YAWSHU 10
10
Amori Masha Ni Hkrat Sum Ai
1Yawshu gaw Yerihko mare hte de a hkawhkam hpe shamyit kau wu ai zawn Ai mare hte de a hkawhkam hpe mung tsep kawp sat shamyit nna gasat dang kau nu ai hpe mung, Gibeon masha ni hte Israela amyu masha ni ngwi pyaw sim sa lam galaw la nna, shanhte hte nga nga ma ai lam hpe mung Yerusalem #10:1: Yerusalem: Dai aten hta dai gaw Yebusi mare rai nga ai. Hkawhkam Adonizedek na wu ai. 2Gibeon gaw hkawhkam dung ai mare zawn kaba nga ai hte Ai mare hta grau kaba nga ai rai nna dai mare na lasha ni kung ai share shagan masha ni rai nga ma ai majaw, ndai aten hta Yerusalem mare masha ni ja ja hkrit kajawng nga ma ai. 3Dai rai nna, Yerusalem Hkawhkam Adonizedek gaw Hebron Hkawhkam Horam, Yamut Hkawhkam Piram, Lahkisha Hkawhkam Yahpia, Eglon Hkawhkam Debira ni hpang de shiga shana dat wu ai. 4“Gibeon mare masha ni gaw Yawshu hte Israela amyu masha ni hte ngwi pyaw sim sa lam galaw da manu ai majaw Gibeon hpe gasat na matu ngai hpe sa karum la mi.” 5Dai Amori hkawhkam manga hte ngu na Yerusalem, Hebron, Yamut, Lahkisha hte Eglon hkawhkam ni n-gun galung la nna Gibeon hpe jawm wang nna htim gasat ma ai.
6Gibeon masha ni mung Gilgala e dap jung nga ai Yawshu hpang de masha shangun dat wu ai: “Anhte hpe hkum kau da mi! Anhte hpe karum la na ya jang sa wa marit! Anhte hpe hkye hkrang la mi! Bum ga na Amori hkawhkam ni yawng n-gun galung la let anhte hpe gasat nga masai.
7Dai rai nna, Yawshu hte shi a hpyen luksuk ting, magrau grang ai hpyen hpung lawm ai ni hpe woi let Gilgala kaw nna pru sa wa ma ai. 8Dai Madu gaw Yawshu hpe, “Shanhte hpe hkum hkrit et; ngai nang hpe awng padang jaw ya sade ai. Shanhte hta na kadai mung nang hpe hkap daw lu na ma ai n rai,” ngu nna tsun wu ai. 9Yawshu hte shi a hpyen luksuk ni gaw Gilgala kaw nna Gibeon du hkra shana tup lung wa nhtawm Amori masha ni hpe akajawng sha wa htim gasat dat ma ai. 10Dai Madu mung Amori masha ni hpe dai Israela hpyen luksuk ni a man e kajawng kaja byin shangun nhtawm Israela amyu masha ni mung shanhte hpe Gibeon e sat kau ma ai; shanhte gaw Bet Horon de lung wa ai uhkan hku hkan nna Azeka hte Makeda du hkra shachyut gasat kau ma ai. 11Israela hpyen luksuk ni a lata kaw na uhkan hku Amori masha ni ru htaw yu wa nga ma yang, dai Madu gaw lamu de na sin tawng kaba jahkrat bun ai rai nna Azeka mare lam dingyang shanhte adup hkrum ma ai. Israela amyu masha ni sat kau ai hta sin tawng hte adup sat hkrum ai mahtang grau law nga ai.
12Dai Madu gaw Amori hpyen ni hpe dang kau ai awng padang Israela amyu masha ni hpe jaw ya ai shani, Yawshu gaw dai Madu hpe ga shaga wu ai. Shi gaw Israela amyu masha ni a man e ning ngu tsun wu ai:
“Jan e, Gibeon a ntsa e naw la u;
Shata e, Aiyalon Kadit e naw hkring u.”
