YAWSHU 18
18
Naw Ngam ai Lamu Ga Hpe Karan Ai
1Shanhte gaw mungdan hpe gasat dang la ngut ai hpang, Israela shawa hpung ting Shilo mare e zup hpawng nna, dai Madu a hpung shingkang shanu nga ai Sum hpe sharawt ma ai. 2Lamu ga sali gambum garai n masat ya hkrum ai Israela amyu masha ni hta amyu bawsang sanit naw nga nga ma ai. 3Dai rai nna Yawshu gaw Israela amyu masha ni hpe, “Dai Madu nanhte a kaji kawa ni a Karai Kasang nanhte hpe jaw ya manit dai lamu ga hpe n shang madu la ai galoi du hkra ala nga na ngu myit ni? 4Amyu bawsang shagu na marai masum hpra hpra san da ya mi. Shanhte madu la ang ai lamu ga sali hpe shadawn matsing la lu na matu ngai shanhte hpe mungdan ting de shangun dat na mawe ai. Dai hpang shanhte ngai hpang maga de nhtang wa lu na rai ma ai. 5Dai lamu ga hpe daw sanit karan na rai ma ai: Yuda gaw dingda maga de na lamu ga hta nga na rai wu ai. Yosep gaw dingdung maga de na lamu ga hta nga na rai wu ai. 6Dai mungdan hpe gambum sanit karan nna dai ka da ai laika ngai kaw la sa na rai myit dai. Shaloi nanhte a matu dai Madu anhte a Karai Kasang hte bawng jahkrup lu n-ga, hpaida da na we ai. 7Rai ti mung Lewi masha ni chyawm gaw lamu ga gambum nanhte zawn lu la na ma ai n rai; hpa majaw nga yang, shanhte a gambum gaw dai Madu a hkinjawng ni tai nna daw jau amu gun hpai na rai ma ai. Dai Madu a shangun kasa Mawshe jaw ya manu ai hte maren, Yawdan hka a sinpraw hkran na lamu ga hpe Gad, Rubin hte sinpraw maga de nga ai Manashe amyu bawsang ni lu la nga masai,” ngu nna tsun wu ai.
8Yawshu gaw shanhte hpe ndai ga matsun ni jaw wu ai: “Mungdan ting de jawt hkawm nna lamu ga sumla ka lajang mu, dai hpang ngai hpang de bai wa mi. Shing rai ndai Shilo mare e hpaida da let nanhte a matu dai Madu hte ngai bawng jahkrup na we ai.” Shing nga ngut jang, dai masha ni mung lamu ga sumla hpe ka lajang na nga, pru hkawm mat wa ma ai. 9Dai rai nna dai masha ni mung mungdan ting de jawt hkawm nhtawm mare jahpan galaw la nna, daw sanit karan nhtawm laika hta ka lajang la let Shilo e dap jung nna nga nga ai Yawshu hpang de nhtang wa ma ai. 10Yawshu gaw shanhte a matu dai Madu hte bawng ban let hpaida da nna ngam nga ai Israela amyu bawsang ni hpe amyu langai hte langai a matu lamu ga masat ya wu ai.
Benyamin Hpe Masat Ya Ai Lamu Ga
11Benyamin amyu bawsang hta na lakung lama ni madu la na lamu ga hpe shawng masat ya nga ai. Shanhte a lamu ga gaw Yuda hte Yosep amyu bawsang ni a lapran e rai nga ai. 12Dingdung maga de na shanhte a lamu ga jarit gaw Yawdan hka kaw nna Yerihko lahta hku hprang, sinna maga de na bum ga de hkroi, Betawen mali e byawn rai nga ai. 13Dai hpang, jarit dai gaw (Behtela mying ai) Luza mare a dingda nhkrem hku hprang, lawu Bet Horon a dingda maga de na bum ntsa na Atarot Ada shara e byawn rai nga ai. 14Dai kaw nna lamu ga jarit gaw sinna maga de na kayin wa nhtawm dingda de shang wa nna Yuda amyu bawsang ni madu da ai Kiriat-Bala (shing n rai Kiriat Yarim) e byawn rai nga ai. Dai gaw sinna maga de na lamu ga jarit rai nga ai. 15Dingda maga de na lamu ga jarit gaw Kiriat Yarim nten kaw nna Nephto hka hpawk pru ai shara de byawn rai nga ai. 16Dai hpang, Rehpim Kadit a dingdung jahtum e nga ai Hinom Kadit hpe praw rai mu mada ai bum lagaw hku garet yu mat wa nna dingda maga Hinom Kadit hku lai, Enrogela de sa wa ai Yebusi masha ni nga ai bum marung a dingda maga de byawn rai nga ai. 17Dai kaw na dingdung maga Enshemesha de kayin lung wa nhtawm Adumim uhkan hte tawtap rai nga ai Gelilot e byawn, dai kaw na (Rubin a shadang sha Bohan) Bohan a nlung shadaw jung ai shara de yu wa nna, 18Yawdan Kadit hpe praw rai mu mada ai dingdung maga na bum marung hku garet lai mat wa nhtawm kadit de shang wa nna, 19Bet Hogla bum marung dingdung hku lai, Jum Nawng a dingdung shingjut na Yawdan hka htumpa e htuk rai nga ai. Dai gaw dingda maga de na lamu ga jarit rai nga ai. 20Yawdan hka gaw sinpraw maga de na jarit rai nga ai. Ndai gaw Benyamin amyu bawsang hta na lakung lama ni lu la ai lamu ga a jarit ni rai nga ai.
21Benyamin amyu bawsang hta na lakung lama ni madu da ai mare ni gaw Yerihko, Bet Hogla, Emek Kezi, 22Bet Araba, Zemarim, Behtela, 23Awim, Para, Ohpra, 24Hkehparamoni, Ohpuni hte Geba ni rai nga ai. Kahtawng hte hpawn mare shi lahkawng rai nga ai. 25Bai Gibeon, Rama, Berot, 26Mizpa, Hkehpira, Moza, 27Rekem, Irapela, Tarala, 28Zela, Elep, Yebusi mare (shing n rai Yerusalem), Gibat, hte Kiriat Yarim ni rai nga ai. Mare shi lahkawng hte de a grup yin na kahtawng ni lawm nga ai. Dai gaw Benyamin amyu bawsang hta na lakung lama ni lu la ai lamu ga sali rai nga ai.
Currently Selected:
YAWSHU 18: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.