Habakuk 1
1
1Habakuk siedzekesiu mha kenguko pukeshü.
Siedzekesiu Panyakecü
2He-i Jihova, a bu kichiepuo kekhruo cha,
mu no rünyüshü mo batieya ga?
morei n ki “Mha kesuo,” idi shie
mu no kelashü mo batuo mu?
3Kiüdi no a bu kekrükecüko ngu,
tsiu kemezhiekecüko mehokecü chüshü ga?
Kepeka mu mha kesuo a mhodzünu bate;
kegeikecü mu keprülikecü sierte.
4Sidi thezho-u rünyhute,
mu kethoca mhakipuorei tuo mo.
Kelhiecümia kemiathoko houpfüliete,
süko thecau chü kerüpfhiwate.
5Seyieko mehoshüyi, sidi leshücie.
Nie ngolie! Nie kedetheliecie!
Kekreilamonyü nieko teiki nu mhatho puo chüshüzhie,
süu nie ki pushü zorei nieko pelelie lho.
6Kekreilamonyü a Chaldiamia piesieshütuo,
seyie puo zho suo mu meyiemehükecü puo,
mia lhou keba kijü u vie kemoko lielietuoü tuo kijü puochapuochie pete pfüthe votuo.
7Uko ngu prei mu kemerie zo;
uko capi mu uko kemesü uko thuo u geinu par.
8Kierko khurhü ki rei ta vikuo,
thevatie socie ki u zho suokuo;
u kierko mia whuoya.
U kierkeseko kepetse nunu vor;
ukoe tsüü mhatetuoü thu kevo tuoi zo.
9Uko pete rei mia kemvü chütuoü tuoya,
uko zie pelapfü thu voya;
uko kediemia tepie huocanyo tuoilieya.
10Uko kedimiako krenyüya,
tsiu kezhako u mhodzüki kethekre zo.
Ukoe badiko pete krenyüya,
sidi kijü pfhelie di süu lielieya.
11Uko teikhrie mha he kelhoukezha tuoi voya;
ukoe moutaya sidi phoumataya;
kekuo sü uko rhuo zo.
12He-i Jihova a Kepenuopfü, Kemesau.
No thiedzü nu tuo mo me?
No siatalie lho.
He-i Jihova, noe uko nyie kecütuoü uko rü se bate;
siro no, he-i, Tsiekrieu,
siazha pie uko tsüketuo la uko sesiershüte.
13Mha kesuo mehoketuo n mhi mesathor,
mu noe kekrükecü meholie kenjü;
kiüdi no kelhiekecüko meho,
tsiu kerüzhüko uko ki miathokuokecü mezulie zorei kemekrie bata mu?
14Noe themia chüpie dzükezha nu khuoko mhieshüte,
khunuo gou ketuoko u mhokezha ba kemo tuoiwate.
15Ngumvümia#1:15 Ibri Puo. khuoshüwi se uko pete teshüliete;
puo khuose pie uko telie,
puo jal se uko bo kenguliete;
süla puo nei mu puo noumvü bate.
16Süla ruosuo chüpie puo khuose tsü,
tsiu mha pie puo jal tsü,
kekreilamonyü süko geinu puo ya chü pekra philie,
mu puo kecüca menhoukelie la.
17Süla puo bu puo jal bie kemethuo sei batuo me?
Sidi ngukemezhie jütoi zo di seyieko peka ba zotuo me?
Currently Selected:
Habakuk 1: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More