13Dai amyu gaw gumlau hpyen ni hpe gasat dang kau lu ai aten du hkra, ajan gaw ala nga nna, shata mung hkring nga ai. Ndai a lam Yashara a Laika hta ka da nga ai. Ajan gaw lamu ka-ang e hkring nan nga nna shani tup jan n shang ai nga nga ai. #2Sa 1:18. 14Dai Madu gaw masha a ga madat ya nna, dai zawn re ai nhtoi lani mi mung, shawng de, hpang de n byin yu nga ai. Dai Madu chyawm gaw Israela ni a hpang maga de gasat ya nga ai.
15Dai hpang, Yawshu hte shi hpyen luksuk ni Gilgala dap de bai nhtang mat wa ma ai.
Yawshu Gaw Amori Hkawhkam Manga Hpe Hkan Gasat Ai
16Dai Amori hkawhkam manga hte gaw hprawng mat wa nhtawm Makeda ginlawng hku e makoi rawng nga ma ai. 17Shanhte makoi rawng nga ma ai hpe marai langai ngai e sa mu nna Yawshu hpe wa tsun dan wu ai. 18Yawshu gaw, “Ginlawng hku mahka e nlung kaba ni hte galau pat nna sin masha tawn da mu; rai ti mung nanhte nan dai hkan e hkum nga nga myit; 19rai ti mung gumlau hpyen ni hpe shachyut nna shingdu hku shanhte hpe htim gasat mu; shanhte hpe shanhte a mare ni de hkum shang shangun myit! Dai Madu na a Karai Kasang shanhte hpe dang kau lu ai awng padang nang hpe jaw ya nit dai. 20Yawshu hte Israela amyu masha ni chyawm gaw hpyen ni hpe htau sat kau mu ti mung, nkau mi mahtang mare bunghku kata de hprawng shingbyi shara mu tam ai hte sat kau n hkrum nga ma ai. 21Shaloi Yawshu a masha ni yawng mung shi nga ai Makeda dap de shim lum ai hte nhtang wa ma ai.
Dai mung hta e Israela amyu masha ni hpe grang dakat gwi ai masha langai mi mung n nga nga ai.
22Dai hpang Yawshu gaw, “Dai ginlawng hku chyinghka hpaw nna dai hkawhkam manga hpe ngai hpang de woi shapraw wa mi,” ngu nna tsun wu ai. 23Dai rai nna, ginlawng hku chyinghka hpaw nhtawm Yerusalem, Hebron, Yamut, Lahkisha hte Eglon hkawhkam ni hpe shapraw la nna Yawshu hpang de woi wa ya ma ai. 24Dai hpang Yawshu gaw Israela amyu masha ni yawng hpe shaga la nhtawm shi hte rau hpyen gasat ai du salang ni hpe dai hkawhkam ni a du kabye ya na hkang dat wu ai hte maren, shanhte galaw ma ai. 25Dai hpang Yawshu gaw shi a du salang ni hpe, “Hkum hkrit nga myit, myit hkum daw nga myit. Dai Madu gaw nanhte a gumlau hpyen ni yawng hpe ning rai galaw na rai nga ai majaw myit jahkut daw dan nna kam hpa nga mu,” ngu nna tsun wu ai. 26Dai hpang, Yawshu gaw hkawhkam ni hpe sat kau nhtawm hpun manga hta noi da wu ai. Shanhte a si mang ni hpe shana de du hkra noi da wu ai. 27Jan du jang she, Yawshu hkang dat ai hte maren hpun kaw na jahkrat la nhtawm shanhte makoi nga ai ginlawng hku hta nan kabai bang kau ai hte ginlawng hku hpe nlung kaba hte pat da ma ai. Dai gaw dai yang e dai ni du hkra naw nga nga ai.
Amori Masha Ni A Lamu Ga Hpe Yawshu Naw Gasat La Ai
28Dai shani jang, Yawshu gaw Makeda mare hte de a hkawhkam hpe gasat la wu ai rai nna mare e nga ai masha shagu hte hpe shi sat kau wu ai majaw, hkrung nga ai masha langai mi mung n ngam nga ai. Shi gaw Yerihko hkawhkam wa hpe shagrawt kau wu ai zawn Makeda hkawhkam wa hpe mung shagrawt kau wu ai.
