Nuolhoutsüphrü 1
1
Sinai nunu Israelko Phrükecü
1Siro uko Ijipt kijü nunu parkelie sie, cie kenie cie khrü kenieu nu zha puo nhie; Sinai nhatsa nu rüsuopfhekiu nunu Jihovae Mosa ki; 2Israelmia kro-u pete, u puonuo mu u kinumia idi, theza medzi mu tsü puopuo di thepfumia kide ba shiü phrüliecie. 3Israelmia donu terhü nu pralie kevi khe, u kelhouzha cie mepfü mu sümhoko, Aron nnie rüpfhünuo puopuo idi phrüliecie. 4Siro u puonuoko donu puotsüu idi seyie peteko nu mia puopuo bu nie khruohituo. 5Nnie khruohiketuoko za hako:
Reuben nuo: Shedeur nuou Elizur.
6Simeon nuo: Zurishadai nuou Shelumiel.
7Juda nuo: Aminadab nuou Nahshon.
8Isakar nuo: Zuar nuou Nethanel.
9Zebulun nuomia: Helon nuou Eliab.
10Josef nuoko:
Efraim nuo; Amihud nuou Elishama;
Manasseh nuo, Pedazur nuou Gamaliel.
11Benjamin nuo: Gideoni nuou Abidan.
12Dan nuo: Amishadai nuou Ahiezer.
13Asher nuo: Okran nuou Pagiel.
14Gad nuomia: Deuel nuou Eliasaf.
15Naftali nuo: Enan nuou Ahira.
16Israel kro-u nu u puonuoko donu krüta kemeyie hako kiepie uko bu Israel nuonuoko mhokezha chü.
17Mosa mu Aron unie themia za thupie keba hako zelie, 18sidi unie khrü kenieu zha puo nhie Israel kro-u peteko kie kengulie di u puotsanuo, u kinumia idi u kelhouzha cie mepfü mu sümhoko phrükelie mhiei u puotsanuo za thukelie leshüu phrüpie uko pesishü. 19Jihovae Mosa ki pukeshü mhie di Mosae Sinai rayha nunu uko phrülie.
20Israel nuorieu, Reuben nuomia, u seyieko, u puonuoko mu u kinumia za medzi di phrükecü thepfumia terhü nu pralie kevi khe, u kelhouzha cie mepfü mu sümhoko: 21Reuben yiemia phrükelieko mia nyie hiediaesorou di krie pengou.
22Simeon nuomia, u seyieko mu u puonuoko mu u kinumia za medzi di phrükecü, thepfumia terhü nu pralie kevi khe, u kelhouzha cie mepfü mu sümhoko: 23Simeon yiemia phrükelieko nyie hiepengouethepfü di krie se.
24Gad nuomia, u seyieko u puonuoko kinumia za medzi di phrükecü, u kelhouzha cie mepfü mu sümhoko, terhü nu pralie kevi khe: 25Gad yiemia phrükelieko nyie hiediaepengou krie sorou di hiepengou.
26Juda nuomia, u seyieko, u puonuoko mu u kinumia za medzi di phrükecü, u kelhouzha cie mepfü mu sümhoko, terhü nu pralie kevi khe: 27Juda yiemia phrükelieko nyie hietheniedia di krie sorou.
28Isakar nuomia, u seyieko, u puonuoko mu u kinumia za kephrü, u kelhouzha cie mepfü mu sümhoko, terhü nu pralie kevi khe: 29Isakar yiemia phrükelieko nyie hiepengouedia di krie dia.
30Zebulun nuomia, u seyieko, u puonuoko mu u kinumia za medzi di kephrü, u kelhouzha cie mepfü mu sümhoko, terhü nu pralie kevi khe: 31Zebulun yiemia phrükelieko nyie hiepengouethenie di krie dia.
32Josef nuomia üse Efraim nuomia rei üya, u seyieko, u puonuoko mu u kinumia za medzi di kephrü, u kelhouzha cie mepfü mu sümhoko, terhü nu pralie kevi khe: 33Efraim yiemia phrükelieko nyie hiedia di krie pengou.
34Manasseh nuomia, u seyieko, u puonuoko mu u kinumia za medzi di kephrü teicie mepfü mu sümhoko, terhü nu pralie kevi khe: 35Manasseh yiemia phrükelieko nyie serekenie di krie kenie. 36Benjamin nuomia u seyieko, u puonuoko mu u kinumia za medzi di phrükecü, u kelhouzha cie mepfü mu sümhoko, terhü nu pralie kevi khe: 37Benjamin yiemia phrükelieko nyie serepengou di krie dia.
38Dan nuomia, u seyieko, u puonuoko, u kinumia za medzi di phrükelie, teicie mepfü mu sümhoko, terhü nu pralie kevi khe. 39Dan yiemia phrükelieko nyie hiesorouekenie di krie thenie:
40Asher nuomia, u seyieko, u puonuoko mu u kinumia za medzi di phrükelie, u kelhouzha cie mepfü mu sümhoko, terhü nu pralie kevi khe: 41Asher yiemia phrükelieko nyie hiediaepuo di krie pengou.
42Naftali nuomia, u seyieko, u puonuoko mu u kinumia za medzi di phrükelie, u kelhouzha cie mepfü mu sümhoko, terhü nu pralie kevi khe: 43Naftali yiemia phrükelieko nyie hiepengouese di krie dia.
44Hako theza phrükelieko, mia kerekenie, puotsanuo puo gei mia puopuo idi Israel krütako ze Mosa mu Aron unie khruohi di phrükelieko. 45Israelko u puonuo puopuo idi, teicie mepfü mu sümhoko Israel donu terhü nu pralie kevi khe, phrükecü hade: 46Phrükelieko pete kesa lakh sorou nyie se, krie pengou di hiepengou.
Rüsuopfhekiu la Leviko Mhatho
47Derei Levimia puotsanuo yiemia we phrüpie uko sa mo. 48Kekreilamonyü Jihovae Mosa ki: 49No Levi yiemia rübei phrülie lho; mu no uko phrüpie Israelko salie lho. 50Derei no Leviko bu dietseidiekhobou#1:50 Moro pfhekho, morei zhapu; Ibri Edut. rüsuopfhekiu, süu nyako mu süu vie pete mho kemehoko chütuo; uko bu rüsuopfhekiu mu süu nyako pete toupie tuo; sidi uko rüsuopfhekiu khieümhoura ba di sünu mhatho chütuo. 51Sidi rüsuopfhekiu se keyietuo üro, Leviko bu rhuotuo; mu rüsuopfhekiu pethoutuo üro, Leviko bu chüshütuo, siro kehoupuorei penuo kevormia, dukhriwatuo. 52Siro Israelko u thuo u rüpfhünuo, mu u thuo u pfhelha khieki nu, u thuo u razhüchü nunu idi, kehoupuorei u thuo u pfheki pethoupie balietuo; 53derei Leviko we Israelko kro-u nu noupfhüu bu vor moketuo la u pfheki pethoupie dietseidiekhobou rüsuopfhekiu houpfü batuo, sidi Leviko bu dietseidiekhobou rüsuopfhekiu mehokecü pie uko mese chütuo. 54Hakemhie di Israelkoe chülie. Jihovae Mosa ki diekhakeshü pete medzi di chülie.
Currently Selected:
Nuolhoutsüphrü 1: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More