Hagai 1
1
Rüsuokiu Chülienu Diekhakeshü
1Darius kediu dikelie cie kenie cie, khrü sorouu nu, khrülhou zha puo nhie, Jihova die Hagai siedzekesiu geinu Shealtiel nuo Zerubabel, Juda nu ahng mu Jehozadak nuou Joshua, zievokezhatho-u ki vor: 2Krodiko Jihovae puya: Themia hakoe Jihova kiu chüketuo tei vor moluo übaya. 3Sitse Jihova die Hagai siedzekesiu geinu vor di pukecü: 4Nie thuo nie ki we chü pevi phikelie nu balie, sirei ki hau bu we suokezhü tei zo üba me? 5Süla tsie krodiko Jihovae puya: Nie chükezhüko le menuoshücie. 6Nieko mha kekra prushüte, mu mha huoyo rübei rekelie zo, nie mhacüya, derei nie kelhuo ba mo, nie krieya derei nie ketshu chülie mo; nie pfhe dzieya, derei miapuorei lelieya mo; mu nie mha krakelieko zorei krapie likhuo kepako nu shüwaya. 7Krodiko Jihovae puya: Nie mhachükezhüko le menuoshücie. 8Kijükhruko gei khocie di sei se vorlie, sidi kiu chülie. Sitse a süu nu a neilietuo mu therhupfülietuo, Jihovae siya. 9Niekoe mha kekra meho sie, ru harie, huoyo zie vor mo; nie süu se kinu vor tse, a süu mhe petawa. Kiüdi ga? Krodiko Jihovae siya. Kekreilamonyü a kiu ruo zhüketa la zo, sirei nieko pete rükri nie thuo nie ki nu vote. 10Süla nie mho gei kezha teie thezei pekrüshü mote, mu kijüu puosi rüchükelie khashü mote. 11Siro a teikuo kiepie kijüu gei mu kijükhruko gei, lhacülhale gei, khubezu kesa gei, tier gei, kijü nu lhou parlieyakecü khe gei, themiako gei mu khunuoko gei, tsiu uko mhathoko gei shü.
12Sitse Shealtiel nuou Zerubabel siro Jehozadak nuou Joshua, zievokezhatho-u, themia lhiekelieko pete Jihova uko Kepenuopfü pfheu zelie tsiu siedzekesiu Hagai dieko zelie, Jihova uko Kepenuopfü puo ketsekeshü tuoi; mu themiako Jihova khrüpreilie. 13Sitse Hagai Jihova dielieu, Jihova dieu pie themiako ki pu di sie, a nieko ze tuo zo, Jihovae siya. 14Süsie Jihovae Shealtiel nuou Zerubabel, Juda nu ahng mu Jehozadak zievokezhatho-u, tsiu themia lhiekelieko pete hüshü, sidi uko vor krodiko Jihova, uko Kepenuopfü kiu mhatho chü, 15thekhrü sorouu nu zha mepfüedia nhie.
Currently Selected:
Hagai 1: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More