Luk 1
1
Pie Theofil Ketsü
1Mia kekra rei u donu mhachü tseikewako dze pfhükengukelieko kesieso di thushü, 2mu ukoe therie nu mhachüketako kengumia mu dieu chaliemia chü di tha hie kie toukeshü tuoi. 3Thetshepfüyakezha Theofil, a rei mha sükosü dze therie nunu meho menuowaketa la, kesieso di thu lapie n ki shü ro viketuo leliete, 4sidi n bu hamhodzü no pethapfükelieko ketho zokecü si toulieketuo la.
Johan Mia Dzülukepfüu Kepenuo Pesikeshü
5Herod Judia kijü mho kedi chü keba ki, zievomia puo puo za Zakaria ükecü puo tuo, puoe zievo chüyakezha Abija kro-u nu mia puo. Puo kimiae Aron yiemia, mu puo zae Elizabet. 6Unie kenienie rei Ukepenuopfü mhodzünu miatho, tsiu Niepuu zhoko mu diekhakeshüko pete ze tseilieyakezhamia phre. 7Derei unie nuo jü, kekreilamonyü Elizabet ha nuojüpfü puo, siro unie kenienie rei tsa phitazhü.
8Siro puo Ukepenuopfü mhodzünu zievo kechü teiki puo kro-u zievo merei mhathoko kechü mese vor tse, 9zievoko chüyakezha zho-u medzi di theza chü kesie ki kethengu theketuo puo kedalieta, süla puo tuo Niepuu rüsuoki nu leta. 10Siro kethengu thekeba ki mechüu pete chazou nu kecha chü ba. 11Sitse Niepuu dieliemia puo vor kethengu thekeba ruosuobau thezatsa thalie di puo pengushü. 12Siro Zakaria süu ngukeshü ki puo keriewa di michieta. 13Derei dielieu sie puo ki, “Michie hiecie, Zakaria, n kecha rünyüliete, mu n kimia Elizabet thepfunuomia puo penuoshü n tsütuo, mu no puo za pie Johan chütuo. 14Unuoyo penuolie tse no n nei mu n noumvütuo, tsiu themia kekra rei u neituo, 15kekreilamonyü puo Niepuu mhodzüki zha zotuo. Puo bu mhakipuorei zu morei zu kekuo puorei krielie lho; puo penuokelie mhodzü rei Kemesa Ruopfüu bu puo tshupfü tuotatuo. 16Puo Israelko kekra nou chü kedi lapie Niepuu uko Kepenuopfü kitsa shüshütuo. 17Siro puo Elija ruopfü mu kekuo se di Niepuu mhodzü rie votuo, miapuonuoko nou chü kedipie mianuonuoko gei shütuo, mu mia die zeyakemoko nou chü kedipie kemiatho mhasitsa shüshütuo, sidi themiako kesepie Niepuu la dojülieketa chütuo.” 18Sitse Zakaria sie dielie süu ki, “Kimhie di a hau silie ta? Kekreilamonyü a tsate mu a kimia rei tsate.” 19Sitse teigeidielieu sie, “A Gabriel. A Ukepenuopfü mhodzünu thaya, puo a bu n rüchünu mu a bu thedze kevi hau se n ki vornu ketseshü ho. 20Derei no tsie a dieko, puotei vorlie ro chü tseilieketuo pele kemo la, mha hako chü vorketuo teisozhau tsolie kemochie no liehuo di die pulie mo batatuo.”
21Süki themiako Zakaria pfhe tha, mu puo rüsuoki nu ba cha phiketa la u ngota. 22Sidi puo par tse, puo uko ki die pulie kenjüta, sitse uko sie puo üse rüsuoki nunu ziemho puo nguwaketa lelie. Puo die pulie lhoketa la puo dzie pie thedo chü uko rüchü. 23Siro puo lietho kechü zhako tseita tse puo kinu vota.
