Rev 1
1
Introdiksion
1Revelasion#1:1 An Grek, mo ‘Apokalips’ vedir ‘Revelasion’, ki enn aksion pou devwal bann realite ki ankor kasiet. Zezi Kris, ki Bondie finn done pou montre so bann serviter seki pou arive biento. Pou fer konn so mesaz, li finn avoy so anz kot so serviter Zan. 2Zan pou temwagn lor tou seki li finn trouve konsernan parol Bondie ek temwagnaz Zezi Kris. 3Bienere dimoun ki lir, e bienere bann ki tann parol profesi, e ki gard seki finn ekrir isi; parski letan ki finn fixe pou sa bann kitsoz la pre pou arive.
4Ala mesaz ki Zan pe avoy set legliz dan provins Lazi:
Lagras ek lape Bondie ki la, ki ti existe e ki pou vini; mesaz sorti osi kot sa set lespri devan tronn, 5e kot Zezi Kris, temwin fidel, premie-ne parmi bann mor e dirizan bann lerwa lor later.
Zezi Kris kontan nou, par so lamor li finn tir nou dan nou pese. 6Li finn fer nou vinn enn rwayom pret pou servi Bondie Papa. Laglwar ek pwisans pou Zezi Kris pou touzour. Amen.
7Gete, li pe vini dan niaz! Tou dimoun pou trouv li, mem bann ki ti transpers li. Tou bann pep lor later pou rakonte, wi koumsamem sa pou ete. Amen. 8“Mo mem Alfa ek Omega,”#1:8 Alfa ek Omega: premie ek dernie let dan alfabe grek. Komansman ek lafin. Get 1:17. deklar Lesegner Bondie ki existe, ki ti existe e ki pou vini.
Zan gagn enn vizion
9Mwa, zot frer Zan, ansam ar Zezi mo partaz zot soufrans e rwayote, pasians ek landirans. Mo retrouv mwa lor lil Patmos akoz parol Bondie ek temwagnaz Zezi. 10Zour Lesegner, Lespri Sin finn sezi mwa e mo finn tann enn lavwa for deryer mwa ki rezone kouma enn tronpet; 11Li ti pe dir, “Ekrir dan enn liv seki to pe trouve e avoy liv la kot sa set legliz dan Efez, Smirn, Pergam, Tiatir, Sard, Filadelfi ek Laodise.” 12Mo retourne pou gete kisannla pe koz ar mwa. Lerla mo trouv set sandelie dore. 13Omilie zot ti ena enn kreatir resanble enn zom ki ti finn met enn long rob ziska so lipie ek enn sang an-or dan so lerin. 14So latet ek so seve ti blan parey kouma lalenn blan, parey kouma lanez e so lizie parey kouma enn boul dife; 15so lipie ti pe briye parey kouma bronz bien poli dan four e so lavwa ti rezone parey kouma son dilo kaskad. 16Li ti pe tini set zetwal dan so lame drwat, e enn lepe koup-dekote bien fite ti sorti dan so labous. So figir ti briye parey kouma soley midi. 17Ler mo trouv li, mo tonbe kouma enn dimoun mor e mo prostern devan li parey. Me li ti poz so lame drwat lor mwa e li ti dir, “Pa per twa! Momem premie ek dernie, 18momem lasours lavi, mo ti finn mor, asterla gete, mo vivan pou leternite; e mo ena pouvwar lor lamor e mo posed lakle laport Ades#1:18 Ades: landrwa kot bann mor ti ale anba later dapre krwayans bann Zwif. . 19Asterla ekrir seki to finn trouve, seki pe pase asterla e seki pou arive apre. 20Ala sinifikasion mister sa set zetwal ek set sandelie an-or ki zot ti trouve dan mo lame drwat. Sa set zetwal la reprezant bann anz, e sa set lalanp la reprezant set legliz.”
Currently Selected:
Rev 1: NTKM2009
Highlight
Share
Copy
Want to have your highlights saved across all your devices? Sign up or sign in
Mauritian Kreol New Testament © Bible Society of Mauritius, 2009.