Mark 1
1
Johan Mia Dzülukepfüu Kepetha
(Mat 3:1-12; Luk 3:1-18; Joh 1:19-28)
1Ukepenuopfü Nuou Jisu Khrista, dieliekevi die therieu:
2Süu Isaya siedzekesiue,
“Harie, n mhodzü a a chalieu ketseshütuo,
puo n cha keseshütuo;
3mia puo rayha nunu shiekhoui di:
‘Niepuu cha keseliecie,
puo chako chü kemezhüliecie!’
idi thupie kezhü mhiei!”
4Johan mia dzülukepfüu rayha nu vor di kephoumako valieketuo la thenoukedikelie dzülukepfü se mia petha. 5Süki Judia kijü pete nu mu Jerusalemmia pete puo ki pra di u thuo u kephoumako phra phre di Jordan rü nunu dzülupfülie. 6Siro Johan-e ut mie pie kechü pfhenei se tsiu chüzhü chiepha se puo chie phapfü, ku mu mepfhidzü se puo ca chü. 7Siro puo pucü, “Mia puo a sie vorkezhüu a ki zhakuo; a nuketsu puo phikoupha rei phreilie sü mo. 8A we dzü nunu nieko dzülu khakeshü zo, derei puo we Kemesa Ruopfü nu nieko dzülu khashütuo,” isi.
Jisu Dzülupfükelie
(Mat 3:13—4:11; Luk 3:21-22)
9Siro süki Jisu Galil kijü Nazaret nunu vor di Jordan rü nunu Johan bu puo dzülu khashü. 10Siro Jisu dzü nunu parlie mumetha puoe tei kokeshü mu Ruopfüu mekhru rhi kemhie puo gei tsurkecü ngu. 11Süsie teigei nu mhapfhe puo; “No a Nuo a khrietho-u; a n ngu a neithor zo,” isi ker.
Jisu Kedokecü
(Mat 4:1-11; Luk 4:1-13)
12Süsie Ruopfüu puo hüze mhai rayha nu vota. 13Siro zha hiedia rayha nu ba di Satan bu puo kedo; sidi puo nhachüko ze ba mu teigeidielieko puo vaphi tuo zo.
Jisu Khuoketemia Dia Kiekelie
(Mat 4:12-22; Luk 4:14-15; 5:1-11)
14Siro mia Johan telieketa sie, Jisu Galil nu vor di Ukepenuopfü dieliekeviu pie mia petha, 15di sie, “Puotei sü tso bate, Ukepenuopfü kedi vor penuo bate, thenoukedilie di dieliekeviu peleliecie,” si.
16Siro Jisu Galil dzükezha khie tuo vokezhü ki, khuoketemia kenie, Simon mu puo siezeu Andria unie jal se khuote tuo di ngulie: unie khuoketemiacü la. 17Sitse Jisu unie ki, “Nnie a siemedziliecie, siro a nnie bu themia ketemia chütatuo.” 18Sitse unie unie jal kha mhawa di puo siemedzita. 19Süsie puo tuo za phizhü ru Zebedi nuo Jakob mu puo siezeu Johan unie rou nunu unie jal pekhuo ba di ngulie. 20Si mumetha puo unie kieshü; sitse unie unie puo Zebedi mu zhakhrü ze ketuoko khapie rou nu bawa di puo siemedzita.
Mesa Kemo Ruopfü Ze Ketuou
(Luk 4:31-37)
21Siro uko Kapernaum nu vorta; sidi sabat vorlie tse, puoe sinagog nu le di mia petha. 22Sitse uko puo kepetha dieko sishü di u ngota, kekreilamonyü puoe thezhokepethako mhie monyü puo kekuo nyi se di mia pethakecü la. 23Sütei touki mesa kemo ruopfü bu puo kebi zetuoketamia puo sinagog nu ba, 24ru puo ruorüi di sie, “Nazaret Jisu, no hieko ze kedipuo chütieya ga? No hieko pekawatuoü hanu vor me? A n si, no Ukepenuopfü Kemesau zo,” sita. 25Derei Jisu puo kerhie di sie, “Kemekrietalie, sidi puo geinu partacie!” 26Sitse mesa kemo ruopfüu themiau pfükelhou mu ruorüishü di puo geinu prata. 27Themia pete u ngopie mhapuochü di sie huoniehuo ki, “Hau kedipuote mu? Puo kekuo kenyi kepetha die kesa puote! Puo mesa kemo ruopfüko ki rei mha pushü ru süko puo die zete,” sita. 28Süsie puo za kemeyie dze süu Galil kijü pete nu keza mhamha vota.
Jisu Themia Kekra Chü Keshürhokeshü
(Mat 8:14-17; Luk 4:38-41)
29Süsie uko sinagog nunu tuota, sidi uko Jakob mu Johan ze salie di Simon mu Andria unie kinu leta. 30Süki Simon kimianuo zuo rukizhü, mu uko hapfü dze pie puo ki pu mhashü. 31Sitse puo süpfü ki phi di puo dzie teshülie di puo phoushü. Ru puo rukiu lata mu puo sie uko lie chü merei bata.
32Süsie niaki leta tsiu thevatieta tse, mia kechükenyü mu terhuokesuo bu u kebi ze ketuo kekra ze Jisu ki vor. 33Siro nadiu nu themia pete vor kitie nu kengu phrelie. 34Sidi puo kechükenyü neiüko kekra rei chü keshürhoshü mu terhuokesuo kekra rei whuowa; siro puo terhuokesuoko bu mhapuorei pu mota, kekreilamonyü süko puo supuo shicü siketa la.
Jisu Galil nunu Mia Pethakecü
(Luk 4:42-44)
35Siro khise teiso pi par kemonu puo sielie di tuo mia kejüra puo vo di kecha chü bata. 36Sitse Simon mu puo zeko puo pfhü vor. 37Sidi uko puo ngulie tse, puo ki, “Mia pete n pfhü tuotelie.” 38Siru puo sie, “Úko tuose sonuoki rünako nu vo khe, a bu süko nu rei mia pethashüketuo la; kekreilamonyü a süu chüketuo la kevor zo.” 39Sidi puo Galil kijü pete nu vo di uko sinagogko nu mia petha mu terhuokesuoko rei whuo tuota.
Jisu Mpa Kechümia Puo Chü Keshürhokeshü
(Mat 8:1-4; Luk 5:12-16)
40Siro mpa kechümia puo vor di puo mhodzünu khoutoulie di sie, “N medo üro, no a chü kemesalie vi zo,” idi puo mezhiemelota. 41Ru Jisu puo noumezhie di puo dzie yhapie süu nyüshü di sie “A medowe, no mesaliecie.” 42Sitse mpa kechüu puo geinu vi mhata, sidi puo mesata. 43Süsie puo süu kha bei di kenourhei puo ketsewa, 44di sie, “No hau dze mia puo ki rei pu hiecie, derei no zievo-u ki vo di n mo pie puo pekieshücie, sidi mia bu silieketuo la, n chü kemesalieketa ruotho Mosa pupie kezhüko chüwaliecie,” si. 45Derei puo vo süu dze pu phi di, dieu pu keza tuota, süla Jisu bu rüna nu lelie suo di vo rüna khie tuota; mu mia lukihaki nu puo ki vorta.
Currently Selected:
Mark 1: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More