan i rumah Elisabet; e maka mulih ia ku rumahna.
Ketubuhen Johanes Peridiken
57Enggo seh paksana Elisabet mupus, e maka ipupusna me sada anak dilaki. 58Kenca ibegi anak kutana ras kade-kadena maka enggo icidahken Tuhan perkuah ateNa si mbelin e man bana, e maka kerina ia ermeriah ukur ras Elisabet.
59Kenca sada minggu umur anak e, reh ka ia kerina nunatken anak ndai. Ate kalak ndai Sakaria ibahan gelarna, seri ras gelar bapana. #Im 12:3 60Tapi nina nandena, “Ola! Gelarna e me Johanes.” 61Nina kalak ndai man Elisabet, “Tapi la kap lit gelar e i bas jabunta.” 62E maka ibahan kalak ndai tanda man Sakaria guna nungkun ntah ise bahan gelar anak e.
63Ipindo Sakaria me sada batu tulis, jenari isuratkenna, “Gelarna e me Johanes.” Mamang ate kalak ndai kerina. 64Paksa si e pe minter Sakaria mulihi ngerana, jenari ipujina Dibata. 65Kerina kalak si deherken rumahna mbiar, janah berita kerna kejadin e mbar ku belang-belang daerah deleng-deleng Judea. 66Kerina kalak si megi berita e ngukuri kejadin e, janah nungkun, “Jadi kai nge ndia pagi anak e?” Enggo tangkas maka kuasa Tuhan ras ia kap.
Nubuat Sakaria
67Sakaria, bapa Johanes dem alu Kesah Si Badia. Iturikenna kata Dibata nina,
68“Marilah sipuji Tuhan, Dibata kalak Israel
IA reh ndahi bangsana janah mulahisa.
69IberekenNa man banta Penebus si erkuasa
e me kesusuren kawanNa si Daud.
70Bagi enggo ikatakenNa nai-nai nari
arah nabi-nabiNa si Badia,
71erpadan IA mulahi kita i bas musuh-musuhta nari,
bage pe i bas kuasa kalak si er elem-elem man banta.
72IkatakenNa maka icidahkenNa nge perkuah ateNa man nini-nininta,
janah ingetNa padanNa si Badia.
73-74Enda me padanNa ras nininta Abraham,
asum ersumpah IA maka ipulahiNa kita i bas musuh-musuhta nari,
gelah lanai kita mbiar ersembah man baNa.
75IbahanNa kita Badia dingen bujur ilebe-lebeNa,
i bas gedang-gedang geluhta.
76O, anakku, kam pagi igelari Nabi Dibata Si Meganjangna kal.
Kam reh leben asa Tuhan,
guna nikapken dalan man baNa; #Mal 3:1
77guna mpebetehken man bangsaNa,
maka bangsa-bangsa e pagi itebusi alu nasapken dosa-dosana.
78Dibatanta perkeleng dingen dem perkuah ate.
IsehkenNa pagi man banta sinalsal Keselamaten.
79Janah isalsalina pe ku kerina kalak si ringan i bas kegelapen e me awih kematen,
IA mabai kita erdalan ku bas kegeluhen si dame.” #Jes 9:2
80Anak ndai reh belinna dingen ertambahna ukurna. Ia ringan i taneh si mesawang seh paksa maka terang-terangen icidahkenna bana man kalak Israel.
Currently Selected:
LUKAS 1: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.