24Siro teisozha süko sie puo kimia Elizabet nuonipfülieta mu hapfü khrü pengou puo ki tse pra mo bata. Sitse hapfü sie, 25“Niepuu thuo a la haha chüshü zo sidi a ngumezhieshüte mu a bu a themiako mhodzü thenga chü tuoyakezhau chüsete,” isi bata.
Jisu Kepenuo Pesikeshü
26Süsie khrü sorouu khrü Ukepenuopfü thuo dielieu Gabriel ketsepie Galil kijü nu Nazaret ükecü rünau nu shü, 27puo ketsepie phousepfü puo, David yiemia Josef ükecümia puo ze kerituoü kebapfü ki shü. Rüü phouse süpfü za Maria. 28Puo süpfü ki vor di sie, “Harie thekhriekepfüpfü, n neiliecie, Niepuu n ze tuote,”#1:28 Leshü keweko nu No thenumia donu thejakepfüthopfü icüu sa. si. 29Derei puo die süu sipie puo melou toutoui di die süu puoca kedipuo üsietie shi lelie mo bata. 30Sitse teigeidielieu sie puo ki, “Michie hiecie, Maria, no Ukepenuopfü khriepfü bate mu! 31No nuonipfülie di thepfunuomia puo penuolietuo mu no puo za üse Jisu tholietuo. 32Puo kezhamia puo chütuo mu puo üse Kerükrietho-u Nuou üdi kietuo, mu Niepuu Ukepenuopfü thuo puo puou David kedibau khapie puo tsütuo. 33Siro puo kechachie Jakob kiu mho dituo; mu puo kedi puo thela chütalie lho zo!” 34Sitse Maria sie teigeidielieu ki, “A sü phousemiapfü puo zoluo, kikidi mha hau chülie ta?” #1:34 Gk A thepfu puorei si mo si. 35Sitse teigeidielieu sie puo ki, “Kemesa Ruopfüu n gei vortuo, mu Kerükrietho-u kekuo pie n soupfülietuo; süla penuolieketuoyo mesa zo; puo üse Ukepenuopfü Nuou ütuo. 36Siro harie, n seyiemia Elizabet, mia puo üse nuojüpfü üyakezhapfü puo tsa zenu nuonipfükelie tsie ha khrü sorouute. 37Kekreilamonyü Ukepenuopfü la zowe mhapuorei chülie kelho tuo mo.” 38Süki Maria sie, “Harie, a sü Niepuu kituopfü zeru, n kepu kemhie a geinu chüliecie,” sishü. Süsie teigeidielieu puo kinu tuota.
Maria Elizabet Ki Kevo
39Süki Maria kenourhei sie tuo kijüthou gei keba Judia kijü rüna puo nu vota, 40sidi puo tuo Zakaria ki nu le di Elizabet kelushü. 41Siro Elizabet-e Maria puo kelukeshü die sishü tse, unuoyo puo va nunu rülhouta. Tsiu Elizabet-e Kemesa Ruopfü bu puo tshupfü di, 42die pu puo rhiechü di sie, “No sü thenumia donu thejakepfüthopfü, mu n nuo n va nu kebayo rei thejakepfütho. 43Siro a Niepuu zuopfü a kinu kevor, kikidi hailie ga? 44Kekreilamonyü no a kelukeshü sishü mu, a va nu keba unuoyo rei puo keneipfü rülhou bate. 45Sirei Niepuu puo geinu chü tsei vorketuo pukeshü dieu pelekeliepfü sü thejakepfütho,” sita.
Maria Ukepenuopfü Ketshe
46Sitse Maria sie,
“A noue Niepuu le pezha bate,
47mu a ruopfü rei a Kelakelieu Ukepenuopfü nunu puo nei bate,
48puoe puo kituo nucünutho kemopfü rei mehokeshü la.
Ketho zo, tsie yawinu thephou pete bu a üse thejakepfüthopfü ükietuo.
49Kekuotho-u a la mha kezha chüshüte,
mu puo za sü mesa.
50Puoe puo khrü preiyakezhamia nuosenuoyieko ngumezhieshüya.
