HEBRE 1
1
Shi A Kasha Kaw Nna Htawn Tsun Ai Karai Kasang A Mungga
1Moi prat hta Karai Kasang gaw anhte a ji wa ni hpe ga shaga ai lam law law lang, lai ladat amyu myu hku nna myihtoi ni a n-gup hte htawn tsun lai wa sai. 2Rai ti mung ndai hpang jahtum na nhtoi ladaw ni hta chyawm gaw shi a Kasha a n-gup hte anhte hpe shi a mungga jaw da mani ai. Dai Kasha wa hte nan nga yawng nga pra hpe hpan tawn da nu ai hte jahtum e mungkan yawng mayawng hpe up madu ai wa tai wa na shi hpe lata san da nu ai.#Trj 4:30; Shk 2:8; Yhn 1:17; Rom 8:17; Ehp 1:10. 3Shi gaw Karai Kasang a hpung shingkang ningja shapraw nna, Karai Kasang shi nan a gawng shingyan hkrang sumla hpe dagraw ai hte mungkan jan shata shagan nga yawng danghta hpe shi a hpung shingkang rawng ai mungga atsam hte bau sin da nga ai. Shi gaw shinggyim masha ni a yubak mara ni hpe raw dat jasan jaseng ai lam galaw ngut ai hpang, sumsing lamu e daru magam n-gun atsam rawng ai Karai Kasang a hkra maga de dung nga ai.#Shk 110:1; Yhn 1:14; 2Ko 4:4; Kol 1:15-17; Shr 4:11.
Kasha A Hkik Hkam Galu Kaba Ai Lam
4Shi hpe Karai Kasang jaw ya ai mying ningsang gaw lamu kasa ni a mying hta grau kaba nga ai rai nna Kasha wa hpe lamu kasa ni hta grau reng ai wa shatai nu ai. 5Hpa majaw nga yang, Karai Kasang gaw,
“Nang gaw nye a Kasha rai nga ndai,
dai ni ngai gaw na a Kawa tai wa ni ai,” nga nna mung,
“Ngai gaw shi a Kawa tai nna,
shi gaw Ngai Sha rai nga na ra ai,” nga nna mung, gara lamu kasa hpe mung Karai Kasang galoi n tsun yu ga ai. #Shk 2:7; 89:26-27; Kas 13:33. 6Rai ti mung Karai Kasang gaw shi a Kasha alat hpe mungkan ga de shangun dat na hkyen ai shaloi, shi gaw,
“Karai Kasang a lamu kasa ni yawng, shi hpe nawku daw jau lu na,” nga nna hkang dat sai.#Rom 8:29; Kol 1:18; 1Pe 3:22; Shr 1:5.
7Karai Kasang gaw lamu kasa ni a lam tsun ai shaloi,
“Karai Kasang gaw shi a lamu kasa ni hpe nbung shatai nna,
shi a ali ama ni hpe grung ai wan shinglet shatai wu ai,” nga ai.#Shk 104:4.
8Bai Kasha wa a lam tsun ai shaloi chyawm gaw, Karai Kasang gaw,
“Karai Wa e, na mungdan htani htana anga nga na ra ai!
Nang gaw na amyu masha ni hpe tara rap ra ai hku up hkang ndai.#Shk 45:6-7.
9Nang gaw ding hpring ai hpe tsaw ra nna, shut ai lam hpe n dawng nga ndai.
Dai majaw na a Karai Kasang ngu ai, Karai Kasang gaw, nang hpe lata la nna,
na a manang hpe jaw ai hta grau kaba ai
kabu gara ngu ai namman jaw ya nna shagrau sha-a nit dai,” nga ai.#Esa 61:1; Kas 4:27; 10:38.
10Bai shi gaw,
“Madu e, shawng ningpawt e, ginding aga hpe nang gaw da nna,
Na a lata hte nan sumsing lamu hpe hpan da nit dai;#Shk 102:25.
11Dai ni gaw mat mat na mara ai, rai ti mung nang gaw agrin nga na rin dai;
Shanhte yawng gaw hpun nba zawn dingsa mat na mara ai.
12Nang gaw ntsa palawng hpe zawn dai arai ni hpe katsu kau na ra ai rai nna,
hpun nba hpe zawn shanhte galai kau ai hkrum na mara ai.
Rai ti mung nang chyawm gaw dinggrin anga nga nna,
na a asak mung htum ngu ai nga na n rai.”
13Karai Kasang gaw,
“Na a gumlau ni hpe, na a lagaw na kabye lahkum ngai shatai ai du hkra,
nye a hkra maga de naw adung nga u,”
nga nna gara lamu kasa hpe mung galoi n tsun yu ai.#Shk 110:1; Mat 22:44; Mrk 12:36; Luk 20:42.
14Dai rai yang gaw, lamu kasa ni gaw kadai ni rai nga ma ta? Shanhte gaw hkye hkrang la ai sali wunli hkam la na ni hpe karum na matu Karai Kasang e shangun dat hkrum ai hte Karai Kasang hpe daw jau nga ai wenyi ni rai ma ai.#Mat 18:10; Kas 12:7; Rom 8:17; Yak 2:5; 1Pe 3:7.
Currently Selected:
HEBRE 1: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.