PENGERANA 1
1
Sia-sia nggeluh enda
1Enda me kata Pengerana anak Daud raja Jerusalem. 2Nina, “Oh kerina sia-sia, kai pe sia-sia! Enggeluh pe sia-sia, kerina sia-sia. 3Gedang-gedang geluhta kita erdahin, curcur panasta. Tapi kai kin gunana man banta si e kerina? 4Lesap sada kesusuren reh ka kesusuren si deban, tapi doni enda bage nge lalap. 5Pultak kang matawari, jenari sundut ka. Latih iakapna mulihken ku bas inganna ndube, jenari pultak ka ia. 6Angin rembus ku Selatan, jenari rembus ka ku Utara, erpusing-pusing dungna mulihken ka. 7Kerina lau mbelin ku lawit perlawesna, tapi lalap nge lawit labo dem. Dungna mulihken ka ku bas uluna, jenari maler ka. 8Kai pe la mereken kepuasen, kerina erbahan leja. Mata la puas ngenen, pinggel la puas megi-megi. 9Kai si enggo pernah jadi, denggo jadi ka. Kai si enggo pernah ilakoken, denggo iulihi ka. Kai pe labo lit mbaru i bas doni enda. 10Lit kalak ngatakenca nina, ‘Nehenlah, enda mbaru!’ Tapi enggo me lit ope denga ia tubuh pe. 11Kai si enggo lepas, lanai iinget kalak. Bage pe kai si jadi genduari ras pagi, lanai bo iinget kalak i bas paksa si reh.”
Pengalamen perpilsapat enda
12Aku, Pengerana si enggo jadi raja Israel ringan i Jerusalem. 13Enggo kutetapken ateku gelah kupepayo dingen kupelajari kerina si jadi i bas doni enda alu megermet.
Kelatihen si ibereken Dibata man manusia la kap mereken keriahen. 14Kai si jadi i bas doni enda enggo kuidah kerina. Teklah maka si e kerina bali ras si nangkap angin saja ngenca; kerina sia-sia. 15Si enggo mbengkuk lanai terpepinter, kai si la lit la terbeligai.
16Rukur aku, “Aku kalak pentar, ndauh pentaren asangken kerina kalak si enggo pernah jadi raja i Jerusalem ope denga aku. Tuhu kuerti kal kai kepentaren dingen kai pemeteh.” #1Raj 4:29-31 17E maka kupelajari ateku kai lainna pemeteh ras kebodohen, bage pe kai lainna kepentaren ras ngulah. Tapi teridah maka kerina e pe bali kap ras si nangkap angin. 18Sabap reh pentarna kita, reh lalana aru ateta. Reh lalana pemetehta, reh suina ateta.
Currently Selected:
PENGERANA 1: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.