Johan 7
7
Jisu mu Puo Siezeko
1Hau sie Jisu Galil nu rühou tuota. Puo Judia nu rühou tuo nyü mota,#7:1 Leshü kewe huo nu Judia nu rühoulie suota isi. kekreilamonyü sünu kekuo se keba Judakoe puo dukhriwa nyü baketa la. 2Süki Judako Pru Nyi#7:2 Moro Rüsuopfheki ireiya. teiu penuota. 3Süla puo siezeko puo ki, “Noe pethakelieko bu rei no chüyakezha mhathoko ngulieketuo la no thechü hanunu tuo Judia nu vocie. 4Miapuorei meyielie nyü ro rüshü di mhapuorei chüya mocü la. No mha hako chüya eru kijüu bu n siliecie.” 5(Kekreilamonyü puo siezeko zorei puo pelelie mokecü la.) 6Jisu uko ki, “A teiu vor moluo, derei nieko la puoteiu we tso sei baya zo. 7Kijüu zo we nieko mecülie lho, derei a mecüya, kekreilamonyü a süu mhatho kesuoko puyakezha la. 8Nieko thenyiu nu volie. A we thenyi hanu volie lho, a la puoteiu vor tou moluocü la.” 9Puo hau pushü di Galil nu bata.
Jisu Pru Nyiu nu Kevo
10Puo siezeko thenyiu nu voketa sie nu Jisu rei la vo, derei puo mechü mhingu chü zo mo di rüshücü mhie di vo. 11Süki Judakoe thenyiu nunu puo pfhü di sie, “Puo kirapuo tuota ga?” sita. 12Mu süki themia kro-u donu puo dze kepu bouübi tuota; huomia sie, “Puo themia kevi puo zo,” si, mu kekreiko sie, “Mo, puo mia seketuo zo,” sita. 13Derei Judako keprei la miapuorei mhotsou zo di puo dze pu mota.
14Thenyiu metsuo ki Jisu rüsuokiu nu kho di mia petha sedeta. 15Sitse Judako uko ngo di sie, “Themia hau mhakipuorei pethapfülie mo ze, kikidi mhasipie hilie ga?” 16Sitse Jisu sie uko ki, “A se pethayakezhako a die mo, derei a ketsekeshüu die zo. 17Themia kehoupuorei Kepenuopfü medo chü nyüya ro, die hau Kepenuopfü kinu vor mo, a thuo a kinu pie par shi silietuo. 18Kehoupuorei puo thuo puo kinu mha puyakezhamia puo thuo puo za pfhüyakezha zo. Derei puo ketsekeshüu bu zayie chü nyüya ro süu ketho zo mu ketho kemo puorei puo nou ba mo zo.
19“Mosae thezho-u khashü nieko tsü mo me? Derei nieko miapuorei thezho-u chüüzeya mo. Siro nieko kiüdi a dukhriwa nyüya ga?” 20Sitse mia krodiu sie, “No terhuokesuo puo zeya! Supuonie n dukhrituo üya ga?” 21Jisu uko die kela di sie, “A mhatho puo chüshü ru nieko pete nie ngo phreta. 22Mosae zhükere zho khashü nieko tsü, (süu Mosa kinu monyü nie puonuoko kinu zo), süla nie sabat nhie rei mia zhüreya. 23Sabat nhie mia zhürekecü la Mosa zho-u varhuota mo üro, kiüdi a sabat nhie mia chü pevi lotsokeshü la nieko a gei nie nei moya ga? 24Chazou kengu geinu mia capi chü monyü ketho capiu nunu mia capi chüliecie.”
Puo Khristau Zo Me?
