HAGAI 1
1
1I bas tahun peduaken kenca Darius jadi raja Persia, i bas wari pemena bulan peempatken, ngerana TUHAN arah Nabi Hagai man gubernur Juda Serubabel anak Sealtiel, ras man Imam si Mbelin, Josua anak Josadak. #Esa 4:24–5:2; 6:14
2Nina TUHAN si Mada Kuasa kempak Hagai, “Bangsa enda ngatakenca maka genduari langa reh paksana majekken Rumah Pertoton e mulihi.” 3Kenca bage ibereken TUHAN berita enda man bangsa Israel arah Nabi Hagai nina, 4“O bangsangKu, uga dage maka genduari enggo seh paksana kam ringan i bas rumah si mejile, sedangken RumahKu e ipelepasndu runtuh denga? 5Ma iukurindu kai-kai si jadi man bandu? 6Mbue kam ngamburken benih, tapi sitik ngenca iperanindu. Tuhu man nge kam, tapi la besur. Lit anggur man inemenndu, tapi la bias seh puas. Tuhu ruis nge kam, tapi bergehen denga. Kalak upahen ibunikenna upahna i bas perbeliten pultak-pultak. 7Ma enggo iangkandu ngkai maka jadi si enda man bandu? 8Dage genduari to nangkih ku deleng-deleng, legilah kayu, jenari pajekken mulihi Rumah Pertoton e; kenca bage maka meriah Kuakap janah Aku isembah bagi arusna.
9Iarapkenndu mbuah pagendu, tapi sitik ngenca ulihna. Janah kenca ibabandu peranindu e ku rumah, Kusempulken pe. Engkai maka Kulakoken si e? Erkite-kiteken RumahKu e ipediatndu i je runtuh, sedangken sekalak-sekalak kam sibuk pekena-kena rumahna jine. 10Em sabapna maka wari la udan, janah la lit kai pe si banci turah. 11Kelegon Kubahan negeri enda, deleng-deleng, juma-juma, peken anggur, peken saitun, bage pe kerina si turah i taneh, manusia, rubia-rubia ras ulih kelatihenndu.”
Perentah TUHAN ipatuhi bangsa e
12Kenca bage, Serubabel ras Josua Imam si Mbelin, ras kerina kalak si enggo mulih i pembuangen nari, ngelakoken kai si isuruh TUHAN Dibatana man bana. Mbiar ia man TUHAN dingen iikutkenna kata Nabi Hagai, suruh-suruhen TUHAN e.
13Kenca bage ipeseh Hagai berita i bas TUHAN nari man bangsa e bagenda, “Aku erpadan tetap nemani kam.” 14Ipekeke TUHAN ukur kalak ndai kerina lako erdahin mahan Rumah Pertoton e subuk Serubabel gubernur Juda, bage pe Josua, Imam si Mbelin, ras kerina bangsa e si enggo mulih i pembuangen nari. Ibenakenna erdahin mahan Rumah Pertoton TUHAN si Mada Kuasa, Dibatana, 15i bas wari dua puluh empat, bulan si peenemken, i bas tahun si peduaken kenca Darius enggo jadi raja.
Currently Selected:
HAGAI 1: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.