51Puoe puo bou geinu puo kekuou pie pekieshü;
sidi u nou nu kemiako tuoyakezhako phruo kecürewate.
52Puo kedibako geinu kekuoko shükhrüwa,
sidi kerünuoko piesieshü;
53puo mha kevi khe se merüketuoko ketshu chüshü,
mu mhakenyimiako bu methuo di tuota.
54Puoe puo kituou Israel ngumezhieshütuoüketuo rükralie di uko khruohishü,
55puoe kechachie u puonuoko ki, Abraham mu puosepuoyieko pete ki phrapie kezhü tuoi.”
56Siro Maria khrü se mese puo ze ba di süsie la puo kinu vota.
Johan Mia Dzülukepfüu Kepenuo
57Süsie Elizabet nuoze tei tso vorlie tse, puo thepfunuomia yopuo penuolie. 58Siro puo zanuoko mu puosepuoyieko rei Niepuu thuo puo ngumezhie phishüta zocü silie di puo ze uko nei phita.
59Süsie zha thetha nhie mia unuoyo zhüretuoü vor, mu uko unuoyo za thopie puo puo Zakaria zashü chütuo üta. 60Derei puo zuopfü sie, “Mo, puo za thopie Johan chütuo.” 61Sitse uko puo ki, “N yiemia puorei theza süu seya moe.” 62Sidi uko thedo chüpie puo puo kie di puoe unuoyo za supuo chütuoü sietie shi idi puo rüchü. 63Süla puo shiluo puo chalie di süu geinu, “Puo zae Johan,” sishü. Süla uko pete u ngo phreta. 64Süsie puo tie tiega mha parta mu puo meü rüprei parta, sidi puo die pu chielie di Ukepenuopfü tsheta. 65Sükisü zanuoko pete michie phi phreta, tsiu mha hau chüketa dze pu keza Judia kijüthou rüna pete nu vota. 66Siro kehourapuorei thedze süu sikelie khe u nou nu, “Nuo hayo gei thiesie kedipuo chü vortie shi?” idi le phre tuota. Kekreilamonyü Niepuu dzie kekuou puo ze tuotacü la.
Zakaria Siedzedie Kepu
67Siro puo puo Zakaria Kemesa Ruopfü bu puo tshupfü di siedzedie hau pu:
68“Israel Kepenuopfü, Niepuu bu thetshepfücie,
puoe puo themiako mehoshü di uko rhalieketa la.
69Puoe puo kituo David kiu nunu,
u la kelakelie kekuo#1:69 Gk Kelakelie kia puo. puo se siershü,
70puo thiedzütho kemesa siedzekesiko geinu pupie kezhü tuoi,
71u ngumvüko mu u ngumecüyakecü pete dzie nunu u kelashütuoü.
72Sümhie puo phrapie u puonuoko ki keshü ngukemezhieu khashü,
mu puo kemesa dietseidiekho-u rükrashü,
73u puotsa Abraham ki rüse zo di phrapie kezhüu,
74u ngumvüko dzie nunu u kelalietuo üdi,
michie mo di puo lie chütuoü,
75u bu mesa mu miatho di u teisozhako pete puo mhodzünu tuotuoüshü.
76Siro a nuo,
no üse Kerükrietho-u siedzekesiu üdi kietuo;
n bu Niepuu mhodzü vo di chau keseketuo la,
77puo themiako ki,
uko kephouma vakeshü nunu kelalieketuo mhasi pushüketuo.
78Úko Kepenuopfü ngukemezhie la,
peso geinu teikeso u gei tsurketuo,
79kezie pie kezei nu kebako mu kesia khrüu nu ketuoko va pezietuoü,
u phi teshüpie noune cha nu shütuoü.”
80Siro unuoyo phichülie mu ruopfü kitsa rei meteilie, sidi puo Israelmia mechü mhingu chü par kemochie rayha nu lhou tuo tso.
Currently Selected:
Luk 1: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More