29Shaloi Yawshu hte shi a luksuk ni Makeda mare kaw na Libna mare de sa wa nhtawm dai mare hpe gasat ma ai. 30Dai Madu gaw mare dai hte hkawhkam wa hpe Israela masha ni a lata hta awng padang jaw ya mu ai rai nna dai mare na masha langai mi hpe mung n ngam da ai sha sat kau mu ai. Yerihko hkawhkam wa hpe shagrawt kau ai zawn dai hkawhkam wa hpe mung shagrawt kau mu ai.
31Dai hpang, Yawshu hte shi a luksuk ni gaw Libna mare kaw na Lahkisha mare de matut wang da nhtawm htim gasat ma ai. 32Dai Madu gaw Lahkisha mare hpe mung, Israela amyu masha ni a lata hta awng padang jaw ya wu ai rai nna hpang shani e dang la kau ma ai. Libna mare hpe hpya kau ma ai zawn dai mare na masha langai mi pyi n ngam mat hkra sat shamyit kau ma ai. 33Gezera Hkawhkam Horam gaw Lahkisha mare hpe karum na nga lung wa ai hpe Yawshu gaw dai hkawhkam hte shi a masha nlang hte hpe mung langai mi pyi n ngam mat hkra hkap sat kau wu ai.
34Dai hpang, Yawshu hte shi a luksuk ni Lahkisha mare kaw na Eglon mare de matut sa wang nhtawm dai mare hpe gasat kau ma ai. 35Dai shani jang, dai mare hpe shanhte dang la lu ma ai rai nna, Lahkisha mare hpe shanhte hpya kau mu ai zawn dai mare na masha shagu hte hpe sat kau ma ai.
36Dai hpang, Yawshu hte shi a luksuk ni Eglon mare kaw na bum lam hku lung wa nhtawm Hebron mare hpe gasat ma ai. 37Dai mare hte de a hkawhkam hpe mung, de a grup yin na mare ni hpe mung, dai hta nga ai masha nlang hte hpe mung sat kau ma ai. Eglon hpe hpya kau ai zawn dai mare hte dai hta nga ai ni nlang hte hpe langai mi mung n ngam hkra atsai awai shamyit kau ma ai.
38Dai hpang, Yawshu hte shi a luksuk ni gaw Debira mare de nhtang wa nna gasat ma ai. 39Dai mare hte de a hkawhkam hpe mung, de a grup yin na mare ni yawng hpe mung gasat la wu ai. Shanhte gaw dai mare hta nga ai masha shagu hte hpe sat kau ma ai. Yawshu gaw Hebron, Libna hte de a hkawhkam hpe shagrawt kau wu ai zawn Debira hte de a hkawhkam hpe mung shagrawt kau wu ai.
40Yawshu gaw mungdan ting ngu na bum ga na hkawhkam ni, sinpraw maga na kadit ni, sinna maga de na layang ni, dingdung maga de na hkun hkraw ai shara mahkra hpe gasat la wu ai. Shi gaw masha kadai hpe mung n ngam da ai sha sat kau wu ai; Ndai gaw dai Madu Israela a Karai Kasang hkang da ai hte maren galaw ai amu rai nga ai. 41Yawshu a majan ginra ngu na Kadesha Barnea kaw na dingda maga hkin-gau makau na Gaza du hkra, Goshen mung ting hte dingdung maga Gibeon du hkra gasat la lu wu ai. 42Dai Madu Israela a Karai Kasang gaw Israela a matu gasat ya nga ai majaw, Yawshu gaw dai hkawhkam ni yawng hte shanhte a lamu ga ni hpe kalang dat gasat la lu wu ai. 43Dai hpang, Yawshu hte shi a luksuk ni Gilgala dap de bai nhtang mat wa ma ai.
Currently Selected:
YAWSHU 10: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.