Timothi Kerieu 1
1
Kelukeshü
1Ukepenuopfü u Kelakelieu, mu u kemerüu Khrista Jisu khakeshü die nunu apostel chükelie Paul-e,
2Khapie kepeletsa a nuo ketho chüketa Timothi tsükeshü:
Ukepenuopfü u Puou tsiu u Niepu Khrista Jisu kinu kepar ngukemezhie, kekhrie mu noune bu bakelieu chücie.
Ketijü Kepethako la u Kireilie Morokesuo
3A hadzü Makedonia nu votuo ükezhü ki n bu Efesa nu ba di mia kro puo bu kepethadie kekrei pie petha hienu, 4morei kemeduo dzeko pu mu u pfutsanuoko za phrü hulie kelho chü kebako rünyü hienushü, mha süko la mia bu kepele nu Ukepenuopfü lie#1:4 Moro mharhü. chükelieu monyü mia chüpie keprüli tuokezha zo. 5Derei die khakeshüu ro thenou kemesa, kekhrie, mu noudonoule kemezhü, siro kethera kemo kepeleu zo. 6Huomia we hako vajopfü rürei vo diethuodieruo kepu nu tuote, 7uko thezhokepethamia chü nyüya, sirei uko thuo puyakezhako morei si tou üketuo dieu rei si tsoya mo.
8Miapuonie thezho-u ze menuo tuoya ro puotou zo ücü we si ba zo. 9We sikelie thezho-u zowe miathomia la monyü thezho varhuokezhamia mu mia die zeyakemomia, miatho kemomia mu kephoumamia, mesa kemomia siro kerüzhümia, u puonuo kedukhriko tsiu u zuonuo kedukhriko mu mia kedukhrimia la; 10pierüü kechümia, thepfumia thuo thepfumia ze kekhriekezekecümia, miatemia, kemedamia, tijü di rüsekezhamia, sizomonyü kekrei kehoupuorei kepethadie keviu ze ketherükecüko la khakeshü zo, 11pie a pelekeshü die süusü, zayie kechü mu thejakepfü Ukepenuopfü dieliekeviu zo.
Ngukemezhie la Ketshe
12Khrista Jisu u Niepuu, a chü pekuoshüyakezhau pezie, puo a le pevi di a bu puo lie chükelie la, 13a thiedzü puo tha, mia thamele mu mia pesüpemvü zo. Derei a ngukemezhie ngulie, a pele kemo ki mhasi kemo nunu mha süko chükewa la, 14tsiu u Niepuu Khrista Jisu kinu kevor ngukemezhie nu kepele mu kekhrie pie a tshuzie phipfü tuote. 15Khrista Jisue kephoumako kelalietuo üdi kijü tsurkecü die süu ketho tou zo mu süu ze ketseiketsolie zhü, süko donu a we phoumado-u zo. 16Derei puo a ngumezhiekewa süu hasie puo pelelie di kechachie kerhei ngulieketuoko la a kephoumado-u rüli geinu puo mia gei puo nou shükhreshühiethor tuoyakezha thashü kieketuo la zo. 17Siro kechachie Kediu, siatalie kelho-u, umhi pie ngulie kelho-u, Ukepenuopfü puo rübei zokecüu bu kechachie thetshetherhupfü mu zapuzayie chücie. Amen.
18A nuo Timothi, hadzü n dze pukeshü siedzekesi die tuoi n bu süko se n hiechü keperhie thalieketuo la a die hako pie n kishüzhü ho, 19kepele mu noule kemezhüu se tha zolie. Huomia we süu khawa di u kepeletsa u rou hetshehetshakewa tuoi tuote; 20süko donu Huminia mu Alexander unie sa; unie bu Ukepenuopfü tha suokecü silieketuo la a unie khapie Satan dzie nu shüwate.
Currently Selected:
Timothi Kerieu 1: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More