25Süla Jerusalemmiako huo sie, “Themia hauha mia puo dukhriwatuoü pfhü ketuou mo me? 26Mu lere-i, puo mechühou nu die pu tha zo, derei themiako puo ki mhapuorei pu la mo ze! Kekuo seyakezhako puo üse Khristau zo ücü si tou ba ütuo me? 27Kehouchürei we zowe themia hau kirapuo nu vor shicü si ba; derei Khrista kevor ki, miapuorei puo kirapuo nu vor shicü silie lho.” 28Sitse Jisu rüsuokiu nu mia petha puo rhiechü di, “Nieko a supuo mu a kirapuo nu vor shicü si ba. A a thuo a medo chü di vor mo, derei a ketsekeshüu we ketho zo, mu nieko we puo si mo. 29A puo si ba, kekreilamonyü a puo kinu vor, mu puo a ketseshü.” 30Sitse uko puo telietuoü sieta, derei miapuorei u dzie se puo gei shü mo, kekreilamonyü puo teiu vor moluocü la. 31Derei themia kro-u nu mia kekra puo pelelie di sie, “Khrista vor üro puo themia hau ki rei ungomhathoko chükuoshütuoü memu?”
Jisu Telienu di Mia Ketsekeshü
32Farisikoe mia krodiu puo dze süko kepu ketha silieta, süla zievokezhako mu Farisiko puo telienu di mia ketseshü. 33Süla Jisu sie, “A puotei huoyo nieko ze sa ba di a ketsekeshüu ki votatuo. 34Nieko a pfhütuo, derei nieko a ngulie lho; mu nieko a kebara vorlie kenjü.” 35Sitse Judako huoniehuo üse, “Themia hau kirapuo votatuo üdi u bu puo ngulie lho üta di mu? Puo vo Cüre tuoketa Grikmiako donu ba di Grikmiako pethatieya me? 36Puo pucü, ‘Nieko a pfhütuo mu nieko a ngulie lho, mu a kebara nieko vorlie kenjü,’ isikecü hau puoca kedipuota mu?”
Kerhei Dzü Rüko
37Thenyi thela kemeyietho nhie Jisu siethalie di shie puo rhiechü di sie, “Kehoupuorei terhükezhau bu a ki vorliecie, 38mu kehoupuorei a pelekezhau vor krieliecie. Kethodie-e ‘Pelekezhau puo nou nu kerhei dzü rüko rüluo partuo,’ idi kepu tuoi.” 39Jisue puo pelekelieko bu ngulieketuo Ruopfüu dze hau pushü, süki zo we Ruopfü khashü mo zoluocü la; kekreilamonyü Jisu zayie chülie mo zoluo.
Themiako Kedierhelie Moketa
40Uko puo die hau pukeshü si tse, mia krodiu nunu huomia, “Themia hau siedzekesiu kethota zo,” sita. 41Kekreimiako sie, “Puo Khristau zo,” sita. Derei kekreiko sie, “Khristau Galil kijü nunu par toulie vi me? 42Khristae David yie geinu tsiu David kelhou rüna Bethlehem nunu partuo ükecü kethodie nu pushü mo üme?” 43Sidi puo la themia kro-u bu kedierhelie mota. 44Uko huomia puo telieta nyü sie, derei miapuorei puo gei u dzie khashü mota.
Judamia Krütako Jisu Pele Mvüketa
45Rüsuoki nu thenamiakoe zievokezhako mu Farisiko ki la vor tse uko sie, “Nieko kiüdi puo ze vor mota ga?” idi uko ketsota. 46Sitse thenamiako sie, “Miapuorei themia hau tuoi die kepu si chie molie,” si. 47Süla Farisiko sie uko ki, “Puo bu nieko rei sa sewata mo nhie? 48Kezhako morei Farisiko huomia puo peleta ümha me? 49Derei mia krodi hau thezho-u si kemo la rüseu nu tuote.” 50Sitse Farisiko donu mia puo tsie mhodzü Jisu ki kevor-u Nikodema sie uko ki, 51“U zho nu pedzüperie mia die si mo mu mia mhatho si kemonu mia pejoya mo.” 52Sitse uko sie, “No rei Galil nunu vor me? Leshü pfhü phrü vo ro siedzekesimia puorei Galil nunu sierya mocü ngulietuo.”
Thenu Pieüpfü Puo Tekelie
53Sidi uko tuo u thuo u kinu vo phreta.
Currently Selected:
Johan 7: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More